دەپۋتات جەر سالاسىنداعى زاڭ بۇزۋشىلىق ماسەلەسىن كوتەردى

ب.بازاربەكتىڭ ايتۋىنشا جەتىسۋ وبلىسىنىڭ الاكول اۋدانىندا بيىل 26 ساۋىردە ارىپتەسى مۇرات ابەنوۆپەن «جەر اماناتى» جەر كوميسسياسىمەن ءىس-ساپارى بارىسىندا اقشي اۋىلىنداعى سۋ جاعاسىنداعى كوممەرتسيالىق ماقساتتاعى 500-گە جۋىق بەرىلگەن جەرلەردىڭ 2016 جىلدان باستاپ يگەرىلمەي, پايدالانىلماي جاتقانىن كوزبەن كورگەن.

«جەرگىلىكتى اۋدان اكىمدىگى, اۋداننىڭ جەر جانە ساۋلەت, قۇرىلىس بولىمدەرى, وبلىستىق جەر رەسۋرستارىن باسقارۋ دەپارتامەنتى باسشىلارى مەن قىزمەتكەرلەرى نەگە بايقاماعان؟ «جەر اماناتى» تەكسەرمەيىنشە نەگە ءۇنسىز وتىرعان؟ مىنە قازىر قولىمدا جوعارىدا اتاعان 500 جەر ۋچاسكەلەرىنىڭ 351 ۋچاسكەسى بويىنشا اقپارات, جەر يەلەرىنىڭ اتى ءجونى مەن جەرىنىڭ كاداسترلىك نومىرلەرىنەن باستاپ, قۇرىلىس جۇرگىزۋگە رۇقسات بەرگەن ۋاقىتىنا دەيىن تولىعىمەن جازىلعان. قازىر ءاربىر فاميليانى تەكسەرىپ, اكىمدىككە قانداي قاتىسى بار ونى دا تەكسەرىپ باس پروكۋراتۋراعا جىبەرەمىز», دەدى دەپۋتات.

ءماجىلىس دەپۋتاتىنىڭ ايتۋىنشا, سارقان اۋدانى بويىنشا ءتىپتى تۇسىنىكسىز جاعداي بولىپ وتىر.

«سارقان اۋدانى اكىمىنىڭ اقپاراتى نەگىزىندە جانە ازاماتتاردان تۇسكەن ارىز وتىنىشتەرى بويىنشا «مارت-اگرو», «سارقان متس اگرو», «سارقان اگرو» سياقتى ءىرى اۋىل شارۋاشىلىق جەرلەرى بار كاسىپورىندار وزدەرىنىڭ جەرلەرىن يگەرمەي كەلەدى دەگەن ۋاجدەر ءتۇسىپ وتىر. كەيبىر اتالعان كاسىپورىنداردىڭ ارتىندا بۇرىنعى پرەمەر-مينيستر تەرەششەنكونىڭ جەرلەرى دە بار. ال, جەتىسۋ وبلىسى بويىنشا جەر رەسۋرستارىن باسقارۋ دەپارتامەنتىنىڭ اقپاراتى بويىنشا جەر يگەرىلىپ جاتىر. جەر ينسپەكتورلارى زاڭ بۇزىلمادى دەپ وتىر. ال سارقان اۋدانى اكىمى جانە ءبىز كەزدەسكەن حالىق جەر يگەرىلمەي كەلەدى دەپ بايبالام سالىپ جاتىر. بۇل جاعدايدىڭ ءوزى باس پروكۋراتۋرا جانە ورتالىق جەر رەسۋرستارىن باسقارۋ كوميتەتى تاراپىنان تەكسەرىس وتكىزۋدى قاجەت ەتىپ وتىر», دەدى باقىتجان جۇمابەك ۇلى.

دەپۋتاتتىڭ ايتۋىنشا سونىمەن قوسا, «جەر اماناتى» جەر كوميسسياسىنا اۋىل شارۋاشىلىق كاسىپورىندارعا شەتەلدىكتەردىڭ كەلۋى مەن ونىڭ سالدارىنان, اۋىل شارۋاشىلىق ماقساتىنداعى جەرلەردىڭ شەتەلدىك ازاماتتاردىڭ يەلىگىنە ءوتۋ قاۋپى جونىندە ارىز وتىنىشتەر ءتۇسىپ جاتىر.

«ناقتىراق ايتقاندا, اقمولا وبلىسى ساندىقتاۋ اۋدانىندا 2004 جىلى ۇلەسكەرلەردىڭ جەر ۇلەسىنەن تۇراتىن «سحپ پولينا» جشس-ءىنىڭ 79,9% ۇلەسىن قۇرىلتايشى «دوستىق-سينتەز» جشس-ءى رەسەي فەدەراتسياسى ازاماتىنا سىيعا بەرىپ, كەيىن سول شەتەل ازاماتى جارعىلىق كاپيتالداعى قالعان ۇلەسىن 2022-2023 جىلدارى ارالىعىندا 30 ۇلەسكەرلەردەن ساتىپ الۋ ساتۋ شارتىمەن وزىنە جالپى اۋماعى 1000 گەكتار اۋىل شارۋاشىلىق جەردى راسىمدەپ العان دەگەن اقپاراتتى قولىمىزعا ءتۇستى», دەگەن دەپۋتاتتىڭ ايتۋىنشا اتالعان ءۇردىس اقمولا وبلىسىندا عانا ەمەس, سولتۇستىك قازاقستان وبلىستارىندا بولىپ وتىر.

