- ۆەتنامدا اياقتالعان جاستار اراسىنداعى ازيا چەمپيوناتىندا ەلىمىزدىڭ بالۋاندارى تابىستى ونەر كورسەتتى. گرەك-ريم كۇرەسىنەن وتكەن جارىستىڭ جالپىكوماندالىق ەسەبىندە جەرلەستەرىمىز كوش باستاسا, ەركىن كۇرەس شەبەرلەرى ءۇندىستاننان قالىپ قويىپ, ەكىنشى ورىندى يەلەندى. ايەلدەر قۇراماسى دودانى ءۇشىنشى ورىنمەن قورىتىندىلادى. بۇل باسەكەدە ءۇندى, موڭعول قىزدارى الدىمىزدى وراپ كەتتى.
- سوفيادا وتكەن جاسوسپىرىمدەر اراسىنداعى الەم بىرىنشىلىگىندە اقمارال ەرەكەشەۆا ءۇش رەت جەڭىس تۇعىرىنا كوتەرىلدى. ول «دوپ» پەن «تاسپا» جاتتىعۋلارىندا التىننان القا تاقسا, «ۇرشىقتا» كۇمىس مەدالدى موينىنا ءىلدى.
- تاشكەنتتە وتكەن گەننادي ارزۋمانوۆتىڭ مەموريالىندا 200 مەترگە جۇگىرگەن ۆيتالي زەمس باس جۇلدەنى ولجالادى. قاراعاندىلىق سپرينتەر بۇل قاشىقتىقتى 20.88 سەكۋندتا جۇگىرىپ ءوتتى. ەكىنشى, ءۇشىنشى ورىنداردى تۇرىك باتۋحان التىنتاس پەن وزبەك ءۇمىد نابيەۆ يەلەندى.
- تايلاندتا جاعاجاي ۆولەيبولىنان جاستار اراسىنداعى ازيا بىرىنشىلىگى (U-21) اياقتالدى. بۇل جارىستا كليم ريۋحوۆ پەن ۆلاديسلاۆ ماستيحين باس جۇلدەنى يەلەندى. ەلىمىزدىڭ جۇبى فينالدا قىتايلىق قارسىلاستارىن 2:0 (21:19, 21:16) ەسەبىمەن ۇتتى. وسى جەڭىسىنىڭ ارقاسىندا ءبىزدىڭ جىگىتتەر قازان ايىندا مەكسيكادا جالاۋى جەلبىرەيتىن الەم چەمپيوناتىنىڭ جولداماسىنا يە بولدى.
- تاشكەنتتە سپورتتىق گيمناستيكادان «Challenge Cup» جارىسىنىڭ العاشقى كۇنى ەلىمىزدىڭ قۇراماسى ءۇش جۇلدە ەنشىلەدى. ەرلەردىڭ «قوسسىرىعىندا» ءىلياس ءازىزوۆ كۇمىس, دميتري پاتانين قولا مەدال يەلەندى. جەرلەستەرىمىز وزبەكستاندىق احرورحون تەميرحونوۆتان قالىپ قويدى. «بورەنەدە» كوركەم ەربوسىنقىزى ءۇشىنشى ورىنعا يە بولدى.
- گەرمانيانىڭ گاللە قالاسىندا وتكەن ATP 500 سەرياسىنداعى تۋرنيردە الەكساندر بۋبليك توپ جاردى. باستاپقى باسەكەلەرىندە بارلىق قارسىلاسىنان باسىم تۇسكەن ول جارتىلاي فينالدا رەسەيلىك كارەن حاچانوۆتى قاپى قالدىردى. فينالدا بۋبليكتى كورشى ەلدىڭ تاعى ءبىر اتاقتى تەننيسشىسى دانيل مەدۆەدەۆ كۇتىپ تۇردى. وتانداسىمىز ونى دا ۇتتى – 6:3, 7:6. سونداي-اق وسى جارىستىڭ العاشقى اينالىمىندا الەكساندردىڭ الەمنىڭ ءبىرىنشى راكەتكاسى, يتاليالىق ياننيس سيننەرگە سان سوقتىرعانىن دا ايتا كەتكەن ابزال. زارينا دياس يسپانياداعى ITF W35 دوداسىندا دارا شىقتى. شەشۋشى تۇستا ول يتاليالىق ديلەتتا چەرۋبينيدى ۇتتى – 6:1, 6:7, 6:1.
- فۋتبولدان ەلىمىزدىڭ پرەمەر-ليگاسىنىڭ 13-تۋرىندا مىناداي ناتيجە تىركەلدى: «جەڭىس» – «اتىراۋ» 2:0, «قايرات» – «قىزىلجار» 1:0, «توبىل» – «جەتىسۋ» 2:1, «ەلىماي» – «تۇران» 2:1, «وقجەتپەس» – «ورداباسى» 0:1, «اقتوبە» – «استانا» 0:1, «قايسار» – « ۇلىتاۋ» 1:1. جارىس كەستەسىندە «استانا» ءبىرىنشى ورىندا كەلەدى. ەلوردالىق كلۋب 33 ۇپاي ولجالاپ وتىر. ونى وكشەلەپ كەلە جاتقان «قايراتتىڭ» باستى باسەكەلەسىنەن ءۇش ۇپايى كەم. كوش سوڭىنداعى «اتىراۋدىڭ» قورجىنىندا نەبارى 4 ۇپاي.
