فوتو: جوعارعى سوت
پرەزيدەنت «زاڭ جانە ءتارتىپ» قاعيداتىن قوعامنىڭ ىشكى مادەنيەتىمەن تىعىز بايلانىستىرا وتىرىپ, ونى ەل دامۋىنىڭ نەگىزگى ىرگەتاسى رەتىندە اتادى. ول ازاماتتاردىڭ قۇقىققا قۇرمەتپەن قاراۋى – ەلدەگى تۇراقتىلىق پەن ءتارتىپتىڭ باستى شارتى ەكەنىن اتاپ ءوتتى.
«زاڭ جانە ءتارتىپ» قاعيداتى جاۋاپكەرشىلىكتى سەزىنۋ مادەنيەتىمەن تىعىز بايلانىستى. ەلىمىزدە «تازا قازاقستان» جالپىۇلتتىق ناۋقانى ءجۇرىپ جاتقانىن بىلەسىزدەر. بۇل ماڭىزدى باستاما حالىقتىڭ كەڭ قولداۋىنا يە بولدى. «تازا قازاقستان» – وزىق ويلى قوعام قۇرۋعا ارنالعان يدەولوگيالىق تۇعىرنامانىڭ اجىراماس بولىگى. بۇل – تەك قورشاعان ورتانىڭ تازالىعىن ەمەس, وي مەن سانا تازالىعىن ساقتاۋ دەگەن ءسوز. سەبەبى قوعامدىق ادەپ پەن زاڭعا دەگەن قۇرمەت اينالاداعى تازالىقتان باستالادى», دەدى مەملەكەت باسشىسى.
مەملەكەت باسشىسى حالىقتىڭ قۇقىقتىق ساۋاتتىلىعىن ارتتىرۋ ماقساتىندا ەلىمىزدە العاش رەت «زاڭ جانە ءتارتىپ» اپتالىعى جاريالاناتىنىن مالىمدەدى. بۇل اپتا قۇقىقتىق مادەنيەتتى نىعايتۋعا جانە قۇقىق قورعاۋ ورگاندارىنىڭ بەدەلىن كوتەرۋگە باعىتتالعان.
«جالپى, حالىقتىڭ قۇقىقتىق مادەنيەتىن كوتەرۋگە جان-جاقتى قاراعان ءجون. بۇگىن مەن «زاڭ جانە ءتارتىپ» اپتالىعىن جاريالاۋدى ۇيعاردىم. وسى اپتا قوعامدا زاڭ مەن ءتارتىپتى ناسيحاتتاۋ اپتاسى بولماق. الداعى جەتى كۇن قۇقىقتىق مادەنيەتتى نىعايتۋعا, سونداي-اق قۇقىق قورعاۋ ورگاندارىنىڭ ابىروي-بەدەلىن ارتتىرۋعا ارنالۋى كەرەك. الايدا, بۇل ءبىر رەتتىك اكتسيا ەمەس. «زاڭ جانە ءتارتىپ» اپتالىعىنا ازاماتتاردىڭ قۇقىقتىق سانا-سەزىمىن كوتەرەتىن ماڭىزدى, جۇيەلى شارا رەتىندە قاراعان ءجون», دەدى پرەزيدەنت.
سونىمەن قاتار پرەزيدەنت قۇقىق بۇزۋشىلىقپەن كۇرەستە تەك سالدارمەن ەمەس, سەبەپپەن دە جۇمىس ىستەۋ كەرەكتىگىن اتاپ ءوتتى. ول قۇقىققا قايشى ارەكەتتەردىڭ الدىن الۋ جۇيەسىن كۇشەيتۋ قاجەتتىگىن ناقتى مىسالدارمەن ءتۇسىندىردى.
«ەكىنشى. قۇقىق بۇزۋشىلىقتىڭ الدىن الۋ جۇمىستارىن كۇشەيتۋ قاجەت. قىلمىس وعان قولايلى جاعداي جاساعان جەردە ءورشيدى. قىلمىستىڭ جانە زاڭعا قايشى ارەكەتتەردىڭ سالدارىمەن عانا كۇرەسۋگە بولمايدى. قىلمىسقا تۇرتكى بولاتىن سەبەپتەردى الدىن الا انىقتاپ, جويىپ وتىرۋ قاجەت. مەنىڭ تاپسىرماممەن «قۇقىق بۇزۋشىلىقتىڭ الدىن الۋ تۋرالى» زاڭ جوباسى ازىرلەنىپ, ءماجىلىستىڭ قاراۋىنا بەرىلدى. جاڭا زاڭ اتالعان سالاداعى مەملەكەتتىك ساياساتتى بىرىزدەندىرىپ, پروفيلاكتيكالىق شارالارمەن قامتىلاتىن تۇلعالاردىڭ ساناتىن كەڭەيتەدى. مۇنداي زاڭ ءسوزسىز كەرەك. سوندىقتان مەيلىنشە تەز قابىلداۋ قاجەت. پارلامەنت دەپۋتاتتارىنان زاڭ جوباسىن جىلدىڭ سوڭىنا دەيىن قاراپ, قابىلداۋدى سۇرايمىن», دەدى مەملەكەت باسشىسى.
قۇقىق بۇزۋشىلىقتىڭ الدىن الۋدا ۇيىمدىق ءتاسىل دە قايتا قارالۋى قاجەت. پرەزيدەنت ىشكى ىستەر مينيسترلىگى جانىنان پروفيلاكتيكالىق شارالاردى ۇيلەستىرەتىن دەربەس بولىمشە قۇرۋدى ۇسىندى.
«زاڭنامالىق وزگەرىستەرمەن قاتار, ۇيىمدىق قۇرىلىمدى دا جاڭعىرتۋ قاجەت. ىشكى ىستەر مينيسترلىگى جۇيەسىندە پروفيلاكتيكالىق جۇمىستاردى ۇيلەستىرەتىن دەربەس بولىمشە قۇراتىن ۋاقىت كەلدى. قۇقىق قورعاۋ ورگاندارىنىڭ تيىمدىلىگىن باعالاۋ جۇيەسىنە دە وزگەرىس قاجەت. وندا قۇقىق بۇزۋشىلىقتى ەسكەرتۋ باعىتىنداعى جۇمىس ناتيجەسى ەسەپكە الىنۋعا ءتيىس. قىلمىسقا كوبىنەسە تۇرمىسى ناشار وتباسىدان شىققان ادامدار بارادى. الدىن الۋ شارالارىن جۇزەگە اسىرعاندا ءدال وسى ساناتقا ايرىقشا نازار اۋدارعان ءجون. بۇل رەتتە الەۋمەتتىك قورعاۋ ورگاندارى مەن جەرگىلىكتى بيلىك ماڭىزدى ءرول اتقارادى», دەدى قاسىم-جومارت توقاەۆ.
