پرەزيدەنت باستامالارى قوستاناي وبلىسىندا جۇيەلى تۇردە جۇزەگە اسىرىلىپ كەلەدى. سونىڭ جارقىن مىسالى – قادىربەك وسپانوۆ اتىنداعى №1 بالالار-جاسوسپىرىمدەر سپورت مەكتەبىنىڭ قايتا جاڭعىرتۋدان كەيىنگى اشىلۋى.
1979 جىلى نەگىزى قالانعان بۇل مەكتەپ وڭىردەگى بالالار سپورتىنىڭ الدىڭعى قاتارلى مەكەمەلەرىنىڭ ءبىرى سانالادى. مۇندا وليمپيادا ويىندارىنىڭ قاتىسۋشىلارى – سەرگەي ۋشكالوۆ پەن ستانيسلاۆ كۋزمين ء(جۇزۋ), 29 حالىقارالىق دارەجەدەگى سپورت شەبەرى جانە 73 قازاقستان رەسپۋبليكاسىنىڭ سپورت شەبەرى تاربيەلەنگەن.
بۇگىندە مەكتەپتە ءجۇزۋ, باسكەتبول, گاندبول, ۆەلوسپورت جانە ترياتلون بولىمدەرى جۇمىس ىستەيدى. 1157 جاس سپورتشى تۇراقتى تۇردە جاتتىعۋعا قاتىسادى. قايتا جاڭعىرتۋدان كەيىن مەكتەپتىڭ بازاسى كەڭەيىپ, بوكس جانە سۋعا سەكىرۋ بولىمدەرى اشىلادى. سونىمەن قاتار, ەندى بۇل مەكەمە قالا تۇرعىندارىنا, ونىڭ ىشىندە قوزعالىسى شەكتەۋلى جاندارعا دا ساۋىقتىرۋ باعىتىندا قىزمەت كورسەتەتىن بولادى.
ايماقتاعى سپورتتىق ينفراقۇرىلىم جۇيەلى تۇردە دامىپ كەلەدى. سوڭعى ءۇش جىلدا وبلىستا 18 جاڭا سپورت نىسانى, ونىڭ ىشىندە 11 دەنە شىنىقتىرۋ-ساۋىقتىرۋ كەشەنى سالىندى. جىل سوڭىنا دەيىن تاعى ءۇش نىسان پايدالانۋعا بەرىلەدى. بۇگىندە وڭىردە 367 مىڭنان استام تۇرعىن بۇقارالىق سپورتپەن اينالىسادى. ال مەكتەپ جاسىنداعى بالالاردىڭ 62 پايىزى تەگىن سپورت سەكتسيالارىنا قاتىسادى.
سونىمەن قاتار, مەملەكەت باسشىسى تاپسىرعان تاعى ءبىر ماڭىزدى مىندەت – ءبىلىم بەرۋ مەكەمەلەرىن قادامدىق قولجەتىمدىلىكپەن قامتاماسىز ەتۋ – وڭىردە شەشىمىن تابۋدا.
قوستاناي قالاسىنىڭ قارقىندى دامىپ كەلە جاتقان «اۋەجاي» شاعىن اۋدانىندا 280 ورىندىق جاڭا مەملەكەتتىك بالاباقشا اشىلدى. بۇل نىساندى اۋدان تۇرعىندارى, اسىرەسە جاس وتباسىلار كوپتەن كۇتكەن بولاتىن.
وبلىس اكىمى قۇمار اقساقالوۆ بالاباقشانىڭ اشىلۋىندا:
«ەكى جىل بۇرىن وسى شاعىن اۋداننىڭ تۇرعىندارىمەن كەزدەسۋدە بالاباقشانىڭ ماڭىزدىلىعى تۋرالى ايتقان ەدىك. مىنە, بۇگىن بۇل نىسان بوي كوتەرىپ, بالالاردى قابىلداۋعا دايىن. ول بالالار ءۇشىن جايلى ءارى جىلى ۇياعا اينالاتىنىنا سەنەمىن»,– دەپ اتاپ ءوتتى.
جاڭا بالاباقشادا قازاق جانە ورىس تىلدەرىندە ءبىلىم بەرەتىن 16 توپ جۇمىس ىستەيدى. مۇندا جايلى وقۋ جانە ويىن بولمەلەرى, سپورت جانە شىعارماشىلىق زالدارى, ەتنومادەني بۇرىشتار, بالالارعا ارنالعان شاعىن زەرتحانا جانە QR-كود ارقىلى قولجەتىمدى اۋديوەرتەگىلەر مەن كىتاپتار ۇسىنىلاتىن ءموبيلدى كىتاپحانا بار. بالالاردىڭ قاۋىپسىزدىگىنە ەرەكشە نازار اۋدارىلعان – بەينەباقىلاۋ, دابىل تۇيمەسى مەن ورتكە قارسى جۇيەلەر ورناتىلعان.
مەكەمەدە 75 جاڭا جۇمىس ورنى قۇرىلدى, ونىڭ 45-ءى — پەداگوگتار.
سوڭعى ەكى جىلدا وبلىستا 1700-دەن استام ورىنعا ارنالعان 10 بالاباقشا اشىلدى. قوستاناي قالاسىندا اشىلعان ءۇش جاڭا بالاباقشا 2 جاستان اسقان بالالار كەزەگىن ۇشتەن بىرگە قىسقارتۋعا, ال 3 جاستان اسقان بالالاردىڭ كەزەگىن تولىق جويۋعا مۇمكىندىك بەردى.
وسىلايشا, قوستاناي وبلىسىندا مەكتەپكە دەيىنگى تاربيە مەن بالالار سپورتىنان باستاپ جان-جاقتى دامۋعا جاعداي جاسايتىن ورتا قالىپتاسىپ كەلەدى. بۇل – بالالاردىڭ بولاشاعىنا سالىنعان سەنىمدى ينۆەستيتسيا.
