سۋرەتتى تۇسىرگەندەر – ا.دۇيسەنباەۆ, ە.ۇكىباەۆ
مەملەكەت باسشىسى جەكە ينۆەستوردىڭ قارجىسىنا سالىنىپ, بيىل پايدالانۋعا بەرىلگەن كوپفۋنكتسيالى عيماراتتىڭ قىزمەتىمەن تانىستى. ەلوردادا ورنالاسقان كەشەندە ءتۇرلى دەڭگەيدەگى سپورتتىق ءىس-شارالار, سونداي-اق حالىققا ارنالعان ساۋىقتىرۋ جانە دەمالىس باعدارلامالارى ۇيىمداستىرىلادى. نىسان اۋماعىندا فۋتزال, ۆولەيبول مەن باسكەتبول الاڭدارى, بوكس, دزيۋدو, قازاق كۇرەسى جانە باسقا دا سپورت تۇرلەرىمەن شۇعىلدانۋعا ارنالعان جەكپە-جەك زالدارى بار.
پرەزيدەنت بۇقارالىق سپورتتى دامىتۋ ءۇشىن وسىنداي كەشەندەردى كوپتەپ سالۋ قاجەت ەكەنىن ايتتى. سونداي-اق جاس بوكسشىلارمەن جانە فۋتبولشىلارمەن اڭگىمەلەسىپ, ولاردىڭ كەلەشەكتە الەم, وليمپيادا چەمپيوندارى بولۋىنا تىلەكتەستىك ءبىلدىردى.
– بۇل ءۇشىن, ەڭ الدىمەن, ەڭبەك ەتۋ كەرەك, تاباندىلىق قاجەت. جەڭىسكە تەك ەڭبەكقورلىق قانا جەتكىزەدى, – دەدى مەملەكەت باسشىسى.
سودان سوڭ پرەزيدەنت قاسىم-جومارت توقاەۆ «داۋلەت» مكقك تەننيس ورتالىعىنىڭ قىزمەتىمەن تانىستى. كەشەندە 600 بالا, ولاردىڭ ىشىندە 85 وقۋشى بيۋدجەت ەسەبىنەن جاتتىعادى. سونداي-اق مۇندا 57 سپورتتىق-ساۋىقتىرۋ توبى جۇمىس ىستەيدى.
«داۋلەت» ورتالىعى – ەلورداداعى بالالار ەڭ كوپ باراتىن, سونىڭ ىشىندە ەرەكشە قاجەتتىلىگى بار سپورتشىلاردى دا قامتيتىن الەۋمەتتىك-سپورتتىق نىسانداردىڭ ءبىرى.
بيىل مامىر ايىندا ورتالىق بازاسىندا ازيا قۇرلىعىندا العاش رەت Virtus World Tennis Championship 2025 – اقىل-وي كەمىستىگى بار سپورتشىلار اراسىندا تەننيستەن الەم بىرىنشىلىگى ءوتتى.
وسى كۇنى مەملەكەت باسشىسىنا «Stadler Kazakhstan» زاۋىتى شىعارعان العاشقى جولاۋشىلار ۆاگونى تانىستىرىلدى.
جاڭا ۆاگونداردىڭ باستى ارتىقشىلىعى – جولاۋشىلاردىڭ جايلىلىعى مەن قاۋىپسىزدىگىن ارتتىرۋدى كوزدەيتىن زاماناۋي ينجەنەرلىك شەشىمدەر. قاتاڭ كليماتتىق جاعدايعا بەيىمدەلىپ جاسالعان ۆاگونداردى قولدانۋ مەرزىمى – 40 جىل.
كاسىپورىن كۋپە, پلاتسكارت جانە قوزعالىسى قيىن جولاۋشىلار ءۇشىن ارناۋلى ۆاگوندار شىعارادى. بيىل 51 ۆاگوندى, ال 2030 جىلعا دەيىن 557 جاڭا ۆاگوندى پايدالانۋعا بەرۋ جوسپارلانعان. بۇل ۇلتتىق تاسىمالداۋشىنىڭ ۆاگون پاركىن تولىعىمەن جاڭارتۋىنا مۇمكىندىك بەرەدى. ءوندىرىستى لوكاليزاتسيالاۋعا قازاقستاندىق كاسىپورىندار تارتىلعان.
