كۇنىنە 80 مىڭعا جۋىق كولىك قاتىنايدى
كوپىر – قالانىڭ وڭتۇستىگى مەن سولتۇستىگىن عانا ەمەس, ازيا مەن ەۋروپانى, ۇلان-عايىر دالا مەن ءسىبىردى بايلانىستىراتىنى ماڭىزدى. التى جولاقتى قۇرىلىم كولىك قاتىناسىن رەتتەپ, قالانىڭ وزگە بولىكتەرىنە جەتۋدى جەڭىلدەتتى. كۇنىنە 60-80 مىڭداي كولىك وتەدى. مۇنى ستراتەگيالىق نىسان عانا ەمەس, قارت قالاعا اجار بەرىپ تۇرعان بىرەگەي ارحيتەكتۋرالىق انسامبل جانە تاريحي سەمەي شاھارىنا كەلۋشىلەر مەن ءوڭىر حالقىنىڭ كورىكتى ورنى دەسەك ەش قاتەلەسپەيمىز.
نىسان قۇرىلىسىمەن جاپوننىڭ «اياچاي» فيرماسى اينالىسقان. فيرما كوپىردىڭ قاڭقاسىن جاپونيادا جاساپ, الدىمەن سۋ جولىمەن, كەيىن تەمىرجولمەن سەمەيگە جەتكىزگەن ەكەن. سونىمەن قاتار كوپىر بەتىنە تابيعي اسفالت توسەگەن, مۇنى كاريب باسسەينىندەگى ترينيداد ارالىنداعى ايگىلى Pitch Lake-تەن جەتكىزگەنى تۋرالى دەرەك.
زاماناۋي تەحنولوگيا قولدانىلادى
كوپىردىڭ سۋ بەتىندەگى ۇزىندىعى – 750, جالپى ۇزىندىعى – 1 086, بيىكتىگى – 90, ەنى – 35 مەتر. تىرەۋلەرىنىڭ اراسى 300 مەتردەن اساتىن ەلىمىزدەگى جالعىز اسپالى كوپىر سانالادى. مۇنداي جوبا تمد ەلدەرىندە جوقتىڭ قاسى. سەمەيدىڭ اسپالى كوپىرىنە ۇقساس وزىق گيدروتەحنيكالىق قۇرىلىستاردى تۇركيا, قىتاي, وڭتۇستىك كورەيا, دانيا, نورۆەگيا, اقش سياقتى الەمنىڭ دامىعان ەلدەرىنەن كورۋگە بولادى.
جۇمىستىڭ جالپى قۇنى – 300 892 857 تەڭگە. اسفالتتى اۋىستىرۋ ءۇشىن 80-گە جۋىق قۇرىلىسشى ەكى اۋىسىمدا جۇمىس ىستەپ جاتىر. 20-دان استام تەحنيكا تارتىلعان. قۇرىلىس جۇمىستارىنىڭ ساپاسى اكىمدىك تاراپىنان قاداعالانىپ وتىر. ءوڭىر باسشىسى بەرىك ءۋاليدىڭ ايتۋىنشا, سالىنعانىنا شيرەك عاسىر وتسە دە, كوپىر بۇگىنگە دەيىن كۇردەلى جوندەۋ كورمەگەن.
«2000 جىلدان بەرى اسفالت توسەمى تولىق اۋىستىرىلماي, 25 جىل بويى جاماپ-جاسقاپ, وي-شۇڭقىرلارىن بىتەپ كەلگەن. العاش رەت وسىنداي اۋقىمدى جۇمىستى قولعا الىپ جاتىرمىز. ۋاقىتشا شەكتەۋلەرگە حالىق تۇسىنىستىكپەن قارايدى دەپ ويلايمىن. جۇمىس بارىسىندا زاماناۋي تەحنولوگيالار قولدانىلادى. جوندەۋ جۇمىسىن «جول اكتيۆتەرىنىڭ ۇلتتىق ساپا ورتالىعى» ماماندارى قاداعالايدى», دەدى وبلىس اكىمى.
شارۋانىڭ 30 پايىزى ءتامام بولدى
«كوپىرگە قالىڭدىعى 5 سانتيمەتر بولاتىن ءبىر قابات اسفالت توسەلەدى. سەبەبى وتكەل مەتالل قۇرىلىمداردان تۇرادى. ال اسفالت قالىڭ بولسا, تيىسىنشە كوپىردىڭ سالماعى دا اۋىرلاي تۇسەدى. بۇل ونىڭ قۇرىلىمىنا زاقىم كەلتىرۋى مۇمكىن», دەيدى مەردىگەر كومپانيانىڭ وكىلى رۋسلان دۇسكەنوۆ. «جول اكتيۆتەرىنىڭ ۇلتتىق ساپا ورتالىعى» وف ديرەكتورى حامزات سۇلتانوۆ قولدانىپ جاتقان ماتەريالداردىڭ ساپاسى ءجىتى باقىلاۋدا دەيدى. قالالىق جولاۋشىلار كولىگى جانە اۆتوموبيل جولدارى ءبولىمىنىڭ باسشىسى مەرەي بايىرحاننىڭ بايانداۋىنشا, قازىرگە دەيىن جۇمىستىڭ شامامەن 30 پايىزى ورىندالدى.
«13 575 شارشى مەتر جول جابىنى الىنىپ, 9 375 شارشى مەتر مەتالل بەتى ارنايى ششەتكالارمەن تازارتىلدى. قازىر مەتالل بەتتى تەحنونيكول №08 پوليمەرلىك پرايمەرىمەن توپىراقتى بەكىتۋ جانە گيدرووقشاۋلاعىش قابات توسەۋ جۇمىستارى ءجۇرىپ جاتىر. كوپىرگە توسەلەتىن جاڭا جول جابىندىسى بۇرىنعىداي بەتون ەمەس. ونىڭ ورنىنا پوليمەرلىك قوسپالارى بار, ست رك 1225-2019 جانە ست رك 1684-2017 تالاپتارىنا ساي كەلەتىن ا تۇرىندەگى I ماركالى اسفالتبەتون توسەلەدى. بۇل – قوزعالىسقا ءتوزىمدى, بەرىك ءارى زاماناۋي ماتەريال», دەيدى مەرەي باقىتبەك ۇلى.
قالادا قۇنى 47 ملرد تەڭگە بولاتىن تاعى ءبىر جاڭا كوپىردىڭ قۇرىلىس جۇمىسى جالعاسىپ جاتىر. جاقىن ارادا جاڭا كوپىر قولدانىسقا بەرىلسە, كەپتەلىس ازايىپ, كولىك قاتىناسىن رەتتەۋگە مۇمكىندىك تۋماق.
اباي وبلىسى
