ورال اۋەجايىنداعى جوندەۋ جۇمىستارى ساپاسىز جۇرگىزىلگەن

ورال. 15 اقپان. ورال اۋەجاينىنىڭ ۇشۋ-قونۋ جولاعى جونىندەگى تۇيىتكىلدەر ءالى شەشىلمەي كەلەدى. بۇل تۋرالى egemen.kz ءتىلشىسى حابارلادى. وسىدان ءتورت ايعا جۋىق ۋاقىت بۇرىن ورال اۋەجايىنىڭ ۇشۋ-قونۋ جولاعىنا جۇرگىزىلگەن كۇردەلى جوندەۋدەن كەيىن مۇندا ۇشۋ كەستەسى قايتادان قالپىنا كەلتىرىلگەن ەدى. الايدا, وسى قىسقا ۋاقىت ارالىعىندا جولاقتا جارىقتار مەن جىرىقتاردىڭ جانە ويىقتاردىڭ پايدا بولعانى انىقتالىپ وتىر. اۋەجايدىڭ باس ينجەنەرى شاميل حيسمۋتدينوۆ بۇل جاعىمسىز كورىنىستى جوندەۋدىڭ ساپاسىز جۇرگىزىلگەنىمەن بايلانىستىرادى. وسى ماسەلەگە بايلانىستى ورالعا ينۆەستيتسيا جانە دامۋ مينيستىرلىگىنە قاراستى ازاماتتىق اۆياتسيا كوميتەتى مەن «كازايروپروم» اق عىلىمي جوبالاۋ ينستيتۋتىنىڭ ماماندارىنان قۇرالعان كوميسسيا كەلگەن بولاتىن. سولاردىڭ ءبىرى, اۋەجاي ءبولىمىنىڭ باستىعى تاتيانا احتياموۆا ۇشۋ-قونۋ جولاعى قاناعاتتانارلىق جاعدايدا, سوندىقتان ونى پايدالانا بەرۋگە بولادى دەپ ەسەپتەيدى. «پايدا بولعان قۋىستار ۇشاقتىڭ قاۋىپسىزدىگىنە كەدەرگى كەلتىرە المايدى», – دەيدى ول. سونداي-اق مەردىگەرلەر مەن تەحنيكالىق قاداعالاۋشىلاردىڭ مالىمدەۋىنشە, اياعىنا دەيىن جەتكىزىلمەي قالعان جىكتەردى قالپىنا كەلتىرۋ اسا قيىن شارۋا ەمەس. ءتىپتى, ونى قازىرگى اقپاننىڭ ايازدى كۇندەرىنىڭ وزىندە قالپىنا كەلتىرۋگە بولادى. تەك جارىقتاردى جابۋ ءۇشىن ارناۋلى قوسپانى پايدالانۋ كەرەك ەكەن. ولاردىڭ ايتۋىنشا, ءتيىستى نورماتيۆتەر شەڭبەرىندەگى جۇمىستاردى اتقارۋ كەزىندە اۋەجايدى جابۋدىڭ قاجەتى جوق. ونى رەيستەردىڭ اراسىنداعى ۋاقىت ىشىندە اياقتاۋعا بولادى. قىسقاسى, اتالعان كوميسسيا ورال اۋەجايىنىڭ ۇشۋ-قونۋ جولاعىندا پايدا بولعان تەسىكتەر مەن قۋىستاردى بۇعان دەيىن كۇردەلى جوندەۋ جۇمىستارىن جۇرگىزگەن «ك-دورستروي» اق مەردىگەرلىك ۇيىمىنىڭ ەسەبىنەن قالپىنا كەلتىرۋ جونىندە شەشىم الدى. بۇل ءۇشىن اۋەجايدى جابۋدىڭ نەمەسە رەيستەردى شەكتەۋدىڭ قاجەتتىلىگى جوق ەكەندىگى جونىندە ۇيعارىم جاسالدى. بۇل ارادا ءتيىستى زاڭدىلىقتار بويىنشا سوڭعى جاۋاپكەرىشىلىكتى اۋەجاي جەتەكشىلەرى ارقالايتىنىن ايتا كەتكەن ءجون. تەمىر قۇسايىن. دەرەك: egemen.kz. سۋرەت: forbes.kz.