اقپارات سالاسىنىڭ مايتالماندارى جوعارى دەڭگەيدە ويىن ورنەگىن كورسەتىپ, مەرەكەنى اسەرلى اتاپ ءوتتى. ەلگە ەسىمى ەلەۋلى ەل اعالارى – كورنەكتى جازۋشىلار قويشىعارا سالعارا ۇلى مەن تولەن ابدىك, Aقسەلەۋ اعانىڭ رۋحاني ىنىلەرى- مينيستر عاني بەيسەمباەۆ پەن سەناتور نۇرتورە ءجۇسىپ باستاعان زيالى قاۋىم وكىلدەرى تۇعىرلى تۇلعا تۋرالى ەستەلىكتەرىمەن ءبولىستى.
«بۇگىن مەن ءدال وسى جەرگە مينيستر رەتىندە ەمەس, اقسەلەۋ سلان ۇلى سەيدىمبەكتىڭ شاكىرتى ءارى رۋحاني ءىنىسى رەتىندە كەلىپ وتىرمىن.وسىدان بەس جىل بۇرىن وسى جارىسقا كەلگەندە كورنەكتى اقىنىمىز نەسىپبەك ايت ۇلى قولىنا كي ۇستاپ, تاستاياق ويناپ ءجۇر ەدى. كورگەن بويدا قۇشاعىنا الىپ, «عاني, اينالايىن, امان بول.كورگەنىمە قۋانىشتىمىن!» دەگەنى ءالى كۇنگە ەسىمدە. ول كىسى دە ومىردەن ءوتىپ كەتتى, قازىر اقسەلەۋ ۇستازىممەن بىرگە سول اعامىزدى دا ەسكە الىپ وتىرمىن.
ءبىز جاقسىلارىمىزدى وسىلاي ەسكە الىپ, ىزدەپ جۇرەتىن بولساق, ول دا اتا-بابالاردان قالعان ۇلتتىڭ ۇلكەن ءبىر قۇندىلىعى دەپ بىلەمىن.سوندىقتان ومىردەن وتكەن اعالارىمىزدى ىزدەپ جۇرگەنگە نە جەتسىن؟! مەن دە بۇگىن اقسەلەۋ اعامدى ىزدەپ كەلىپ وتىرمىن, ءوزى ومىردەن وتسە دە وسىنداي شارانىڭ جالعاسىن تاۋىپ جاتقانى قۋانتادى.اعامەن العاش تانىسقاندا مەن 27-28 جاستا بولاتىنمىن.باسىمدى سيپاپ, كوكىرەكتەن قاقپادى, قايتا اعالارىمىزدىڭ كەرەمەت قاسيەتى ەشقانداي اتاعى جوق, بيىككە جەتپەگەن جاستاردى قاسىنا ەرتىپ الىپ جۇرە بەرەتىن. سول رۋحتاندىرۋ وسىنداي دارەجەگە جەتۋىمە ۇلەس قوسقان شىعار دەپ ويلايمىن.مەن دە سول اعالار سياقتى جاستاردىڭ ماڭدايىنان ءسۇيىپ, ارقاسىنان قاققىم كەلىپ تۇرادى.بۇل اعادان كورگەن ءتالىم مەن تاعىلىم دەر ەدىم.
سونداي-اق كۇنى كەشە عانا ەۋرازيا ۇلتتىق ۋنيۆەرسيتەتىنىڭ رەكتورى ەرلان باتتاش ۇلىمەن اقىلداسىپ, وقۋ-اعارتۋ مينيسترلىگىمەن بىرلەسە وتىرىپ, وسى بيىل اقاڭنىڭ ارتىندا قالدىرعان مۇرالارىن زەرتتەپ-زەردەلەۋگە بايلانىستى جۇمىستاردى باستاپ كەتتىك. اقاڭنىڭ اندەرى مەن شىعارمالارى, جۋرناليستيكاداعى ەڭبەكتەرىنە عىلىمي زەرتتەۋ جۇمىستارىن جۇرگىزىپ, رەسپۋبليكالىق بايقاۋ-كونكۋرستار وتكىزۋدى جوسپارلاپ وتىرمىز.رۋحى شات بولسىن, اعامىزدىڭ»,-دەپ ءتۇيدى ءسوزىن مينيستر.
نۇرتورە ءجۇسىپ قر پارلامەنتى سەناتىنىڭ دەپۋتاتى:
- «عالىمنىڭ حاتى ولمەيدى, جاقسىنىڭ اتى ولمەيدى» دەگەن قازاقتا ماقال بار, سونى ايعاقتايتىن تۋرنيرگە اينالدى. بۇل جۋرناليستەردىڭ وي-پىكىر الاڭىنا, باس قوسىپ, ەلدىڭ ەرتەڭىنە قاتىستى, بۇگىنىنە قاتىستى ماسەلەلەردى تالقىلاۋعا, ويناي ءجۇرىپ ويلاسۋعا ارنالعان جاقسى ءبىر تۋرنير دەپ ايتۋعا بولادى.
