سۋرەتتە: «مۇقاعالي ماقاتاەۆ» وقۋلارىنىڭ باس جۇلدەگەرلەرى نۇرمەرەل نۇرالى, اقنيەت مۇقمەتكارىم جانە الينا ناۋرىزباەۆا.
اۋىلدىڭ قاق تورىنەن ورىن العان اقىن ەركىن ءىبىتانوۆ اتىنداعى مادەنيەت ۇيىندە وتكەن ءداستۇرلى ءىس-شاراعا مۇزبالاق اقىن مۇقاعاليدىڭ ۇلى جۇلدىز بەن قىزى شولپان, كەلىنى باقىتگۇل باستاعان ۇرپاقتارى مەن شاكىرتتەرىن شىڭداعان ۇستازدار, ءتىل جاناشىرلارى, وبلىستىق ءبىلىم باسقارماسىنىڭ, اۋداندىق اكىمدىكتىڭ جاۋاپتى ماماندارى قاتىستى.
«بۇگىنگى ءىس-شاراعا سەبەپ – اكەمىزدىڭ پوەزياسى. سونى جاقسى كورگەننىڭ ارقاسىندا ءار شالعايدان جيىلىپ وتىرسىڭدار. ۇلى اقىننىڭ كىندىك قانى تامىپ, تابانى تيگەن قاسيەتتى قاراساز اۋىلى وسى. بيىك تاۋلارى, مىڭ بۇرالىپ اققان قاراساز دەگەن وزەنى بار. بالا كۇنىمىزدە وڭكەي قارا تامدار بولدى. اۋىل ءىشى كوشەنىڭ جوعارى جاعى, تومەنگى جاعى دەپ بولىنەتىن. سول تومەنگى جاعىندا ەكى بولمەلى قازاقتىڭ قارا تامىندا تۇردىق. ونى كوپتەگەن ەستەلىكتە جازىپ تا كەلەمىن. اكەمىزدىڭ بويىندا اللانىڭ بەرگەن تۋما تالانتى مەن دارىنى بولسا, ەكىنشى جاعىنان ولەڭ جازۋعا وزدەرىڭ كورگەندەي تابيعاتتىڭ دا اسەرى بولدى. مۇنارتقان كۇن, ەڭسەلى تاۋلار, قارا سۋىنا دەيىن تالانتىن قامشىلادى. وعان اقىن اتالارىڭنىڭ جانكەشتى ەڭبەكقورلىعى قوسىلدى, – دەگەن اقىن ۇلى ەستەن كەتپەس ەستەلىگىن ساباقتاي ءتۇستى. – الگى ەكى بولمەلى قارا تامنىڭ ءبىرى تولعان كىتاپ پەن گازەت بولاتىن. ول قۇندى دۇنيەلەردى الماتىدان, ماسكەۋدەن, لەنينگرادتان جازدىرىپ الاتىن. ءوز ءبىلىمىن ءوزى كوتەرگەن جاپ-جاس جىگىت بولدى. وعان ەشكىم «مىنانى وقى» دەپ ۇيرەتپەگەن. ءوزىنىڭ بويىنداعى تۋما دارىنىمەن, قۇلشىنىسىمەن قازاق پوەزياسىنا كەلگەن ادام. بىلەسىڭدەر, اكەسىمەن قاراسازدىڭ قارا توپىراعىندا قوشتاستى. اكەسى سۇلەيمەن اتامىز مايدانعا كەتتى. ودان سوڭ, ءوزى ولەڭىندە جىرلاعانداي, بالالىق شاق بولعان جوق, سوقاعا ەرتە جەگىلدى. بالالىق, جاستىق شاعى وسى اۋىلدا ءوتتى. قاراسازدىڭ ورتا مەكتەبىندە ساباق بەردى ول كىسى. سەندەر دە سول قاراسازدىڭ اۋاسىمەن تىنىستاپ وتىرعان باقىتتى بالاسىڭدار دەگىم كەلەدى. اقىندى وقۋ ءبىر باسقا, ونىڭ وسكەن ورتاسىن كورۋ – ول دا وزگەشە اسەر قالدىرادى. سول ارقىلى مۇقاعالي پوەزياسىنا تەرەڭىرەك بويلايسىڭدار. «قورشاعان ورتاسى قانداي بولدى ەكەن؟» دەگەن اۋەستىك سەزىمگە جاۋاپ الىپ وتىرسىڭدار. مەن مۇقاعاليدىڭ ۇلكەن ۇلى بولامىن. ومىرىمە اكەم تىكەلەي اسەر ەتتى. ول ۇلكەن جۇرەكتى ادام بولاتىن. سەندەر سياقتى جاستاردى وتە جاقسى كوردى. ولاردان ءۇمىت كۇتتى, بولاشاعى بولارىنا سەندى, بالالار», – دەگەن جۇلدىز مۇقاعالي ۇلى اكەسىنە ارناپ جازعان ولەڭىن وقىپ بەردى.
تەبىرەنىسكە تولى جىردان قۋات العان جاس ورەندەر بۇركەنشىك اتپەن تانىستىرىلىپ, جالىندى جىر سايىسىن باستاپ كەتتى. ولاردىڭ ونەرلەرىن تارازىلاۋعا كيمەپ ۋنيۆەرسيتەتى ء«بىلىم بەرۋ جانە گۋمانيتارلىق عىلىمدار» فاكۋلتەتىنىڭ اسسيستەنت-پروفەسسورى, فيلولوگيا عىلىمدارىنىڭ كانديداتى نۇرايشا بەكەەۆا, «دارىن» مەملەكەتتىك جاستار سىيلىعىنىڭ لاۋرەاتى, اقىن ايتۋعان جەتەباەۆ, فيلولوگيا عىلىمدارىنىڭ كانديداتى, پروفەسسور شاريديار ءۋاليحانوۆ, م.دۋلاتي اتىنداعى تاراز ۋنيۆەرسيتەتىنىڭ دوتسەنتى, فيلولوگيا عىلىمدارىنىڭ كانديداتى جازيرا ابدۋاليەۆا, اقىن, جۋرناليست ايتبەك تۇرسىنباەۆ قازىلىق ەتتى.
