2025 جىلعى 1 قاڭتارداعى جاعداي بويىنشا بارلىعى 4 579 342 بىرلىكتەن تۇراتىن باستاپقى گەولوگيالىق اقپاراتتىڭ 60%-ى — 2 601 571 بىرلىگى تسيفرلاندى. بۇل باعىتتاعى جۇمىستار «ۇلتتىق گەولوگيالىق قىزمەت» اق بەكىتكەن جوسپارعا ساي جۇرگىزىلۋدە جانە تولىق تسيفرلاندىرۋ 2028 جىلعى 1 قاڭتاردا اياقتالادى دەپ كۇتىلۋدە.
تسيفرلانعا باستاپقى گەولوگيالىق اقپارات قاتارىنا اۋماقتىق قورلاردا ساقتالعان قاعاز قۇجاتتاردىڭ سكانەرلەنگەن نۇسقالارى, سونداي-اق ماگنيتتىك لەنتالار مەن كارتريدجدەردەن الىنعان سەيسميكالىق دەرەكتەر جاتادى. بۇل – دالالىق جانە زەرتحانالىق گەولوگيالىق بارلاۋ جۇمىستارى بارىسىندا تىكەلەي تىركەلگەن, باعالى ءارى تۇپنۇسقا مالىمەتتەر.
سونىمەن قاتار ەلىمىزدە ەكىنشى گەولوگيالىق اقپاراتتى جۇيەلەۋ جانە تسيفرلاندىرۋ دا بەلسەندى تۇردە جۇرگىزىلۋدە. بۇگىنگى تاڭدا رەسپۋبليكالىق جانە اۋماقتىق گەولوگيالىق قورلاردا ساقتالعان 74 452 ەسەپتىڭ ىشىنەن 66 180-ءى قۇرىلىمدالىپ, تسيفرلىق فورماتقا كوشىرىلدى. بۇل جالپى كولەمنىڭ 89%-ىن قۇرايدى. اتالعان جۇمىسقا ەسەپتەردىڭ قاعاز نۇسقالارىن سكانەرلەۋ, ولاردى بىرىڭعاي ەلەكتروندى قالتالار مەن فايل تۇرلەرىنە قۇرىلىمداۋ جانە ناقتى زەرتتەلگەن اۋماقتارعا گەوگرافيالىق سايكەستەندىرۋ كىرەدى.
اتقارىلىپ جاتقان بۇل جۇمىستار گەولوگيالىق مالىمەتتەرگە قولجەتىمدىلىكتى جەڭىلدەتىپ قانا قويماي, جەر قويناۋىن پايدالانۋعا قاتىستى جاساندى ينتەللەكت پەن زاماناۋي اناليتيكالىق قۇرالداردى ەنگىزۋگە بەرىك نەگىز قالايدى. بۇل — «اقىلدى گەولوگيانى» دامىتۋعا جانە قازاقستاننىڭ مينەرالدىق-شيكىزات سالاسىنا ينۆەستيتسيا تارتۋعا باعىتتالعان ماڭىزدى قادام.
