ازاماتتىق پارىزعا ادالدىق تانىتايىق
ەلىمىزدىڭ شىعارماشىل جانە ەڭبەك ۇجىمدارى بارشا قازاقستاندىقتاردى پرەزيدەنتتىك سايلاۋعا قاتىسۋعا شاقىرادى
ورتالىق كوممۋنيكاتسيالار قىزمەتىنىڭ الماتى بولىمشەسىندە جالپىرەسپۋبليكالىق «سەنىڭ داۋىسىڭ – سەنىڭ بولاشاعىڭ» اتتى پوستەرلەر بايقاۋىنىڭ باستالعانى جونىندە بريفينگ ءوتتى. وعان ەلىمىزدىڭ ابىرويىن اسىرعان سپورتشىلار, مادەنيەت, ونەر سالاسىنىڭ جاس وكىلدەرى, بەلسەندى بلوگەرلەر مەن قوعامدىق ۇيىمداردىڭ مۇشەلەرى قاتىستى. بايقاۋدىڭ نەگىزگى ماقساتى ەلىمىزدەگى ساياسي ماڭىزدى وقيعا – 2015 جىلى 26 ساۋىردە وتەتىن كەزەكتەن تىس پرەزيدەنتتىك سايلاۋعا قاتىسۋشىلاردىڭ بەلسەندىلىگىن ارتتىرۋ, ازاماتتىق قوعامنىڭ بىرەگەي قۇقىقتىق ساناسىن قالىپتاستىرۋ بولدى.
اتالعان شارانى جاس جۋرناليستەردىڭ «قالامگەر ازامات» قوعامدىق قورى ۇيىمداستىردى. قۇرىلعانىنا التى جىل بولعان قوردىڭ جەتەكشىسى ا.قىرىقباي بۇگىندە ينتەرنەت, فەيسبۋك, يستاگرام, پوستەر جاستاردىڭ ۇعىنىقتى ءتىلى ەكەنىن, سوندىقتان ولاردى, جالپى قازاقستاندىقتاردى سايلاۋعا كوپتەپ قاتىستىرۋ ءۇشىن وسى جوبانى قولعا العاندارىن جەتكىزدى.
– بايقاۋعا قازاقستاننىڭ تۇكپىر-تۇكپىرىنەن قاتىسۋعا نيەت ءبىلدىرگەندەر ءوتىنىم مەن دايىنداعان ماتەريالىن ونلاين جۇيەسى ارقىلى جولداي الادى. جاريا ەتىلگەن پوستەردى ينتەرنەت قولدانۋشىلار دا ونلاين جۇيەسىندە باعالاپ, داۋىس بەرەتىن بولادى. بۇل ءبىر جاعىنان جاستاردى شىعارماشىلىق جۇمىسقا تارتىپ, ولاردىڭ ەڭبەگىن تانىتۋ. ال جەڭىمپازدار ەڭبەكتەرى كوشەدەگى باننەرلەردە, قوعامدىق ۇيىمدار مەن قوعامدىق جەرلەردە ىلىنەدى. سوندىقتان قازاقستاندىق جاستاردى وسى بايقاۋعا قاتىسۋعا شاقىرامىز, – دەدى ايدار قىرىقباي.
قازىلار القاسىنىڭ توراعاسى قازاقستان سۋرەتشىلەر وداعىنىڭ توراعاسى, قازاقستاننىڭ ەڭبەك سىڭىرگەن قايراتكەرى, پروفەسسور بايتۇرسىن ومىربەكوۆ قازاقستاندىق سۋرەتشىلەردى جاستاردىڭ مۇنداي باستاما كوتەرۋى قۋانتىپ وتىرعانىن, ويتكەنى, بۇل بايقاۋدا ءار ادام ەلىمىزدىڭ پرەزيدەنتتىك سايلاۋدى وتكىزۋدە ءوزىنىڭ شىعارماشىلىق يدەياسىن, مۇمكىندىگىن سىناپ كورەتىنىن, ەڭ باستىسى, وعان تەك كاسىبي سۋرەتشىلەر عانا ەمەس, بارشا ونەرگە بەيىمى بار ازاماتتاردىڭ قاتىسۋى ارقاسىندا توپتاسىپ, ەلىمىزدەگى ايتۋلى وقيعادا ءوز بەلسەندىلىكتەرىن كورسەتەتىنىن جەتكىزدى.
– بۇگىن بۇكىل قازاقستاندىقتاردا, ەل-ەلدى, جەر-جەردى قامتيتىن ۇلكەن بايگە باستالدى, – دەدى بايقاۋدىڭ قازىلار مۇشەسى, بەلگىلى ءانشى نۇرلان البان. – بايقاۋدا جاس مولشەرىنە ەشقانداي شەك قويىلماعان. سوندىقتان ءبىزدىڭ ءاربىر وتانداسىمىز بەن ءاربىر قازاقستاندىقتىڭ وسى شاراعا قاتىسۋىنا مۇمكىندىك بار. بۇل اكتسيا نە ءۇشىن كەرەك؟ بارلىعىمىز ءبىر ادامداي وسى ايتۋلى جانە جاۋاپتى كۇنگە, ياعني كامەلەتكە تولعان جاس بۋىننان باستاپ ءوزىن قازاقستان رەسپۋبليكاسىنىڭ تولىققاندى ازاماتى سانايتىندار سايلاۋعا اتسالىسۋىمىز كەرەك. ول – مەملەكەتتىڭ تىنىشتىعى, ول – ەلدىڭ تىنىشتىعى. ول – ەل-جۇرتتىڭ اماندىعى, بەرەكە-بىرلىگى. وسى مۇمكىندىكتى پايدالانا وتىرىپ, ونەر ساپىندا جۇرگەن ارىپتەستەرىمدى, بارشا حالىقتى سايلاۋعا ءتاستۇيىن قاتىسۋعا شاقىرامىن.
جەڭىمپازداردى باس جۇلدە مەن ءۇش جۇلدەلى ورىن, باعالى سىيلىقتار, ۇيىمداستىرۋشىلار اتىنان العىس حات پەن ارنايى سەرتيفيكاتتار كۇتىپ تۇر. تۋىندىلار 17 ناۋرىزدان 19 ساۋىرگە دەيىن قابىلدانادى. تەك ءبىر ەسكەرەتىن جايت, بەلگىلى ءبىر ۇمىتكەرگە داۋىس بەرۋگە ۇگىت-ناسيحاتتىق سيپاتتاعى جۇمىستار قابىلدانبايدى. بايقاۋعا ۇسىنىلاتىن جۇمىستار 5 مەگابايتتان اسپايتىن JPEG, PNG, BMP ءپىشىمدەرىندەگى sailau2015.el.kz ارنايى پاراعىنا جۇكتەلۋى ءتيىس.
سونداي-اق, بريفينگ اياسىندا شىعىس قازاقستان, وڭتۇستىك قازاقستان, ماڭعىستاۋ, قاراعاندى, اتىراۋ وبلىستارى جاستارىمەن تەلەكوپىر ۇيىمداستىرىلدى. وندا وبلىستاعى جاستار اتالعان بايقاۋعا بەلسەنە قاتىساتىندىقتارىن ءبىلدىردى.
گۇلزەينەپ سادىرقىزى,
«ەگەمەن قازاقستان».
الماتى.
سۋرەتتى تۇسىرگەن
يۋري بەككەر.