رەسپۋبليكانىڭ 16 وبلىس, 3 قالاسىنان كەلگەن 63 قاتىسۋشى ءۇش توپقا ءبولىنىپ, ولەڭ وقۋ, جازۋداعى ونەرلەرىن ورتاعا سالدى. جىر سايىسىنىڭ «ايتىپ وتكەن اقىندا ارمان بار ما؟» اتتى العاشقى باعىتىندا ۇمىتكەرلەر اقىن جىرىن جاتقا ءارى مانەرلەپ وقۋدان سىنعا ءتۇستى. وندا قازىلار جاتتاعان ولەڭدەرىنىڭ سانىن ەسەپكە الدى. ساحنا تورىندە اقىن جىرىن وقۋدا كوسىلە شاپقان جۇيرىكتى كەز كەلگەن تۇستا كىلت توقتاتىپ, كەلەسى ولەڭ جولىن باستاپ بەرگەن قازىلاردىڭ تالابىنان جاڭىلماي جالعاستىرىپ اكەتۋدەگى شەبەرلىكتەرى تىڭدارماندى ءتانتى ەتتى.
ال «جىر ەستافەتاسى» باعىتى بويىنشا جارىسقا قاتىسقان ۇمىتكەرلەر «اققۋلار ۇيىقتاعاندا», «رايىمبەك! رايىمبەك!», «التاي-اتىراۋ» پوەمالارىن جاتقا ءارى ناقىشىنا كەلتىرە وقۋدان باسەكەگە ءتۇستى.
ەڭ سوڭعى «كوكىرەگىمدە جىر ساۋلەسى مازدايدى» اتتى ءۇشىنشى بولىمدە جاس ورەندەر وزدەرىنىڭ ءتول تۋىندىلارىن جانە ەركىن تاقىرىپتا ولەڭ وقۋداعى قارىم-قابىلەتىن كورسەتتى.
بابى مەن باعى كەلىسكەن ولەڭسۇيەر ورەندەردىڭ ونەرىن قازىلار القاسى ءادىل باعالاپ, شىن تالانتتى تانۋعا, ولاردىڭ ءبىلىم-بىلىگى مەن ولەڭگە دەگەن ىنتا-ىقىلاسىن, تالابى مەن تالعامىن قالت جىبەرمەي قاداعالاپ, ءۇش باعىت بويىنشا رەسپۋبليكالىق بايقاۋدىڭ قورىتىندىسىن شىعاردى.
العاشقى «ايتىپ وتكەن اقىندا ارمان بار ما؟» باعىتى بويىنشا باس جۇلدەنى اتىراۋ قالاسىنداعى №16 مەكتەپ-گيمنازيانىڭ 10-سىنىپ وقۋشىسى نۇرمەرەل نۇرالى يەلەندى. ال ءبىرىنشى ورىندى الماتى قالاسىنداعى №108 مەكتەپ-گيمنازيانىڭ 9-سىنىپ وقۋشىسى باتىرحان قۇدايبەرگەن قانجىعالادى.
«جىر ەستافەتاسىندا» ورتاسىنان وزا شاۋىپ, توپ جارعان قاراعاندى قالاسىنداعى №61 ورتا مەكتەپتىڭ وقۋشىسى الينا ناۋرىزباەۆا باس جۇلدەنى ەنشىلەسە, ءبىرىنشى ورىندى ماڭعىستاۋ وبلىسى شەتپە ليتسەيىنىڭ 10-سىنىپ وقۋشىسى باراحات ورازالى جەڭىپ الدى.
جىر سايىسىنىڭ سوڭعى ءبولىمى «جۇرەگىمدە جىر ساۋلەسى مازدايدى» اتتى جاس تالانتتاردىڭ تالاپتارى تارازىلانعان سايىستا مۇقاعالي اتالارىنىڭ ءىزىن جالعاستىرىپ, ولەڭ ولكەسىندە وزىندىك قولتاڭباسىن ءتۇزىپ كەلە جاتقان الماتى وبلىسى رايىمبەك اۋدانى ا.بارمانبەك ۇلى اتىنداعى ورتا مەكتەپتىڭ 10-سىنىپ وقۋشىسى اقنيەت مۇقامەتكارىم باس جۇلدەنى جەڭىپ الىپ, مەرەيىن ۇستەم ەتتى. ءبىرىنشى ورىن اباي اتىنداعى رممي-ءدىڭ 10-سىنىپ وقۋشىسى بولات احمەتكە بۇيىردى.
جىر سايىسىنداعى جۇلدەگەرلەرگە ديپلومدار مەن اقشالاي سىيلىقتار تابىس ەتىلدى. سونىمەن قاتار بايقاۋدا ەرەكشە بەلسەندىلىك تانىتقان جاس تالانتتار دا نازاردان تىس قالماي, «م.ماقاتاەۆ اتىنداعى حالىقارالىق قوردىڭ» جانە وبلىستىق ءبىلىم باسقارماسىنىڭ ماقتاۋ قاعازدارىمەن ماراپاتتالدى.
الماتى وبلىسى
