قىتايدا ەسكالاتور ءبىر ادامنىڭ اياعىن شايناپ جىبەردى (ۆيدەو)

استانا. 4 تامىز. قىتايدا ەسكالاتور ءبىر ەر كىسىنى «جۇتىپ جىبەرگەن». وسىدان العان جاراقاتتارى سالدارىنان ونىڭ اياعىن كەسىپ تاستاۋعا تۋرا كەلدى. بۇل تۋرالى ras.kz حابارلادى. وقيعا شانحاي قالاسىندا بولعان. Cاۋدا ورتالىقتارىنىڭ بىرىندە ەسكالاتور كۇل-قوقىس جيناۋشى جىگىتتىڭ اياعىن «جۇتىپ قويعان». ول ءوزىنىڭ كۇندەلىكتى جۇمىسىن اتقارماقشى بولىپ, ەسكالاتوردىڭ تەپكىشەگىنە اياعىن باسقان كەزدە ونىڭ استىنداعى ەدەن وپىرىلىپ قۇلاپ, جەرگە تۇسكەن. سول كەزدە ەدەن سىپىرۋشىنىڭ اياعى ماشينانىڭ تەتىگىنە قىستىرىلىپ قالعان. زارداپ شەگۋشىنىڭ ايقايىنان كەيىن ساۋدا ورتالىعىنىڭ قىزمەتكەرلەرى وعان كومەكتەسپەكشى بولىپ جان-جاقتان جۇگىرىپ كەلەدى. الايدا, ولاردىڭ قولدارىنان ەشتەڭە كەلە قويمايدى. جۇرت سوسىن توتەنشە جاعدايلار قىزمەتىن شاقىرىپ, سولاردىڭ ارقاسىندا ەر كىسى شىعارىپ الىنادى. كۋاگەرلەردىڭ ايتۋىنشا, قىتايلىق جىگىت اياعىنىڭ قاتتى اۋرۋىنىڭ سالدارىنان ەسىنەن تانىپ قالعان. كەيىنىرەك العان جاراقاتىنىڭ ناتيجەسىندە ونىڭ اياعىنا امپۋتاتسيا جاساۋعا تۋرا كەلگەن. ايتا كەتۋ كەرەك, بۇل قىتايدا سوڭعى كەزدەرى ەسكالاتور توڭىرەگىندە ورىن الىپ وتىرعان ءبىرىنشى قايعىلى وقيعا ەمەس. بيىلعى شىلدە ايىنىڭ سوڭىندا تسزينچجوۋ قالاسىندا 30 جاستاعى قىتايلىق ايەل ەسكالاتور مەحانيزمىنە ءتۇسىپ قالعان بولاتىن. كەلىنشەك سول الاساپىراندا كىشكەنتاي بالاسىن قۇتقارىپ قالدى دا, ءوزى قازا تاپتى. تالعات رايىمبەك. دەرەك, سۋرەت: ras.kz.