فورۋمنىڭ اشىلۋ سالتاناتىندا وبلىس اكىمى بەرىك ءۋالي ءوڭىردىڭ ينۆەستيتسيالىق الەۋەتىن باياندادى.
- بۇگىن, اباي ەلىنىڭ دامۋىنا ارنالعان ماڭىزدى قادام - «تۋعان جەرگە تۋىڭدى تىك» ينۆەستيتسيالىق فورۋمىنا جينالىپ وتىرمىز. بۇل فورۋم – ءوزارا وي بولىسەتىن, پىكىر الماساتىن, ەڭ باستىسى, بولاشاققا بىرگە قادام باسۋعا مۇمكىندىك بەرەتىن الاڭ. مەملەكەت باسشىسى قاسىم-جومارت كەمەل ۇلى توقاەۆ «اباي تۋعان توپىراققا كەلگەن ادام بۇل جەردىڭ كيەسىن سەزىنەدى, قاسيەتىن ۇعادى. سەمەي – ۇلى دالانىڭ ۇلاعاتتى ولكەسى. بۇل – الاش ارىستارىنىڭ ءىزى قالعان, زيالىلارىمىز ەلدىڭ بولاشاعى ءۇشىن كۇرەسكەن قاستەرلى ءوڭىر. سەمەي – ۇلتتىق عىلىم مەن ءبىلىمنىڭ, ونەر مەن مادەنيەتتىڭ تاريحي ورتالىعى» دەپ اتاپ وتكەن قاسيەتتى سەمەي تورىنە كەلىپ وتىرسىزدار. اباي وبلىسى – جاڭادان قۇرىلعانىمەن, الەۋەتى جوعارى ايماق. تابيعي رەسۋرستارىمىز, ەڭبەكقور حالقى, وندىرىستىك ينفراقۇرىلىمى مەن گەوگرافيالىق ورنالاسۋى – تۇراقتى دامۋعا نەگىز بولا الادى. الايدا, وسى مۇمكىندىكتەردى ىسكە اسىرۋ ءۇشىن جەرگىلىكتى كاسىپكەرلەر مەن ينۆەستورلاردىڭ بەلسەندىلىگى اۋاداي قاجەت, - دەدى ايماق باسشىسى.
قولايلى گەوگرافيالىق ورنالاسۋىنىڭ ارقاسىندا اباي وبلىسى قىتاي, رەسەي جانە ورتالىق ازيانى بايلانىستىرادى. بۇل تۇرعىدان, ءىرى حالىقارالىق ساۋدا دالىزدەرىنە شىعاتىن كولىك-لوگيستيكالىق حابتى دامىتۋعا ۇلكەن مۇمكىندىك بار.
الداعى جىلدارى وڭىردە بىرقاتار ءىرى ينۆەستيتسيالىق جوبالار جۇزەگە اسىرىلماق. سولاردىڭ ءبىرى – اياگوز–باقتى تەمىرجولى مەن قۇرعاق پورتتىڭ قۇرىلىسى. بۇل – ەلىمىزدىڭ ترانزيتتىك الەۋەتىن ارتتىرۋعا باعىتتالعان ستراتەگيالىق ماڭىزى زور باستاما. جوبانىڭ نەگىزگى ماقساتى – كولىك-لوگيستيكالىق ينفراقۇرىلىمدى جاڭا دەڭگەيگە كوتەرۋ, قىتايمەن شەكارالىق ساۋدا بايلانىستارىن جانداندىرۋ جانە ءوڭىر ەكونوميكاسىنىڭ دامۋىنا سەرپىن بەرۋ.
قازىرگى تاڭدا وبلىستا 8 مىڭنان استام تۇراقتى جۇمىس ورنىن قۇرۋعا باعىتتالعان, جالپى قۇنى 2,7 ترلن تەڭگە بولاتىن
38 پەرسپەكتيۆالى ينۆەستيتسيالىق جوبادان تۇراتىن بىرىڭعاي پۋل قالىپتاستى.
2024 جىلدىڭ قورىتىندىسى بويىنشا ناقتى سەكتورداعى نەگىزگى كاپيتالعا سالىنعان ينۆەستيتسيالار كولەمى 575,3 ملرد تەڭگە بولدى. ونىڭ نەگىزگى ۇلەسى جەكە ينۆەستيتسيالار بولىپ, 436,5 ملرد تەڭگەنى قۇرادى. ال تىكەلەي شەتەلدىك ينۆەستيتسيالار كورسەتكىشى – 775,3 ملن اقش دوللارى.
بىلتىر 14,4 ملرد تەڭگەگە 8 جوبا ىسكە اسىرىلىپ, 330 جۇمىس ورنى قۇرىلدى.
بيىل جوسپار بويىنشا نەگىزگى كاپيتالعا سالىناتىن جىلدىق ينۆەستيتسيا كولەمى 763,7 ملرد تەڭگە.
