اۋىر تەحنيكانىڭ ىستەن شىققانىن قالىپقا كەلتىرۋدە شاپشاڭدىق پەن شەبەرلىك جۇرگىزۋشى مەن جوندەۋشىگە ۇلكەن سىن. تەحنيكانى جىلدام ءارى ساپالى جوندەپ قاتارعا قوسۋ ءبىرشاما جاۋاپكەرشىلىكتى قاجەت ەتەدى. قاۋىپسىزدىك قاعيداسىن قاپەردەن شىعارۋعا تاعى بولمايدى. تەمىرجولشى وسى ءىستىڭ ورايىن وڭتايلى تاپقانداي. ول ويلاپ تاپقان اۋىر جۇك كولىگىنىڭ دوڭگەلەگىنە ارنالعان باسپالداق – مامانداردىڭ ايتۋىنشا, جۇمىس ونىمدىلىگىن ارتتىرۋداعى تاپقىر شەشىمنىڭ ءبىرى رەتىندە باعالاندى.
«كاماز» كولىگىنىڭ ءجۇرىس بولىگى مەن قورابى دا, ءتىپتى قوزعالتقىشى دا جۇرگىزۋشى كابيناسىنىڭ استىندا ورنالاسقان. ونى وڭداپ, جوندەۋ نەمەسە ماي, سۋىن تەكسەرىپ كۇتىپ-باپتاۋ ءۇشىن الگى كابينانى كوتەرىپ, ادام استىنا كىرۋى قاجەت. بۇل ارەكەت قاۋىپتى ەكەنى ءمالىم. ودان بولەك الدىڭعى دوڭگەلەكتىڭ ءۇستى ارقىلى رامانىڭ ورتاسىندا ورنالاسقان قوزعالتقىشقا قول جەتكىزۋ كوپ قولايسىزدىق تۋىنداتادى. ول ازداي نۇسقاۋلىق بويىنشا «كاماز»-دى كۇتىپ-باپتاۋ مەن جوندەپ, وڭداۋ جۇمىستارىنا كەمى 2 ادام قاتىسۋى كەرەك.
«شىمكەنت ماتيسترالدىق جەلى ديرەكتسياسى باستىعىنىڭ ءبىرىنشى ورىنباسارى جومارت مىرزابەكوۆ باستاعان ءبىر توپ جىگىتتەر ءوزارا ويلاسىپ, كەڭەسە كەلە دوڭگەلەككە ارنالعان باسقىش-باسپالداق جاساپ شىعارعان. ۇستىنە ەكى ادام شىققاندا يىلە قويمايتىن مەتالل كونسترۋكتسيادان جاسالعان باسقىشتى تىك تۇرعان دوڭگەلەكتىڭ توبەسىنە كيگىزە قويعاندا باسپالداقتان اۋمايدى. ال ونى قولدانۋ كەزىندەگى قولايلىلىق تراەكتورياسى مەن تيىمدىلىگى ءوز الدىنا اڭگىمە. ءتىپتى, ەكىنشى مامانعا دا قاجەتتىلىك تۋىنداماي, ءبىر ادامنىڭ ءوزى الىپ جۇك كولىگىن جوندەپ-تۇزەۋدى وپ-وڭاي جالعاستىرا بەرەدى. ياعني, كابينا كوتەرىلىپ, بيىكتىگى 125 سانتيمەتردى قۇرايتىن دوڭگەلەككە كيگىزىلگەن باسقىشقا ادام شىققاندا كولىك قوزعالتقىشىنىڭ بۇلتارىس-قالتارىسىنا دەيىن قولىڭ وڭاي جەتەتىن قولايلىلىق تۋىندايدى. بۇدان جوندەۋشىنىڭ جۇمىس ونىمدىلىگى ارتادى. سونىمەن قاتار, ىڭعايسىز جاعدايدا ەڭكەيىپ, يىلۋدەن قورعاپ, جوندەۋشىنىڭ بەلىنە فيزيكالىق كۇش تۇسۋدەن ساقتايدى. ءوز كەزەگىندە بۇل جۇرگىزۋشىنى شارشاتپاي, ۇزاعىراق ءونىمدى ەڭبەك ەتۋگە مۇمكىندىك بەرەدى», دەپ جازدى «قازاقستان تەمىرجولشىسى» گازەتىنىڭ ءتىلشىسى نۇرلىبەك دوسىباي.
جالپى, جوبا تۋرالى ءبىرشاما ۋاقىت ايتىلعانىمەن, كاسىپورىندا قولدانىسقا مامىر ايىنان باستاپ ەنگىزىلگەن. ونىڭ سەبەبى, جوبانىڭ ءساۋىر ايىندا جول جانە قۇرىلىس دەپارتامەنتىندەگى تەحنيكالىق كەڭەس مۇشەلەرىنىڭ تالقىلاۋىنان ءوتىپ, وڭ باعاسىن الۋمەن تىكەلەي بايلانىستى كورىنەدى. وسىلايشا, راتسيوناليزاتور ۇسىنىسى وڭ قورىتىندى الىپ, اۆتورعا قارجىلاي سىياقى بولىنگەن جانە پچ-54 مەكەمەسىندە ءساتتى جۇزەگە اسىرىلعان.
