وقيعا 23 ماۋسىم كۇنى 13:30 ساعات شاماسىندا بولعان. بوكەي ورداسى اۋدانىنىڭ ورتالىعى سايقىن اۋىلىنان 3 شاقىرىمداي جەردە, تەمىرجول وتكەلىندە «شاحمان» جۇك كولىگى پويىزعا جول بەرمەي, جۇك پويىزىنىڭ تەپلوۆوزىنا سوعىلعان.
«جول اپاتىنىڭ ناتيجەسىندە العان جاراقاتى سالدارىنان جۇك كولىگىنىڭ جۇرگىزۋشىسى سول جەردە قازا تاپتى. قر قىلمىستىق كودەكسىنىڭ 344 بابى, 2 بولىگى بويىنشا تەرگەۋ امالدارى باستالدى. جول-كولىك وقيعاسىنىڭ سەبەپ-سالدارى انىقتالىپ جاتىر» دەپ حابارلادى پوليتسيا ءباسپاسوز قىزمەتى.
جۇك پويىزى قۇرامىندا 90-نان اسا تىركەمە بولسا, ونىڭ باسىم بولىگىندە, ياعني 74 تسيستەرنادا سۇيىتىلعان گاز بولعان ەكەن. كولىككە سوعىلعان تەپلوۆوزدان ءورت شىعىپ, جانا باستاعان. ال پويىزدىڭ ۆاگوندارىن تجد كۇشتەرى لوكوموتيۆتەن جەدەل اعىتىپ, تەمىر جولدىڭ قاۋىپسىز ۋچاسكەسىنە الىپ كەتكەن. توتەنشەلىكتەردىڭ كاسىبي شەبەرلىگى, جەدەل قيمىلى ارقاسىندا لوكوموتيۆتىڭ ءورتى تەز ءسوندىرىلىپ, قوزعالىس قاۋىپسىزدىگى قامتاماسىز ەتىلدى. اپات كەزىندە تەمىرجول بويىنا زياندى زات توگىلمەگەن, تابيعاتقا زيان كەلمەگەن.
قولدا بار اقپاراتقا قاراعاندا «شاحمان» اۆتوكولىگىنىڭ رولىندە 1958 جىلى تۋعان ە.ت. ەسىمدى ازامات بولعان ەكەن. ول وقيعا ورنىندا تىلگە كەلمەي قايتىس بولدى. جۇك كولىگى «سۇڭقار» جشس-ىنە تيەسىلى كورىنەدى. ال استراحان وبلىسىنىڭ باسقۇنشاق ستانساسىنا بەت العان تەپلوۆوز رەسەي فەدەراتسياسىنىڭ پريۆولجسك تەمىرجول جۇيەسىنە قارايدى.
ايتا كەتەيىك, باتىس قازاقستان وبلىسىنىڭ جانىبەك, سايقىن جانە شوڭاي تەمىرجول بەكەتتەرىن رەسەيدىڭ جولاۋشىلار جانە جۇك پويىزدارى پايدالانىپ, تاۋلىگىنە بىرنەشە مارتە وتەدى. ولار قازاقستان اۋماعىنا ايالدامايدى.
باتىس قازاقستان وبلىسى
