شارا بارىسىندا 5000-عا جۋىق ادام – كاسىبي كۇيشى, وقۋشى, ستۋدەنت جانە ونەرسۇيەر جۇرت – ءبىر مەزەتتە قوس كۇي ورىنداپ, قازاقستان رەكوردتار كىتابىنا ەنگەن جاڭا جەتىستىككە قول جەتكىزدى. رەكورد ورناتۋ ءساتىن ارنايى كەلگەن قايرات تازابەكوۆ رەسمي تۇردە تىركەپ, راستايتىن سەرتيفيكاتتى جەتىسۋ وبلىسىنىڭ اكىمدىگىنە تابىستادى.
فلەشموبقا وبلىستىڭ بارلىق اۋداندارى مەن مەكەمەلەرىنەن كەلگەن قاتىسۋشىلار بەلسەندى قاتىسىپ, ۇلتتىق ونەرگە دەگەن قۇرمەتىن ءبىلدىردى. سونىمەن قاتار, جەتىسۋ ءوڭىرىنىڭ كورىكتى جەرلەرىندە تۇسىرىلگەن «باقتىبايدىڭ اۋەنى» كۇيى بەينەبايان رەتىندە جۇرت نازارىنا ۇسىنىلدى. بۇل مۋزىكالىق كليپ فلەشموبپەن ۇشتاستىرىلىپ, ءداستۇر مەن زاماناۋي ونەردى ۇيلەستىرگەن ەرەكشە جوباعا اينالدى.
مەرەكەلىك شارا اياسىندا جىر الىبى باقتىباي جولبارىس ۇلىنىڭ 190 جىلدىعىنا وراي ونىڭ «باقتىبايدىڭ اۋەنى» كۇيى مەن بەلگىلى كۇيشى-كومپوزيتور ءابدىمومىن جەلدىبايدىڭ «ەركە سىلقىم» تۋىندىسى ورىندالدى.
ۇيىمداستىرۋشىلاردىڭ ايتۋىنشا, بۇل شارا ۇلتتىق ونەردى دارىپتەپ قانا قويماي, مادەني مۇرانىڭ ۇرپاقتان-ۇرپاققا بەرىلۋىنە سەپ بولدى. « ۇلى دالا ءۇنى» فلەشموبى جەتىسۋ ءوڭىرىنىڭ عانا ەمەس, كۇللى قازاق ەلىنىڭ مادەني ومىرىندەگى ايتۋلى وقيعا رەتىندە ەل ەسىندە قالدى.
