جەدەل جاردەم جۇمىسىنداعى جاڭالىق

جەدەلدىكتىڭ 4-سانا­تىن­داعى شاقىر­تۋ­لار پاتسيەنتتىڭ ءومىرى مەن دەنساۋلىعىنا تىكە­لەي, ىقتيمال قاۋىپ جوق شاقىرتۋ سانالادى. ياعني قان قىسىمىنىڭ جوعارىلاۋى, قىزۋ كوتەرىلۋ, جەڭىل جاراقاتتار سىندى پاتسيەنتتىڭ ومىرىنە قاۋىپ توندىرمەيتىن, بىراق مەديتسينا مامانىنىڭ كومەگىن قاجەت ەتەتىن جاعدايلار. بۇدان بىلاي ەمحانالاردىڭ جانىن­داعى ءموبيلدى بريگادالار 8:00-دەن 20:00-گە دەيىن جۇمىس ىستەي­دى. ومىرگە قاۋىپ توندىرمەيتىن جەدەلدىكتىڭ 4-ساناتىنداعى شاقىر­تۋلار ەمحانالاردىڭ جۇمىس ۋاقىتىندا مەديتسينا­لىق-سانيتارلىق العاشقى كومەك (مساك) ءموبيلدى بريگادالارىنا قايتا باعىتتالادى. 20:00-دەن كەيىن, دەمالىس كۇندەرى بارلىق شاقىرتۋلارعا, سونىڭ ىشىندە 4-ساناتتى شاقىرتۋعا بۇرىنعى­داي جەدەل جاردەم بريگادالارى قىزمەت كورسەتە بەرەدى.

مساك ءموبيلدى بريگادالارى شا­قىرتۋلارعا شىققاننان بولەك, پاتسيەنت­تەردىڭ ۇيىنە ­جوسپارلى تۇردە بارىپ وتىرادى. وسىلايشا, تۇرعىنداردىڭ دەن­ساۋلىعىن ۋاقتىلى باقىلاۋ­عا, اسىرەسە سوزىلمالى اۋرۋلارى بار پاتسيەنتتەردىڭ جاعدايىنا جەدەل دەن قويۋعا مۇمكىندىك تۋا­دى. مساك ءموبيلدى بريگادالارى 25 مىڭ تۇرعىنعا ءبىر بريگادا ەسەبىنەن قۇرىلادى. ولار پاتسيەنتتىڭ تۇرعىلىقتى جەرىنە قاراماستان, ناقتى شاقىرتۋ بو­يىنشا جۇمىس ىستەيدى. قاجەت بولعان جاعدايدا ءموبيلدى بريگادالارمەن ارنايى باعىتتاعى ماماندار دا بىرگە بولادى. مىسالى, بالالارعا كومەك قاجەت بولسا, جەدەل جاردەمگە پەدياتر ىلەسىپ بارۋى مۇمكىن. ەرەسەكتەرگە دە پا­تسيەنت جاعدايىنا, اۋرۋدىڭ سيپاتى مەن اۋىرلىعىنا بايلانىستى كارديولوگ, نەۆروپاتولوگ سىندى كاسىبي دارىگەرلەر كومەككە بارادى. بۇل ءتاسىل پاتسيەنتتەرگە ساپالى مەديتسينالىق كومەك كورسەتۋدىڭ تاعى ءبىر ۇتىمدى جولى.

جەدەل جاردەمدى شاقىرتۋ مەحانيزمى دە وزگەرىسسىز قال­دى. كەز كەلگەن ازامات 103 ءنو­مى­­رىن تەرۋ ارقىلى شۇعىل مەدي­تسينالىق كومەككە قوڭىراۋ شالا الادى. پاتسيەنتتىڭ جاعدايى ومىرگە تىكەلەي قاۋىپ توندىرەتىن جاعدايدا جەدەل جاردەم بريگا­داسى اپتانىڭ كۇنى مەن تاۋلىك ۋاقىتىنا قاراماستان جىلدام جەتەدى. مساك ءموبيلدى بريگاداسى شاقىرتۋلارعا 60 مينۋتتىڭ ىشىندە بارۋعا ءتيىس. شاقىرتۋدىڭ ءار ساناتىنا نورماتيۆتەر بەكىتىل­گەن. جەدەل جاردەم بريگادالارى 1-ساناتتاعى شاقىرتۋعا 10 مينۋتتا, 2-ساناتتاعى شاقىرتۋعا 15 مينۋت, 3-ساناتتاعى شاقىرتۋلارعا 30 مينۋت ىشىندە جەتۋگە تىرىسادى.

