ابايتانۋ عىلىمىندا زەينەلعابيدەن امىرە ۇلىنىڭ ەسىمىن ايرىقشا ايتۋعا ابدەن بولادى. فيلولوگيا عىلىمدارىنىڭ دوكتورى, پروفەسسور مەكەمتاس مىرزاحمەت ۇلى وعان «ۇلتتىق وي-ساناسى ەرتە ويانعان, سول جولدا قولىنان كەلەر ارەكەتتەن ايانباعان, اباي مۇراسىن باسپاسوزدە ناسيحاتتاپ, تاتار حالقىنا تانىتۋعا ارناعان تالپىنۋشىلاردىڭ ءبىرى» دەپ باعا بەرگەن. ياعني زەينەلعابيدەن امىرە ۇلى – اعارتۋشى, اباي مۇراسىن باسپا بەتىنە العاش جاريالاعان قايراتكەر. «ناسيحات قازاقيادا» قازاق حالقىنىڭ تۇرمىس-تىرشىلىگىنە قاتىستى وزەكتى ماسەلەلەر قاراستىرىلىپ, اقىن اباي قۇنانباي ۇلى مەن جەرلەسىمىز سادۋاقاس شورمانوۆتىڭ ولەڭدەرى العاش جاريالانعان.
1909 جىلى ۋفا قالاسىندا جارىق كورگەن ەڭبەك ەنتسيكلوپەديالىق سيپاتقا يە, مۇندا سول كەزەڭدەگى قازاق حالقى ءومىرىنىڭ قوعامدىق-ساياسي مەن الەۋمەتتىك قۇرىلىسىنىڭ ماسەلەلەرى ايقىن اشىپ كورسەتىلگەن. سونداي-اق ول اباي شىعارماشىلىعىنىڭ ەرەكشە ماڭىزى بارى تۋرالى العاشقىلاردىڭ ءبىرى بولىپ مالىمدەيدى.
بۇقار جىراۋ اتىنداعى ادەبيەت جانە ونەر مۋزەيىنىڭ قىزمەتكەرى ابزال رىمبەكتىڭ ايتۋىنشا, زەينەلعابيدەن ءال-ءجاۋھاريدىڭ اتالعان كىتابى اراب قارپىندە, توتە نۇسقادا جازىلعان. تاريحي ەڭبەكتىڭ تۇپنۇسقاسى ەلىمىزدە ساناۋلى. ال پاۆلوداردا تابىلعان كىتاپتىڭ ون شاقتى بەتى عانا ساقتالعان. اراب قاربىندەگى كونە پاراقتار جەرگىلىكتى بيجان مەشىتىندەگى قۇران كىتاپتارى اراسىنان شىققان.
«ناسيحات قازاقيادا»: «بالانى 11 جاستان كەيىن عانا ورىس تىلىندە وقىتۋ» كەرەك دەگەن ماسەلە ايتىلادى. قازىرگى ونەرتابىسى مەن عىلىمى دامىعان جاپون حالقى بالالارىنا شەت تىلدەرىن ۇيرەتۋدى تەك 12 جاستان كەيىن عانا قولعا الاتىندىعى ءمالىم. اعارتۋشى بۇل ماسەلەنى ەرتەرەك ءبىلىپ, قازاق قوعامىنا ءسىڭدىرۋدى ماقسات ەتسە كەرەك.
اتاپ وتەرلىگى, بۇعان دەيىن وتاندىق عالىمدار شىعارمانى كيريلليتساعا ءتۇسىرىپ, كىتاپ ەتىپ باستىرعان.
پاۆلودار وبلىسى