پرەزيدەنت تەمىرجول سالاسىنىڭ جۇمىسشىلارىمەن اڭگىمەلەستى.
قاسىم-جومارت توقاەۆقا تەمىرجول قاتىناسى جۇيەسىن جاڭعىرتۋ بارىسى جونىندە ەسەپ بەرىلدى. بۇكىل ەل بويىنشا 125 ۆوكزالعا جوندەۋ جۇمىستارى جۇرگىزىلىپ جاتىر. حالىقارالىق سەرىكتەستەرمەن بىرلەسىپ, جولاۋشى تاسىمالداۋ جۇيەسىندەگى قىزمەت كورسەتۋ ساپاسىن ارتتىرۋعا جانە وڭىرلەردەگى كولىك بايلانىسىن جاقسارتۋعا باعىتتالعان شەشىمدەر ەنگىزىلىپ جاتىر.
اتاپ ايتقاندا, وتاندىق ءىت كومپانيالار جولاۋشىلارعا ارنالعان بىرىڭعاي تسيفرلى پلاتفورما ازىرلەدى. بۇل بيلەت ساتىپ الۋدان باستاپ تۋريستىك قىزمەت كورسەتۋگە دەيىنگى كوپتەگەن فۋنكتسيانى بىرىكتىرەدى. سونداي-اق پويىزدار سپۋتنيكتىك ينتەرنەتكە قوسىلادى. قاۋىپسىزدىكتى كۇشەيتۋ ماقساتىندا ۆيدەوتىركەۋلەر, ءموبيلدى تەرمينالدار, جاساندى ينتەللەكت تەحنولوگياسى نەگىزىندە مالىمەتتەردى تالداۋعا قابىلەتتى 4 مىڭ كامەرا پايدالانىلادى.
مەملەكەت باسشىسى بارعان كەلەسى نىسان – MFA International كومپانياسىنىڭ ەلورداداعى كاسىپورنى. بۇل – يندۋستريالىق رەسپيراتور مەن گازتۇتقى شىعارۋدا تۇركياداعى ەڭ ءىرى جانە ەۋروپاداعى ۇشتىككە ەنەتىن كومپانيا.
2020 جىلى پاندەميانىڭ شارىقتاۋ شاعىندا MFA Maske كومپانياسى قىزمەت اۋماعىن كەڭەيتۋ جونىندە شەشىم قابىلداپ, قازاقستانعا ينۆەستيتسيا قۇيعان بولاتىن. استانادا مەديتسينالىق, ونەركاسىپتىك رەسپيراتورلار, گازعا قارسى ۋلانۋدان, سونداي-اق حيميالىق, بيولوگيالىق, راديولوگيالىق جانە يادرولىق قاتەردەن ساقتايتىن گازتۇتقى شىعاراتىن زاۋىت قۇرىلىسىن باستادى. جوبا قۇنى – 10 ملن دوللار. كومپانيانىڭ جەكە ينۆەستيتسياسى ەسەبىنەن سالىنىپ جاتىر.
سونىمەن قاتار پرەزيدەنت مەديتسينالىق ماقساتتاعى بۇيىمدار شىعاراتىن ەلوردالىق كاسىپورىندار كورمەسىن تاماشالادى. مەملەكەت باسشىسىنا Heart Center Foundation قوعامدىق قورىنىڭ وكىلدەرى قازاقستانداعى كارديوحيرۋرگيا مەن ترانسپلانتولوگيانى دامىتۋ ميسسياسى تۋرالى اڭگىمەلەدى.
قاسىم-جومارت توقاەۆقا بيىل مامىر ايىندا ALEM يننوۆاتسيالىق اپپاراتىن شىعاراتىن زاۋىت قۇرىلىسى باستالعانى جونىندە اقپارات بەرىلدى. قازاقستاندىق ينجەنەرلەر مەن UMC جۇرەك ورتالىعى دارىگەرلەرىنىڭ بىرەگەي جۇمىسى زاماناۋي ترانسپلانتولوگياداعى باستى ماسەلە سانالاتىن دونورلىق ورگاندى ساقتاۋ ۋاقىتىنىڭ شەكتەۋلىلىگىن شەشۋدى كوزدەيدى.