بيىل ەلىمىزدىڭ بارلىق ايما­عىنداعى جەدەل جاردەم قىز­مەتى 2,1 ملن-نان استام شا­قىر­تۋعا بارىپتى. ەڭ كوپ وتى­نىش­تەر جەدەلدىكتىڭ 4-ساناتى بويىن­شا تىركەلگەن (763 463 شا­قىرتۋ). ونىڭ 518 مىڭنان استامىنا مساك ءموبيلدى بريگا­دالارى قىزمەت كورسەتكەن. شا­قىرتۋلاردىڭ سانى 1-سانات بو­يىنشا – 104 443, 2-سانات بو­يىنشا – 642 312,  3-سانات بويىنشا – 574 580 شاقىرتۋدى قۇراعان.

ەسەپتى كەزەڭدە ءساتتى رەانيماتسيا كورسەتكىشى 55,6%-عا دەيىن وسكەن. شۇعىل كومەك كورسەتۋدە دە وڭ ديناميكا بايقالادى. ستا­تيستيكالىق دەرەكتەرگە زەر سال­ساق, جەدەل جاردەم شاقىرتۋ­لارىنىڭ 50%-دان استامى جەدەل­دىلىكتىڭ 4-ساناتىنا جاتادى. پاتسيەنتتىڭ كوبى سوزىلمالى اۋرۋدىڭ سىر بەرۋىنە بايلانىستى كومەك شاقىرادى. وسىنداي شاقىرتۋلار كوبەيگەندە جەدەل جاردەمنىڭ شۇعىل كومەككە مۇقتاج, ومىرىنە قاۋىپ تونگەن پاتسيەنتتەرگە جىلدام جەتە المايتىن ساتتەرى بولادى. مۇنى دەنساۋلىق ساقتاۋ مينيسترلىگى دە جاقسى ەسەپكە الىپ وتىر. سول تۇرعىدا مامىرداعى وزگەرىستەر جەدەل جاردەمنىڭ جۇكتەمەسىن وڭتايلاندىرۋعا, كۇتۋ ۋاقىتىن قىسقارتۋعا, جەدەل مەديتسينالىق جاردەم جۇيەسى­نىڭ تيىمدىلىگىن ارتتىرۋعا مۇمكىندىك بەرسە قۇبا-قۇپ.

جاقىندا استانا, ال­ماتى قالالارىندا جەدەل مەدي­­تسينا­لىق جاردەم فەلد­شەر­لەرىنە ارنالعان سمارت-بەينە­جەتون­داردى ەنگىزۋ جونىندەگى قانات­قاقتى جوبا باستالدى. سەبەبى 2019–2023 جىلدار ارالىعىندا ەلىمىزدە قىزمەتتىك مىندەتتەرىن اتقارۋ كەزىندە 158 مەديتسينا قىزمەتكەرى زارداپ شەككەن.  جاڭا جوبا مەديتسينا قىزمەتكەرلەرى­نىڭ شاقىرتۋلارعا شىعۋ كەزىن­دەگى قاۋىپسىزدىگىن ارتتىرۋعا با­عىت­تالعان. ياعني سالا ماماندارىنا جۇمىس بارىسىندا الدە­كىم كۇتپەگەن جەردەن شا­بۋىل جاساسا, جانجال شىعارسا, اگرەسسيا تانىتسا, قۇقىعىن زاڭدى تۇردە قورعاۋعا مۇمكىندىك مولايادى. بەينەجەتونداردا SOS باتىر­ماسى, گەولوكاتسيا فۋنك­تسياسى, ­اۋىسىم اياقتالعاننان كەيىن جازبا­لار­دى اۆتوماتتى تۇردە الۋ مۇم­كىندىگى بار. بارلىق قۇرىل­عى­ ورتالىقتاندىرىلعان باس­قارۋ جۇيەسىنە قوسىلعان. SOS سيگنالى مەن بەينەسيگنال اۆتوماتتى تۇردە ءىىم جۇيەسىنە بەرىلەدى. قاناتقاقتى كەزەڭ­نىڭ قورىتىندىسى بويىنشا مۇن­داي تەحنولوگيا ەلىمىزدىڭ باسقا دا وڭىرلەرىنە ەنگىزىلۋگە ءتيىس. قاۋىپسىزدىكتى, اشىقتىق­تى قامتاماسىز ەتەتىن تەحنولوگيا فەلدشەرلەرگە عانا ەمەس, پاتسيەنتتەرگە دە ءتيىمدى. ويتكەنى ولار ماماننىڭ كاسىبي ءارى بارلىق قۇقىقتى ساقتاي وتىرىپ قىزمەت كورسەتكەنىنە كوز جەتكىزەدى.