بۇل ساپارعا قالا اكىمىنىڭ ورىنباسارلارى, «قازسەلدەنقورعاۋ» مەملەكەتتىك مەكەمەسىنىڭ, توتەنشە جاعدايلار دەپارتامەنتى مەن سالا باسقارمالارىنىڭ باسشىلارى دا باردى.
تىكۇشاقپەن شولۋ بارىسىندا «مەدەۋ», «ۇلكەن الماتى», «قارعالى» سۋ بوگەتتەرى مەن اقساي, كىشى جانە ۇلكەن الماتى وزەندەرى باسسەيندەرىندە ورنالاسقان №6, 8, 9, 10 جانە 13-بيس مۇزداق كولدەرى سەكىلدى نەگىزگى سەلدەن قورعاۋ نىساندارى قامتىلدى. توتەنشە جاعدايلار دەپارتامەنتى, «قازسەلدەنقورعاۋ» جانە سەيسميكالىق قاۋىپسىزدىك پەن جۇمىلدىرۋ دايىندىعى باسقارماسى باسشىلارىمەن بىرلەسىپ, الداعى جۇمىستار تالقىلاندى.
بۇگىندە الماتى تاۋلارىندا 51 مۇزداق كول بار. ونىڭ 14-ىندە بۇزىلۋ قاۋپى بولسا, 6-ۋى قاۋىپتىلىگى جوعارى نىساندار قاتارىندا. بۇل كولدەر حالىق تىعىز قونىستانعان ايماقتار ارقىلى اعاتىن وزەندەردىڭ باستاۋىندا ورنالاسقان.
«قازسەلدەنقورعاۋ» مەكەمەسىنىڭ اگەتۋ باسشىسى سامات داۋلەنقانوۆتىڭ ايتۋىنشا, قاۋىپتى نىسانداردا سۋ دەڭگەيىن تومەندەتۋ, سيفون جەلىلەرىن ىسكە قوسۋ, ەۆاكۋاتسيالىق ارنالاردى تازالاۋ سەكىلدى الدىن الۋ شارالارى جوسپارلانعان. سونداي-اق, باقىلاۋ كۇشەيتىلىپ, 31 اۆتوماتتى ستانتسيا, 23 باقىلاۋ بەكەتى مەن 8 ماۋسىمدىق نۇكتە جۇمىس ىستەپ تۇر. ارنايى تەحنيكامەن جابدىقتالعان جەدەل ءىس-قيمىل توبى قۇرىلىپ, كەزەكشىلىك ۇيىمداستىرىلعان.
مۇزداق كولدەردى تىكۇشاقپەن شولعان كەزدە گيدروتەحنيكالىق قۇرىلىستار – بوگەتتەر مەن سەلدەن قورعاۋ بوگەتتەرىنىڭ تەحنيكالىق جاعدايىنا ەرەكشە نازار اۋدارىلدى. كەيبىر نىساندارعا جوندەۋ نەمەسە قايتا قۇرۋ شەشىمىن قابىلداۋ ءۇشىن ەگجەي-تەگجەيلى تەكسەرىس قاجەت ەكەنى انىقتالدى. سونداي-اق, تاۋلى بولىمشەلەردى ارنايى تەحنيكامەن, قۇرال-جابدىقتارمەن جانە مەتەوقۇرالدارمەن قوسىمشا جابدىقتاۋ قاجەتتىلىگى ايتىلدى.
مارشرۋت الماتى تاۋ كلاستەرىنىڭ ورتالىق ايماعى ارقىلى اياقتالدى. «Chimbulak Development» جشس ديرەكتورى رينات ءابدىراحمانوۆ ارقان جولدار جەلىسىن كەڭەيتۋ, تراسسالار مەن ينفراقۇرىلىمدى دامىتۋ جوسپارىن تانىستىردى. 2028 جىلعا قاراي كلاستەرلىك ايماقتىڭ وتكىزۋ قابىلەتى كۇنىنە 6 مىڭنان 34 مىڭ ادامعا دەيىن ارتپاق. جوبا جەكە ينۆەستورلار مەن حالىقارالىق سەرىكتەستەردىڭ قارجىسى ەسەبىنەن جۇزەگە اسىرىلىپ جاتىر.
قالا باسشىسى ءتۋريزمدى دامىتۋ تابيعي قاۋىپ-قاتەرلەردەن الماتىلىقتار مەن قالا قوناقتارىن قورعاۋ شارالارىمەن تىعىز بايلانىستا جۇرگىزىلۋگە ءتيىس ەكەنىن اتاپ ءوتتى.