جۇرەكتىڭ يشەميالىق اۋرۋلارىنىڭ ءتۇرلى فورمالارىن ەمدەۋ ىسىنە نازارباەۆ ۋنيۆەرسيتەتى تەحنوپاركىنىڭ بازاسىندا ىسكە اسىرىلعان جوبا دا ءوز ۇلەسىن قوسپاق. «IHT Central Asia» جشس-ءى يسپانيالىق Iberhospitex S.A كومپانياسىنىڭ تەحنولوگياسىن اكەلىپ, ينتەرۆەنتسيالدى كارديولوگيادا قولدانىلاتىن كورونارلىق ستەنت پەن باللوندىق كاتاتەر ءوندىرىسىن جولعا قويدى.
Eira Med فارماتسەۆتيكالىق كەشەنى ەۋروپا وداعى ەلدەرى مەن اقش-تان كەلەتىن مەديتسينالىق بۇيىمدار يمپورتىن الماستىرۋمەن جانە تەحنولوگيانى ترانسفەرلەۋمەن بەلسەندى تۇردە اينالىسادى.
بۇعان قوسا پرەزيدەنتكە Kazecotech كاسىپورنىنىڭ عىلىمي-تەحنيكالىق جەتىستىكتەرى كورسەتىلدى. كەيىنگى ءۇش جىلدا كومپانيا ەڭ ۇزدىك الەمدىك ستاندارتتارعا ساي كەلەتىن 250-دەن اسا پروتەز دايىنداپ, 500 ادامدى Ottobock مۇگەدەك ارباسىمەن قامتاماسىز ەتكەن.
كورمەنى ارالاعان سوڭ قاسىم-جومارت توقاەۆ وتاندىق فارماتسەۆتيكا يندۋسترياسى مەن مەديتسينا بۇيىمدارى ءوندىرىسىن دامىتۋدىڭ ماڭىزىن اتاپ ءوتتى.
بۇدان كەيىن مەملەكەت باسشىسى Orbis Heavy Machinery ارنايى جانە كوممەرتسيالىق تەحنيكا زاۋىتىنا باردى. قاسىم-جومارت توقاەۆ KIA ماركالى ارنايى جانە كوممەرتسيالىق تەحنيكالار قۇراستىراتىن زاۋىت جۇمىسىمەن تانىستى.
كاسىپورىن ىسكە قوسىلعان 2022 جىلدان بەرى 700-دەن اسا اۆتوكولىك شىعارعان. وندىرىسكە قۇيعان ينۆەستيتسيانىڭ جالپى كولەمى 11 ملرد تەڭگەدەن استى. مۇندا وندىرۋشىلەردەن جەتكىزىلگەن بولشەكتەردى دانەكەرلەۋ, سىرلاۋ, شاناق مونتاجداۋ جۇمىستارى اتقارىلادى. سونىمەن قاتار كوممەرتسيالىق اۆتوكولىكتەرگە ارنالعان قوسىمشا جابدىقتار ءوندىرىسى جولعا قويىلعان. 240 مامان تۇراقتى جۇمىسپەن قامتىلعان.
كومپانيا وندىرىستىك قۋاتى مەن ءونىم ءتۇرىن كەڭەيتۋ ءۇشىن باسقا دا حالىقارالىق برەندتەرمەن كەلىسسوز جۇرگىزىپ جاتىر.
پرەزيدەنت ەڭبەك ۇجىمىنا تابىس تىلەپ, KIA Bongo اۆتوكولىگىنىڭ شاناعىنا ەستەلىك قولجازبا قالدىردى.
سونىمەن قاتار مەملەكەت باسشىسى KazPan سەندۆيچ-پانەلدەرىن وندىرەتىن زاۋىتتى ارالاپ كوردى. قاسىم-جومارت توقاەۆقا كاسىپورىن Kindus وڭتۇستىككورەيالىق ءوندىرىسىنىڭ جوعارى تەحنولوگيالى اۆتوماتتاندىرىلعان جەلىسىمەن جابدىقتالعانى جونىندە باياندالدى. زاۋىت جىلىنا 1,8 ملن شارشى مەترگە دەيىن ءونىم شىعارا الادى.
