- 3-6 شىلدە ارالىعىندا الماتىداعى بالۋان شولاق اتىنداعى سپورت سارايىندا بەلگىلى قوعام قايراتكەرى, كەزىندە ەلىمىزدىڭ بوكسى مەن دزيۋدوسىن ورگە سۇيرەپ, سول فەدەراتسيالارعا جەتەكشىلىك ەتىپ, حالىقارالىق ۇيىمداردا دا ءتۇرلى باسشىلىق قىزمەت اتقارعان بەكەت ماحمۇتوۆتى ەسكە الۋعا ارنالعان ازيانىڭ اشىق كۋبوگىنىڭ جالاۋى جەلبىرەيدى. جاسوسپىرىمدەر مەن جاستاردىڭ باسىن قوساتىن جارىستا ەلىمىزدەن بولەك, اقش, ازەربايجان, قىرعىزستان, تاجىكستان, وزبەكستان, ليۆان, موڭعوليادان كەلگەن 700-دەن اسا تاتامي شەبەرلەرى باق سىنايدى. سونىمەن قاتار سايىس بارىسىندا تورەشىلەر مەن باپكەرلەرگە ارنالعان حالىقارالىق سەمينار ۇيىمداستىرىلادى. وعان پولشا, مىسىر, وڭتۇستىك كورەيا, قىرعىزستان, ءۇندىستان, يران, نيدەرلاند, جاپونيا, ساۋد ارابياسىنان كەلگەن 80-گە جۋىق بىلىكتى مامان قاتىسادى.
- ۆەتنامدا مۋاي-تايدان ازيا چەمپيوناتى اياقتالدى. دودادا ەلىمىزدىڭ 24 سپورتشىسى باق سىناپ, سولاردىڭ جەتەۋى جەڭىس تۇعىرىنىڭ ەڭ بيىك ساتىسىنا كوتەرىلدى. جالپى ەسەپتە جەرلەستەرىمىز تەك تايلاند قۇراماسىن العا جىبەرىپ, ەكىنشى ورىندى يەلەندى.
- حورۆاتيانىڭ زاگرەبىندە وتكەن حالىقارالىق تۋرنيردە ەلىمىزدىڭ ۇستەل تەننيسشىلەرى ءساتسىز ونەر كورسەتتى. العاشقى اينالىمدا سەرىك جۇبانوۆ گەرمانيالىق سەندريك مەيسسنەردەن ۇتىلسا, داستان كەنجەعۇلوۆ قىتايلىق سيۋي حايدۋنگە جول بەردى. ايدوس كەنجەعۇلوۆ ۋەلستىك دجوشۋا ستەيسيگە سان سوقتىرعانىمەن, ەكىنشى كەزەڭدە قىتاي ەلىنىڭ وكىلى سيۋي ينبينگە ەسە جىبەردى.
- فۋتبولدان ەلىمىزدىڭ پرەمەر-ليگاسىنىڭ 14-تۋرى مىناداي ناتيجەلەرمەن اياقتالدى: « ۇلىتاۋ» – «جەتىسۋ» 1:2, «اتىراۋ» – «وقجەتپەس» 0:0, «توبىل» – «جەڭىس» 2:2 , «تۇران» – «اقتوبە» 0:3, «قايسار» – «ەلىماي» 1:2, «ورداباسى» – «قايرات» 0:1, «استانا» – «قىزىلجار» 3:3. جارىس كەستەسىندە «استانا» ءالى دە كوش باسىندا تۇر. ەلوردالىق كلۋبتا 34 ۇپاي بار. ەكىنشى, ءۇشىنشى ورىنداردا – «قايرات» (33 ۇپاي) پەن «اقتوبە» (29 ۇپاي).
- فۋتزالدان ەلىمىزدىڭ چەمپيونى انىقتالدى. الماتىدا وتكەن «قايرات» پەن «سەمەي» اراسىنداعى ءتورتىنشى كەزدەسۋ 4:3 ەسەبىمەن اياقتالدى. الاڭ يەلەرى ساپىنان جۋليو زانوتتو (10-مينۋت), ءبىرجان ورازوۆ (13-مينۋت), اليسسون (17, 38-مينۋتتار) مەرگەندىك تانىتسا, قوناقتار اراسىنان دەدەزينو اندەرسون (11-مينۋت), كاميل گەرەيحانوۆ (35-مينۋت), يگيتا (36-مينۋت) نىسانانى ءدال كوزدەدى. ەستەرىڭىزگە سالا كەتەيىك, قوس كوماندا اراسىنداعى العاشقى ماتچتا «سەمەي» جەڭىسكە جەتكەن ەدى. الايدا ودان كەيىنگى ءۇش ويىندا الماتىلىقتار باسىمدىق تانىتتى.
- 4-10 شىلدە ارالىعىندا استانادا اۋىر اتلەتيكادان جاسوسپىرىمدەر مەن جاستار اراسىندا وتەتىن ازيا چەمپيوناتىندا ەلىمىزدىڭ نامىسىن 36 ورەنىمىز قورعايدى. باق سىناۋشىلار قاتارىندا داريا بالابايۋك (63 كگ), ايانات جۇماعالي (77 كگ), ءاليحان اسكەرباي (71 كگ), ەدىگە ەمبەردى (79 كگ), دەنيس پولۋبويارينوۆ (94 كگ), اڭسار تۇرسىنبەك (+94 كگ), ساعىنبەك سامارقان (+110 كگ) سىندى سايىپقىراندار بار.
