«تۋعان جەرگە تۋىڭدى تىك» ينۆەستيتسيالىق فورۋمى قارساڭىندا قالانىڭ اۆتوبۋس پاركى سۋ جاڭا اۆتوبۋستارمەن تولىقتى. جاڭادان الىنعان 44 اۆتوبۋس №24, №4, №35 جانە №12 باعىتتاردا جولاۋشى تاسىمالداۋعا ماۋسىم ايىنىڭ سوڭىندا كىرىسەدى. قازىر قالا اۋماعىندا 42 مارشرۋت جۇمىس ىستەيدى. وعان 331 اۆتوبۋس تارتىلعان. وبلىس ورتالىعىندا 5 تاسىمالداۋشى جولاۋشىلارعا قىزمەت كورسەتەدى, دەگەنمەن سەمەيدىڭ اۆتوبۋس پاركى كەيىنگى 6 جىلدا جاڭارماعان, جاڭا اۆتوبۋستار الىنباعان.
وبلىس اكىمدىگىنىڭ قولداۋىمەن «اۆتو ترانس سەمەي» جشس سەمەيدە جاسالعان 44 جاڭا اۆتوبۋستى ساتىپ الىپ, قالانىڭ كولىك جۇيەسىن جاڭارتتى. جاڭا كولىكتەر قالا تۇرعىندارىنا جايلى سالقىنداتۋ جۇيەسىمەن جابدىقتالعان. ەندى سەمەي جۇرتى العاش رەت سالقىنداتقىشى بار اۆتوبۋستارمەن جۇرەتىن بولادى.
ايماق باسشىسى الدا قالا اۆتوبۋسى كەزەڭ-كەزەڭىمەن جاڭارتىلىپ, جۇمىستاردىڭ جۇيەلى جۇرەتىنى نازاردا بولاتىنىن ايتتى.
– وسىدان ءبىر اي بۇرىن وبلىستىڭ دامۋ جوسپارىن تانىستىرعان كەزدە قالانىڭ اۆتوبۋس پاركىن جاڭارتامىز دەپ ۋادە بەرگەنبىز. مىنە, ەندى 44 اۆتوبۋستى قالاعا جىبەرگەلى تۇرمىز. ونىڭ 30-ى ۇلكەن, 14-ءى شاعىن اۆتوبۋستار. ءبارى دە ءوزىمىزدىڭ سەمەيدە شىعارىلعان. ساپالى, باسەكەگە ساي اۆتوبۋستار. بۇل اۆتوبۋستارعا باسقا وبلىستار دا قىزىعۋشىلىق تانىتىپ, سۇرانىسقا يە بولىپ وتىر. بىراق اۆتوبۋس شىعاراتىن زاۋىتتىڭ باسشىلىعى ءبىرىنشى بولىپ بىزگە وسىنداي مۇمكىندىك تۋعىزدى, – دەدى وبلىس اكىمى بەرىك ءۋالي.
ترانسپورتتىڭ تاعى ءبىر ەرەكشەلىگى, ابايدىڭ 180 جىلدىعىنا وراي, اۆتوبۋستاردىڭ سىرتى ۇلى اقىن بەينەسى بار لوگوتيپپەن بەزەندىرىلگەن. اكىمنىڭ ايتۋىنشا, جىل سوڭىنا دەيىن قالاداعى جاڭا اۆتوبۋستىڭ سانى 70-كە جەتىپ, كەلەر جىلعا تاعى دا 50 اۆتوبۋس حالىق يگىلىنە جاراماق.
اباي وبلىسى
