ءمينيستردىڭ ايتۋىنشا, ەلىمىزدە جي سالاسىن دامىتۋ ءۇشىن الدىمەن ءتيىستى نورماتيۆتىك-قۇقىقتىق بازا مەن ەتيكالىق قاعيداتتار قالىپتاستىرۋ قاجەت. وسى ورايدا 2025 جىلعا ارنالعان ۇلتتىق ستاندارتتاۋ جوسپارىنا سايكەس, العاشقى تەحنيكالىق ستاندارتتار ەنگىزىلدى.
«اتاپ ايتقاندا, بۇل ستاندارتتار جي-ءدىڭ بازالىق تەرمينولوگياسىن, تاۋەكەلدەردى باسقارۋ جۇيەسىن, ءبىلىم ينجەنەرياسىن جانە ارحيتەكتۋرالىق نەگىزدەرىن قامتيدى», دەدى جاسلان ماديەۆ.
ءمينيستردىڭ ايتۋىنشا, ەرەكشە نازار ۇعىمدىق نەگىزدەر مەن تەرمينولوگيانى ناقتىلاۋعا ارنالعان ستاندارتقا اۋدارىلىپ وتىر. بۇل قۇجاتتار 2025 جىلدىڭ سوڭىنا دەيىن بەكىتىلۋى ءتيىس.
سونىمەن قاتار, جي تۋرالى زاڭ جوباسى دا ازىرلەنىپ, قازىرگى تاڭدا ماجىلىستە قارالىپ جاتىر. بۇل قۇجات سالاداعى نەگىزگى ەرەجەلەردى بەكىتەدى.
«زاڭ جوباسىندا اشىقتىق, ادىلەتتىلىك, قورعالۋ, ادام قۇقىقتارى مەن بوستاندىقتارىنا باسىمدىق بەرىلگەن. سونىمەن بىرگە, جەكە دەرەكتەر مەن قۇپيا اقپاراتتى قورعاۋ ماسەلەسى دە قامتىلعان», دەدى مينيستر.
مينيستر بۇل زاڭنىڭ شەكتەۋ ەمەس, كەرىسىنشە يننوۆاتسيانى دامىتۋ, ينۆەستيتسيا تارتۋ جانە جي تەحنولوگياسىن ەكونوميكانىڭ ءتۇرلى سالالارىنا ەنگىزۋگە باعىتتالعانىن اتاپ ءوتتى.
كazLLM – وتاندىق جاساندى ينتەللەكت نەگىزى
سۇحبات بارىسىندا مينيستر وتاندىق جي تەحنولوگيالارى تۋرالى دا توقتالدى. كazLLM – قازاقستاندا جاسالعان العاشقى ءىرى ۇلتتىق تىلدىك مودەل بولىپ سانالادى. ونىڭ قۇرىلىمى 148 ملرد توكەننەن تۇرادى جانە ول قازاق, ورىس, اعىلشىن, تۇرىك تىلدەرىن قامتيدى.
«كazLLM – قازاق تىلىنە بەيىمدەلگەن ءماتىن وڭدەۋ, چات-بوت, اۋدارما جانە اناليتيكالىق پلاتفورمالار جاساۋعا ارنالعان قۋاتتى نەگىز. بۇل مودەل ەلدىڭ IT ەكوجۇيەسىن نىعايتىپ, شەتەلدىك بالامالارعا تاۋەلدىلىكتى ازايتادى», دەيدى جاسلان ماديەۆ.
سونداي-اق, SHERKALA, AlemLLM اتتى تاعى ەكى ۇلكەن تىلدىك مودەلدىڭ دە جاسالعانى ايتىلدى. ولار دا قازاق ءتىلىن قولدايدى جانە حالىقارالىق ستاندارتتارعا ساي.
ءمينيستردىڭ ايتۋىنشا, العاشقى تەحنيكالىق باعالاۋ ناتيجەلەرى بويىنشا, بۇل ءۇش مودەل قازاق تىلىندەگى ءماتىن گەنەراتسياسىندا شەتەلدىك LLaMA مەن ChatGPT-دەن كەم ەمەس, كەي جاعدايدا ساپاسى جوعارى ەكەنىن كورسەتتى.
مودەلدەر جاقىن ارادا نارىققا ۇسىنىلادى. ولار ستارتاپتارعا, بيزنەس سەكتورعا, جوو-لارعا جانە قاراپايىم ازاماتتارعا قولجەتىمدى بولادى.