قايرات ساق, ەۇۋ جۋرناليستيكا ماسەلەلەرىن زەرتتەۋ ينستيتۋتىنىڭ ديرەكتورى:
- بيىلعى ەرەكشەلىك جاستار مەن اقساقالدارىمىز بىرىگىپ, ءبىر ستولدىڭ باسىندا اڭگىمەلەرىن ايتىپ ءجۇرىپ ويناسىن دەپ, بولمەي-جارماي ءبىر توپقا بىرىكتىرىپ وتكىزدىك ءتۋرنيردى. تەك قانا اقساقالدارىمىزدا رەنىش بولماۋى ءۇشىن ول كىسىلەرگە جەڭىلدىك جاسادىق. 40 جاسقا دەيىنگىلەر 40-60 جاستاعىلارعا ءبىر شار, ال 60 جاستان اسقاندارعا 2 شار جەڭىلدىك بەرەدى دەپ شەشتىك.
بۇل ءداستۇرلى تۋرنير جۋرناليستەر اراسىندا كەڭ تانىلعان. ءتۋرنيردىڭ اڭگىمەسى, ونەگەسى جىل بويى ايتىلىپ, كەڭ تارالارىنا ەش كۇمانىمىز جوق.
سونىمەن, جۋرناليستيكا جولباسشىلارى, قالامگەرلەر, مەديا-مەنەدجەرلەر مەن جاس جۋرناليستەر جارىس كورىگىن قىزدىردى. تۋرنير قورىتىندىسىندا بەلگىلى ايتىسكەر اقىن, الجير مۇراجايىنىڭ ديرەكتورى داۋلەتكەرەي كاپ ۇلى ءى ورىندى, جۋرناليست, باتىس قازاقستان وبلىسى اكىمدىگىنىڭ اپپارات باسشىسى ءنۇردىلدا وراز ءىى ورىندى, ال ءىىى ورىندى اقىن ۇلاربەك نۇرعالىم ۇلى يەلەندى.
تۋرنير ۇيىمداستىرۋشىلار بيىل بەلگىلى قالامگەرلەر اتىنداعى جۇلدەلەر تاعايىندادى. ورالحان بوكەي اتىنداعى جۇلدە سادىبەك تۇگەلگە; كارىباي احمەتبەكوۆ اتىنداعى جۇلدە كارىمبەك قۇرماناليەۆكە; اقسەلەۋ سەيدىمبەك اتىنداعى جۇلدە نۇرتورە جۇسىپكە; سەرىك ءابدىرايىم ۇلى اتىنداعى جۇلدە دارحان مىڭبايعا; قۋانىشباي قۇرمانعاليەۆ اتىنداعى جۇلدە قويشىباي ەسەنتاەۆقا بەرىلدى.
ودان بولەك «ەڭ سىيلى بيلياردشى» جۇلدەسىن قويشىعارا سالعارا ۇلى, «ەڭ مادەنيەتتى بيلياردشى» جۇلدەسىن تولەن ابدىك, «ەڭ شەبەر بيلياردشى» جۇلدەسىن التىنبەك نۇق ۇلى, «ەڭ مەرگەن بيلياردشى» جۇلدەسىن ءالىمجان سابىرجان ۇلى, «ەڭ شاپشاڭ بيلياردشى» جۇلدەسىن شارحان قازىعۇلوۆ, «تەحنيكاسى مىقتى تاستاياقشى» جۇلدەسىن مارات ماناسباەۆ, «ەشكىمنىڭ كوڭىلىن جىقپاعان بيلياردشى» جۇلدەسىن قايرات مۇساقۇلوۆ الدى.
جالپى, ءىس-شاراعا قاتىسۋشىلار تەك شار قۋالاپ قانا قويماي, ويلى سوزدەر تارقاتىلعان, ۇلتتىق قۇندىلىقتار ۇلىقتالعان, تاعىلىمعا تولى ءتۋرنيردى جوعارى دەڭگەيدە ۇيىمداستىرعان ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆقا, جۋرناليستيكا فاكۋلتەتىنىڭ دەكانى نۇرجان قۋانتاەۆ پەن الاشتانۋشى عالىم, ەۇۋ جۋرناليستيكا ماسەلەلەرىن زەرتتەۋ ينستيتۋتىنىڭ ديرەكتورى قايرات ساققا جانە قارجىلاي قولداۋ كورسەتكەن ەۇۋ كاسىپوداق كوميتەتىنىڭ توراعاسى باكەجان سەيدەشەكە, مەملەكەت جانە قوعام قايراتكەرى, عالىم, زاڭ عىلىمدارىنىڭ دوكتورى, پروفەسسور باقىتجان ابدىرايىمعا, اقسەلەۋ اعانىڭ ءىنىسى اسىلحان مەن ۇلى ەرنارعا العىستارىن ايتىپ تارقاستى.
