- پاريجدە جەڭىل اتلەتيكادان «گاۋھار ليگاسىنىڭ» كەزەكتى كەزەڭى مارەگە جەتتى. جارىستا ەلىمىزدەن ءبىر عانا سپورتشى, نادەجدا دۋبوۆيتسكايا ونەر كورسەتتى. جەرلەسىمىز بيىكتىككە سەكىرۋدە 178 سانتيمەترلىك ناتيجەمەن 13-ورىندا قالىپ قويدى. بۇل باسەكەدە اۋستراليالىق نيكولا وليسلاگەرسە الدىنا جان سالمادى. كۇمىس پەن قولا مەدالدى ۋكراينالىق ياروسلاۆا ماگۋچيح (197 سم) پەن جاسىل قۇرلىقتىڭ تاعى ءبىر وكىلى ەلينور پاتتەرسون (197 سم) يەلەندى.
- كەشە حورۆاتيانىڭ زاگرەب قالاسىندا ۇستەل تەننيسىنەن «WTT Contender Zagreb» اتتى ءىرى حالىقارالىق ءتۋرنيرى باستالدى. وسى جارىسقا الەمدىك رەيتينگتە جوعارى ورىندا تۇرعان توموكازي حاريموتو (جاپونيا, ITTF رەيتينگىندە 4-ورىن), سيان پەن (قىتاي, 9), داركو يورگيچ (سلوۆەنيا, 10), بەنەديكت دۋدا (گەرمانيا, 11), ان دجەحيون (وڭتۇستىك كورەيا, 17), وح دجۋنسۋنگ (وڭتۇستىك كورەيا, 19) سىندى ساڭلاقتار قاتىسادى. قازاق ەلى نامىسىن داستان كەنجەعۇلوۆ, ايدوس كەنجەعۇلوۆ, سانجار جۇبانوۆ قورعايدى.
- لوزاننادا حالىقارالىق وليمپيادالىق كوميتەتى (حوك) پرەزيدەنتىنىڭ وكىلەتتىگىن تابىستاۋ ءراسىمى ءوتتى. 2013 جىلدان بەرى وسى ۇيىمدى باسقارىپ كەلگەن توماس باح ءوز وكىلەتتىگىن كيرستي كوۆەنتريگە رەسمي تۇردە تاپسىردى. حوك-ءتىڭ جاڭا باسشىسى 1983 جىلى زيمبابۆەدە دۇنيەگە كەلدى. جۇزۋدەن وليمپيا ويىندارىندا 7 (2 التىن+4 كۇمىس+1 قولا), الەم چەمپيوناتتارىندا 8 (3+5+0) رەت جەڭىس تۇعىرىنا كوتەرىلدى. مانسابىن اياقتاعاننان كەيىن كوۆەنتري حانىم زيمبابۆەنىڭ جاستار, سپورت, ونەر جانە دەمالىس ءمينيسترى, حوك-ءتىڭ اتقارۋ كوميتەتىنىڭ مۇشەسى, ۇيىمنىڭ سپورتشىلار كوميسسياسىنىڭ توراعاسى قىزمەتتەرىن اتقاردى.
- ۇلىبريتانيادا «ۋيمبلدوننىڭ» ىرىكتەۋ سايىستارى باستالدى. بۇل جارىستا ەلىمىزدىڭ ءتورت تەننيسشىسى باق سىناپ, ۇشەۋى كەلەسى كەزەڭگە ءوتتى. تۇساۋكەسەر كەزدەسۋلەرىندە تيموفەي سكاتوۆ يتاليالىق ستەفانو ناپوليتانونى (اتر№684), ميحايل كۋكۋشكين برازيليالىق تياگو ۋايلدى (№120), بەيبىت جۇقاەۆ ۋكراينالىق ۆيتالي ساچكونى (№213) ۇتتى. دميتري پوپكو ارگەنتينالىق رومان اندرەس بۋررۋچادان (№133) جەڭىلدى. ال الەمدىك رەيتينگتە توپ-100-دىكتىڭ قاتارىنداعى الەكساندر بۋبليك پەن الەكساندر شەۆچەنكو, ەلەنا رىباكينا مەن يۋليا پۋتينتسەۆا ءتۋرنيردىڭ نەگىزگى بولىگىنە بىردەن جولداما الدى.
- تەننيسشىلەردىڭ الەمدىك رەيتينگى قايتا جاڭارتىلدى. گاللەدەگى دودادا نەبىر مىقتى قارسىلاستى قاپى قالدىرىپ, باس جۇلدەنى ولجالاعان الەكساندر بۋبليك بىردەن 15 ساتىعا جوعارىلاپ, قازىرگى كەزدە 30-ورىندا تۇر. الەكساندر شەۆچەنكو 97-ورنىن ساقتاپ قالدى. اتر تىزىمىندە يتاليالىق ياننيك سيننەر كوش باستاپ تۇرسا, ونى يسپانيالىق كارلوس الكاراس, گەرمانيالىق الەكساندر زۆەرەۆ, ۇلىبريتانيالىق دجەك درەيپەر, سەربيالىق نوۆاك دجوكوۆيچ وكشەلەپ كەلەدى.
ايەلدەر اراسىندا بەلارۋستىك ارينا سوبولەنكو الدىنا جان سالار ەمەس. ودان كەيىنگى ورىندارعا اقش-تىڭ قوس ۇزدىگى – كوكو گاۋفف پەن دجەسسيكا پەگۋلا, قىتايلىق چجەن تسينۆەن, رەسەيلىك ميررا اندرەەۆا تۇراقتادى. قازاقستاننىڭ ءبىرىنشى راكەتكاسى ەلەنا رىباكينا 11-ساتىدا, يۋليا پۋتينتسەۆا 33-ورىندا تۇر. يسپانياداعى تۋرنيردە توپ جارعاننان كەيىن زارينا دياس WTA-داعى جاعدايىن ءبىراز جاقسارتىپ الدى. جەرلەسىمىز وسى اپتادا
28 ساتىعا جوعارىلاپ, بۇل كۇندەرى 246-ورىندى يەلەنىپ وتىر.
