فوتو:جي
اۋىلداعى قوعامدىق ءتارتىپتىڭ ساقتالۋىنا جەرگىلىكتى اقساقالدار كەڭەسى بەلسەندى ۇلەس قوسىپ كەلەدى. اتاپ ايتقاندا, اۋىل اقساقالى ەركەباي بايجىگىتوۆ كوپ جىلدان بەرى قوعامدىق ماسەلەلەرگە بەلسەنە ارالاسىپ, جاستارعا ۇلگى كورسەتىپ كەلەدى. ول ەڭبەك جولىن وسى اۋىلدا باستاپ, ءتۇرلى سالادا جۇمىس ىستەگەن تاجىريبەلى ازامات. بۇگىندە قوعامدىق سانا مەن قۇقىقتىق مادەنيەتتى قالىپتاستىرۋعا ءوز ۇلەسىن قوسىپ وتىر.
قوعامدىق ءتارتىپتى قامتاماسىز ەتۋگە بەلسەندى اتسالىسىپ, كوپكە ۇلگى كورسەتكەنى ءۇشىن ەركەباي بايجىگىتوۆكە رەسمي تۇردە العىس جاريالانعان. بۇل ماراپات – اۋىل قاۋىمداستىعىنىڭ ۇلكەن قۇرمەتىنىڭ جانە ازاماتتىق بەلسەندىلىكتىڭ دالەلى.
ءومىر بويى اۋىلدا ەڭبەك ەتكەن ەركەباي بايجىگىتوۆ اۆتومەحانيك, جۇرگىزۋشى, بريگادير, كەيىننەن «شۋيسكوە ءححى» جشس-ءنىڭ مال شارۋاشىلىعى بولىمىندە ۇزاق جىلدار ەڭبەك ەتكەن. بۇگىندە ول اۋىل اقساقالدار كەڭەسىنىڭ توراعاسى رەتىندە ەل ىشىندەگى ءتارتىپ پەن بىرلىكتىڭ ساقتالۋىنا وزىندىك ۇلەسىن قوسىپ كەلەدى.
«مەن بۇل اۋىلدا تۋىپ-ءوستىم, ءومىرىم وسى جەرمەن تىعىز بايلانىستى. اۋىلدىڭ تىنىشتىعى – ءاربىر تۇرعىننىڭ جاۋاپكەرشىلىگىنە بايلانىستى. ءار ۇيدە سىيلاستىق بولسا, قوعامدا دا ءتارتىپ بولادى. زاڭدى قۇرمەتتەپ, ەلگە ادال ەڭبەك ەتۋ – ءار ازاماتتىڭ بورىشى», دەيدى ەركەباي اقساقال.
شۋيسكوە اۋىلى بۇگىندە وڭىردەگى قارقىندى دامىپ كەلە جاتقان ەلدى مەكەندەردىڭ ءبىرى. اۋىل شارۋاشىلىعى مەن مال شارۋاشىلىعى قاتار دامىپ, تۇرعىندار ءوز ەڭبەگىمەن كۇن كورىپ وتىر. بىراق بۇل جەتىستىك تەك ەكونوميكالىق دامۋ ارقىلى ەمەس, تۇرعىنداردىڭ قۇقىقتىق ساناسىنىڭ جوعارى بولۋىمەن دە بايلانىستى. سەبەبى بۇل باعىتتا اۋىل تۇرعىندارى مەن ۋچاسكەلىك پوليتسيا ينسپەكتورى باگدات ۋتەۋوۆ اراسىندا تىعىز ارىپتەستىك ورناعان.
مۇندا قۇقىق بۇزۋشىلىقتىڭ الدىن الۋ تەك پوليتسيانىڭ مىندەتى ەمەس. ءاربىر ازامات بۇل ىسكە ءوز ۇلەسىن قوسىپ, بەيبىت ءومىردىڭ ساقتالۋىنا جاۋاپتى ەكەنىن جاقسى تۇسىنەدى. شۋيسكوە اۋىلى قوعامدىق ءتارتىپتى ساقتاۋ ورتاق جاۋاپكەرشىلىك ەكەنىن ىسپەن دالەلدەگەن ايماقتاردىڭ ءبىرى.