مۇندا زاماناۋي جابدىقتارمەن جانە تەحنولوگيامەن جۇمىس ىستەۋ ءۇشىن Kindus-تىڭ ينجەنەرلەردى وقىتۋ كۋرسىنان وتكەن 50 مامان ەڭبەك ەتەدى. بۇگىندە سەندۆيچ-پانەلدەر ونەركاسىپتىك, لوگيستيكالىق, اكىمشىلىك, سپورتتىق جانە باسقا دا نىسانداردىڭ قۇرىلىسىن جۇرگىزۋدە سۇرانىسقا يە ەكەنى ايتىلدى.
مەملەكەت باسشىسى ەڭبەك ۇجىمىمەن اڭگىمەلەسۋ بارىسىندا زاۋىتتىڭ باسەكەگە قابىلەتتىلىگىن ارتتىرۋعا باسىمدىق بەرەتىنىنە جانە ەلىمىزدىڭ ينفراقۇرىلىمىن دامىتۋعا زور ۇلەس قوساتىنىنا سەنىم ءبىلدىردى.
سونداي-اق پرەزيدەنت استاناداعى «مىڭجىلدىق» اللەياسىن اباتتاندىرۋ جۇمىستارىمەن تانىستى. قاسىم-جومارت توقاەۆقا اللەيانىڭ لاندشافتتى دامۋ جوسپارى كورسەتىلدى. جوسپار قالانىڭ وڭتۇستىك بولىگىندەگى 942 گەكتاردى قامتيدى. سارايشىق اۋدانىنداعى جەلىلىك ساياباق تۇرعىن ۇيلەر كەشەنى مەن الەۋمەتتىك نىساندار, مەكتەپتەر, تەمىرجول ۆوكزالى, سكۆەرلەر, كوشەلەر مەن جاياۋ جۇرگىنشىلەر جانە ۆەلوسيپەد جولدارىنىڭ اراسىن جالعايدى.
استانا قالاسىنىڭ اكىمى جەڭىس قاسىمبەك ۆوكزال ماڭىنداعى ساياباق اۋداننىڭ بەتكەۇستار مۇيىسىنە اينالاتىنىن ايتتى. مۇندا ويىن الاڭدارى, امفيتەاتر جانە اللەيالار سالۋ جوسپارلانعان.بىلتىر «قازاق ەلى» الاڭىندا اعاشتار ەگىلىپ, ديزاينەرلىك قاقپاقتار ورناتىلدى, شامدار مەن باسقا دا ساۋلەتتىك قالىپتار جاڭارتىلدى. بيىل ەڭ اۋەلى بايتۇرسىن ۇلى, نۇرماعامبەتوۆ, ناجىمەدەنوۆ كوشەلەرى مەن تاۋەلسىزدىك داڭعىلى ماڭىنداعى تۇرعىن ءۇي كەشەندەرىن قامتيتىن جەلىلىك ساياباقتى اباتتاندىرۋ جۇمىستارى باستالادى.
اكىمنىڭ ايتۋىنشا, قالا دامۋىندا تۇران داڭعىلىنىڭ باتىس جاعىنداعى GreenLine بۋلۆارى ەرەكشە ماڭىزعا يە. شاھاردىڭ حالىق تىعىز ورنالاسقان اۋدانىمەن جالعايتىن بۋلۆاردا ۆەلوجولدار, بالالار مەن سپورت الاڭقايلارى, تىنىعاتىن دەمالىس اۋماقتارى بولادى.
اتالعان جوبالار قالانى دامىتۋدىڭ كوپورتالىقتى مودەلىنە سايكەس جۇزەگە اسىرىلادى. ياعني تۇرعىن ءۇي, جۇمىس, قىزمەت كورسەتۋ مەن رەكرەاتسيا ورىندارى قولجەتىمدى ءارى ءبىر-بىرىنە جاقىن بولۋعا ءتيىس.
