اۋىل شارۋاشىلىعى ۆيتسە-ءمينيسترى امانعالي بەرداليننىڭ ايتۋىنشا, قازاقستاندا قۇس شارۋاشىلىعى سالاسىندا اسىل تۇقىمدى بازانى دامىتۋ قاجەت.
«بۇگىندە ەلىمىزدە قۇس شارۋاشىلىعىنداعى اسىل تۇقىمدى رەپرودۋكتورلار نەگىزىنەن ءوز قاجەتتىلىكتەرىن وتەۋ ءۇشىن جۇمىس ىستەيدى. وتاندىق قۇس فابريكالارىن تولىقتاي اسىل تۇقىمدى ماتەريالمەن قامتاماسىز ەتۋ ماقساتىندا مەملەكەت تاراپىنان «قۇس شارۋاشىلىعىنداعى ءبىرىنشى جانە ەكىنشى دەڭگەيلى اسىل تۇقىمدى رەپرودۋكتورلاردى قۇرۋ جانە كەڭەيتۋ» باعىتى بويىنشا ينۆەستيتسيالىق سۋبسيديالار قاراستىرىلعان. وسى قولداۋ اياسىندا ءبىز جۇمسالاتىن شىعىنداردىڭ شەكتى مولشەرىن قايتا قاراپ, ولاردى قازىرگى نارىق باعاسىنا سايكەستەندىردىك», دەدى ا.بەردالين.
سونداي-اق, قۇس شارۋاشىلىعىنداعى اسىل تۇقىمدى رەپرودۋكتورلاردى قۇرۋ جانە كەڭەيتۋ بويىنشا ينۆەستيتسيالىق شىعىنداردى وتەۋ ۇلەسى 25%-دان 40%-عا دەيىن ۇلعايتىلعان.
«اسىل تۇقىمدى رەپرودۋكتورلاردىڭ قۇرىلىسىن ىنتالاندىرۋ ماقساتىندا ءبىز سولتۇستىك قازاقستان وبلىسىنىڭ تاجىريبەسىنە سۇيەنە وتىرىپ, جوبالاردى قارجىلاندىرۋ بولىگىندە كرەديتتەۋ ەرەجەلەرىنە ءتيىستى وزگەرىستەر ەنگىزدىك. باعدارلامانىڭ باستى شارتى — 10 جىلعا جىلدىق 2,5% مولشەرلەمەمەن جەڭىلدەتىلگەن نەسيەلەر بەرۋ. بۇل شارالار وسى باعىتقا ينۆەستيتسيا تارتۋعا مۇمكىندىك بەرەدى», دەپ اتاپ ءوتتى ول.
ۆيتسە-ءمينيستردىڭ ايتۋىنشا, مەملەكەت تاراپىنان ەت باعىتىنداعى قۇس شارۋاشىلىعىن سۋبسيديالاۋ جالعاسىپ جاتىر.
«بيىل بۇل ماقساتقا 15,7 ملرد تەڭگە ءبولىندى. ونىڭ ىشىندە تاۋىق ەتىن ءوندىرۋ قۇنىن ارزانداتۋعا — 15,2 ملرد تەڭگە, ال اتا-انا جانە بابا فورماسىنداعى تاۋلىكتىك اسىل تۇقىمدى بالاپانداردى ساتىپ الۋعا — 583,3 ملن تەڭگە باعىتتالدى. ال جۇمىرتقا باعىتىنداعى قۇس شارۋاشىلىعىندا اسىل تۇقىمدى تاۋىقتاردان الىنعان تاۋلىكتىك بالاپانداردى ساتىپ الۋ قۇنىن ارزانداتۋعا شامامەن 457,4 ملن تەڭگە ءبولىندى», دەدى ۆيتسە-مينيستر.