دەپۋتات سونىمەن قاتار الماتى وبلىسىنىڭ قاراساي, تالعار, ىلە اۋداندارىندا اۋىل شارۋاشىلىق ماقساتىنداعى جەرلەردى جالعان قۇجاتتارمەن زاڭسىز ءبولۋ, سەگمەنتاتسيالاۋ ءوربىپ, باقىلاۋسىز كەتىپ قالعانى تۋرالى ايتتى.

«باس پروكۋراتۋرادان: الاكول كولىنىڭ جاعاسىندا جەر رەسۋرستارىن باسقارۋ كوميتەتىمەن يگەرىلمەگەن, پايدالانباي جاتقان  351 جەر ۋچاسكەسىنە تەكسەرۋ شارالارىن اشۋدى, پايدالانباعان جەرلەردى مەملەكەتتىك مەنشىككە قايتارۋدى; سارقان اۋدانىنداعى «مارت-اگرو» جشس-ءنىڭ يگەرىلمەي, پايدالانباي جاتقان 17 مىڭ گەكتار جەرى بويىنشا تەكسەرۋ شارالارىن اشۋدى, پايدالانباعان جەرلەردى مەملەكەتتىك مەنشىككە قايتارۋدى; الماتى وبلىسىنداعى جالعان قۇجاتتار نەگىزىندە زاڭسىز سەگمەنتاتسياعا بولۋگە ۇشىراعان اۋىل شارۋاشىلىق جەرلەر القاپتار بويىنشا تەكسەرۋ شارالارىن اشۋدى, سوتقا دەيىن تەرگەۋ امالدارىن باستاۋدى; اقمولا وبلىسىنداعى «سحپ پولينا» جشس-ندەگى اۋىل شارۋاشىلىق كاسىپورىننىڭ جەر پايدالانۋ قۇقىعىنىڭ شەتەل ازاماتتارىنىڭ راسىمدەلۋ زاڭدىلىعىن تەكسەرۋ جانە زاڭ بۇزۋشىلىق انىقتالسا, جاسالعان مامىلەلەردى زاڭسىز دەپ تانۋدى سۇرايمىن», دەدى دەپۋتات.

قازىرگى ۋاقىتتا جەر رەسۋرستارىن باسقارۋ دەپارتامەنتتەرى تەرەششەنكوعا, ابىقاەۆقا جانە باسقا دا جوعارى لاۋازىمدى تۇلعالارعا تيەسىلى جەر تەلىمدەرىن تەكسەرىپ جاتقانىن ايتقان ب.بازاربەكوۆ دەپۋتاتتىق ساۋالىن قورىتىندىلاي كەلە, تاعى بىرنەشە جايتتى اتاپ ءوتتى.

«الماتى قالالىق سوتىنىڭ ازاماتتىق ىستەر جونىندەگى اپەللياتسيالىق القاسىنىڭ 2025 جىلعى 6 ماۋسىمداعى قاۋلىسىمەن الماتى قالاسىنىڭ مامانداندىرىلعان اۋدانارالىق ەكونوميكالىق سوتىنىڭ قاراساي اۋدانىنىڭ اكىمى مەن 2004 جىلعى جەكەشەلەندىرۋ تۋرالى كەلىسىم (دكپ) شەشىمىن زاڭسىز دەپ تانۋ تۋرالى شەشىمى كۇشىندە قالدىرىلدى. وسىلايشا, «حالىقارالىق كلۋبتار قاۋىمداستىعى» جشس-ىنە تيەسىلى, ياعني گەنەرال نوۆيكوۆتىڭ جەرلەرى مەملەكەت مەنشىگىنە قايتارىلدى!

گەنەرالدى پروكۋراتۋرادان زاڭدى كۇشىنە ەنگەن سوت اكتىسىنىڭ ورىندالۋىن قامتاماسىز ەتۋ اياسىندا «حالىقارالىق كلۋبتار قاۋىمداستىعى» جشس-ءىنىڭ بۇرىنعى 848 گەكتار جەرىنە شەكتەۋ قويۋدى سۇرايمىن.

ۇكىمەتتەن اتالعان جەر تەلىمدەرىن «ىلە-الاتاۋ مەملەكەتتىك ۇلتتىق تابيعي پاركى» قۇرامىنا بەرىپ, تابيعاتتى قورعاۋ ايماعى مارتەبەسىن بەرۋ ماسەلەسىن شەشۋدى وتىنەمىن», دەدى باقىتجان بازاربەك.