«تەمىر تايسون» ەندى ءوزىنىڭ كەلەسى جەكپە-جەگىن ەلىمىزدە وتكىزۋى مۇمكىن. بۇل اقپاراتتى «الاش پرايد» پروموۋشەنىنىڭ پرەزيدەنتى ءالىمجان بەكتاەۆ تاراتىپ وتىر. «بيىلعى جەلتوقساندا اسا اۋىر سالماقتاعى الەمنىڭ ءابسوليۋتتى ەكس-چەمپيونى, اتاعىنان ات ۇركەتىن مايك تايسوندى ەلىمىزگە شاقىرتىپ, كەرەمەت ءبىر بوكس كەشىن ۇيىمداستىرۋدى كوزدەپ وتىرمىز. قازىر وسى باعىتتا جۇمىس جۇرگىزىلىپ جاتىر. بۇيىرتسا, ول رەسەيدىڭ ماقتانىشى, ارالاس جەكپە-جەكتىڭ حاس شەبەرى فەدور ەمەليانەنكومەن ايقاسادى» دەيدى ءا.بەكتاەۆ.
ەگەر وسى جوسپار جۇزەگە اسسا, ەلىمىزدىڭ جانكۇيەرلەرى اتى اڭىزعا اينالعان قوس ءدۇلدۇلدىڭ ايقاسىن تاماشالاپ, وسى جەكپە-جەكتەن جاقسى ءبىر اسەر الاتىنى ءسوزسىز. سەبەبى ەكەۋى دە ءوز ءداۋىرىنىڭ تەڭدەسسىز تۇلعاسى. مايك تايسون 1986 جىلعى 22 قاراشادا ترەۆور بەربيكتى ەكىنشى راۋندتا ۇرىپ جىعىپ, الەم چەمپيونى اتاندى. ول كەزدە مايك 20 جاستا ەدى. ءسويتىپ, ونىڭ ەسىمى وسىنداي دارەجەگە جەتكەن ەڭ جاس كاسىپقوي بوكسشى رەتىندە تاريحتا قالدى. 1985–1989 جىلدار ارالىعىندا 37 رەت رينگكە شىققان اقش-تىڭ ارلانى بارلىق باسەكەدە باسىمدىق تانىتتى. تايسون جالپى 59 كەزدەسۋدىڭ 50-ىندە جەڭىسكە جەتتى. 44 قارسىلاسىن نوكاۋتقا جىبەردى. 7 مارتە ۇتىلىپ, تاعى ەكى باسەكەنىڭ ناتيجەسى ەسەپكە الىنعان جوق.
فەدور ەمەليانكونىڭ دا اتاعى الىسقا جايىلعان. ول جاۋىنگەرلىك سامبودان الەمنىڭ بىرنەشە دۇركىن چەمپيونى, ارالاس جەكپە-جەكتەن «پرايدتىڭ» چەمپيوندىق بەلبەۋىنىڭ يەگەرى. 2001–2009 جىل ارالىعىندا «سوڭعى يمپەراتور» بىردە-ءبىر ايقاستا جەڭىلگەن جوق. سول سەگىز جىل ارالىعىندا 27 قارسىلاسىن سۇلاتىپ سالدى. بارلىعى 47 كەزدەسۋ وتكىزگەن ەمەليانەنكو سونىڭ 40-ىن ءوز پايداسىنا شەشتى. 31 باسەكەدە ايقىن باسىمدىق تانىتتى. بۇل – وتە كەرەمەت كورسەتكىش.