2025 جىلى 31,1 ملرد تەڭگەگە 10 ينۆەستيتسيالىق جوبانى ىسكە اسىرىپ, 767 جۇمىس ورنى اشىلماق. بۇگىنگە 1 ملرد تەڭگەگە 1 جوبا ىسكە قوسىلدى.
بيىل 10 ميلليارد تەڭگەگە «سەماز» جشس ونەركاسىپتىك الاڭدارىن كەڭەيتىپ, جىلىنا 6 مىڭ ارنايى تەحنيكا شىعاراتىن جەلى جاڭارتىلادى. «كازپوليگراف» جشس جىلىنا قۋاتتىلىعى 40 ميلليون قاعاز بەن كارتون بۇيىمدارى ءوندىرىسىن ىسكە قوسادى.
وبلىس اكىمى وسى ۋاقىتقا دەيىن 50-دەن استام شەتەلدىك ينۆەستورمەن كەزدەسۋ وتكىزدى.
سونىمەن قاتار, وتكەن ايدا اباي وبلىسى دەلەگاتسياسى شىڭجاڭ ۇيعىر اۆتونوميالىق اۋدانىنا جۇمىس ساپارىمەن بارىپ, «ۇلكەن التاي» سۋبوڭىرلىك ىنتىماقتاستىق جونىندەگى حالىقارالىق كونفەرەنتسياسىنا قاتىستى. 20 كەزدەسۋ وتكىزىپ, جالپى سوماسى – 1,5 ملرد اقش دوللارىنان اساتىن 15 ىنتىماقتاستىق تۋرالى مەموراندۋمعا قول قويىلدى.
وسى ساپاردىڭ ناتيجەسىندە سەمەي قالاسىنداعى ء«وندىرىس» يندۋستريالىق ايماعىندا «SUTO KAZAKHSTAN» كاسىپورنى قىتاي كومپانياسىمەن بىرلەسىپ, جالپى سوماسى 50 ملن اقش دولل. قۇرايتىن چيپتەر مەن ەلەكتروندى قوندىرعىلاردى وندىرەتىن زاۋىتتىڭ قۇرىلىسى باستالدى.
سونىمەن قاتار, «XinYi Ltd» قىتاي كومپانياسىمەن قوناق ءۇي, كوممۋنالدىق بازار جانە جاڭادان سالىناتىن اكىمشىلىك-ىسكەرلىك ورتالىقتاعى كۆارتال قۇرىلىسى جونىندە كەلىسسوزدەر جۇرگىزىلۋدە.
سەمەيدەگى جەر كولەمى 96 گەكتاردى قۇرايتىن ء«وندىرىس» يندۋستريالىق ايماعىندا ءتورت جوبا جۇزەگە اسىرىلۋدا.
كاسىپكەرلەر مەن ينۆەستورلار تاراپىنان وندىرىستىك الاڭدارعا دەگەن قاجەتتىلىك جوعارى
سوندىقتان يندۋستريالىق ايماقتىڭ اۋماعىن 600 گەكتارعا دەيىن كەڭەيتۋ جۇمىسى قولعا الىنادى.
بۇل شەشىم – ءوڭىردىڭ يندۋستريالىق-يننوۆاتسيالىق دامۋىنا قوسىمشا سەرپىن بەرەتىن ماڭىزدى قادام.
يندۋستريالىق ايماقتىڭ كەڭەيۋىنە بايلانىستى ينفراقۇرىلىم جاڭعىرتىلادى. اتاپ ايتقاندا, جەكە تەمىرجول تۇيىعىن سالۋ, ەلەكتر قۋاتىن ارتتىرۋ جانە جىلۋ ينفراقۇرىلىمىن قالپىنا كەلتىرۋ كوزدەلىپ وتىر.
فورۋم قورىتىندىسىندا 14 ءوزارا ىنتىماقتاستىق مەموراندۋمىنا قول قويىلادى دەپ جوسپارلانىپ وتىر. ونىڭ ىشىندە وڭىرارالىق ارىپتەستىك, قۇرىلىس سالاسىنداعى جوبالار, ءبىلىم جانە دەنساۋلىق ساقتاۋ ينفراقۇرىلىمدارىن دامىتۋ, سونداي-اق تسيفرلىق شەشىمدەر ەنگىزۋ ماسەلەلەرى قامتىلادى.
فورۋم اياسىندا وبلىستىڭ وندىرىستىك, اۋىل شارۋاشىلىق الەۋەتىن كورسەتەتىن ۇلكەن كورمە جۇرتشىلىق نازارىنا ۇسىنىلدى. جيىنعا كەلگەن قۇرمەتتى قوناقتار وبلىس اكىمىمەن بىرگە كورمەنى تاماشالادى.
اباي وبلىسى
