فوتو: اشىق دەرەككوز
ءمينيستردىڭ ايتۋىنشا, ەلىمىزدە جي سالاسىن ىلگەرىلەتۋ ناقتى ءۇش ستراتەگيالىق باعىت اياسىندا جۇزەگە اسىرىلىپ جاتىر. ولار: ينستيتۋتسيونالدىق بازانى قۇرۋ, ينفراقۇرىلىمدى قالىپتاستىرۋ جانە ادامي كاپيتالدى دامىتۋ.
«جي ەلىمىزدىڭ تەحنولوگيالىق دامۋىنىڭ باسىم باعىتى. ءبىز وسى باعىتتا ناقتى ستراتەگيالىق كوزقاراس قالىپتاستىرىپ جاتىرمىز. وسى ورايدا ءۇش نەگىزگى باعىتتى اتاپ ءوتۋ كەرەك. ولار: ينستيتۋتسيونالدىق بازانى قۇرۋ, ينفراقۇرىلىمدى قالىپتاستىرۋ مەن ادامي كاپيتالدى دامىتۋ. وسىنىڭ ىشىندە ءار باعىت بويىنشا ءىرى باستامالار ىسكە اسىرىلىپ جاتىر. مەملەكەت ساياساتىنىڭ ارقاسىندا قازاقستان تسيفرلاندىرۋ مەن جي تەحنولوگيالارى سالاسىندا ايماقتا كوشباسشى اتانىپ وتىر», دەدى مينيستر.
ەستەرىڭىزگە سالا كەتەيىك, مينيسترلىكتىڭ جانىنان ءبىر جىل بۇرىن ارنايى جي كوميتەتى قۇرىلىپ, ول بۇگىندە قازاقستاندا جاساندى ينتەللەكت بويىنشا مەملەكەتتىك ساياساتتى ۇيلەستىرەتىن جاۋاپتى ورگان رەتىندە جۇمىس ىستەپ جاتىر.
ءمينيستردىڭ ايتۋىنشا, بىلتىر شىلدە ايىندا 2024–2029 جىلدارعا ارنالعان جاساندى ينتەللەكتتى دامىتۋ تۇجىرىمداماسى بەكىتىلدى. بۇل قۇجاتتا نورماتيۆتىك-قۇقىقتىق رەتتەۋ, تەحنولوگيالىق دامۋ مەن جي ەكوجۇيەسىن قۇرۋ ماسەلەلەرى قامتىلعان.
سونداي-اق مەملەكەت باسشىسىنىڭ تاپسىرماسىمەن جي-دى دامىتۋ جونىندەگى كەڭەس قۇرىلىپ, ونىڭ قۇرامىنا حالىقارالىق ساراپشىلار ەنگەن.
«جاساندى ينتەللەكت تۋرالى زاڭ جوباسى دا ازىرلەنىپ, قازىرگى تاڭدا ءبىرىنشى وقىلىمدا ماقۇلدانعان. قۇجاتتى 2025 جىلدىڭ سوڭىنا دەيىن قابىلداۋ جوسپارلانىپ وتىر. جەلتوقسان ايىندا ۇلتتىق جي پلاتفورماسى دايىندالىپ, ونەركاسىپتىك پايدالانۋعا بەرىلدى. ونىڭ وپەراتورى رەتىندە «ۇلتتىق اقپاراتتىق تەحنولوگيالار» اق بەلگىلەنگەن», دەدى مينيستر.
سونىمەن قاتار جاسلان ماديەۆ جاساندى ينتەللەكت سالاسىنىڭ ورنىقتى دامۋىن قامتاماسىز ەتۋ ءۇشىن قازاقستان الداعى بەس جىل ىشىندە 1 ميلليون مامان دايارلاۋدى جوسپارلاپ وتىرعانىن ايتتى.
وقۋ باعدارلامالارى ءارتۇرلى, اتاپ ايتساق, 500 مىڭ وقۋشى, 300 مىڭ ستۋدەنت, 100 مىڭ مەملەكەتتىك قىزمەتكەر, 80 مىڭ كورپوراتيۆتىك سەكتور مەن ستاندارتتاۋ سالاسىنىڭ وكىلدەرى جانە 30 مىڭ وزگە ساناتتاعى ازاماتتارعا بەيىمدەلگەن.
ء«اربىر توپ ءۇشىن ارنايى وقۋ باعدارلاماسى جاسالعان. جالپى بارلىق شارالار جي جانە يننوۆاتسيالاردى دامىتۋ كوميتەتى ارقىلى جۇزەگە اسىرىلادى», دەدى جاسلان ماديەۆ.
