«ۇلكەن دۋلىعا» ء(ۇدت) ساناتىنداعى وزگە جارىستارعا قاراعاندا قازاق جانكۇيەلەرى ءۇشىن «ۋيمبلدوننىڭ» ءجونى بولەك. ولاي دەۋگە نەگىز, ءدال وسى دودادا جەرلەستەرىمىز ءبىر ەمەس, بىرنەشە رەت جەڭىس تويىن تويلادى. العاش رەت 2010 جىلى ياروسلاۆا شۆەدوۆا امەريكالىق ۆانيا كينگپەن بىرگە تۇماندى البيون ەلىندەگى ءتۋرنيردىڭ جۇپتىق سايىسىندا باس جۇلدەنى ولجالادى. فينالدا ولار رەسەيلىك ەلەنا ۆەسنينا مەن ۆەرا زۆونارەۆانى ۇتتى. ءسويتىپ, ياروسلاۆانىڭ ەسىمى ءۇدت-دە توپ جارعان قازاقستاننىڭ تۇڭعىش تەننيسشىسى رەتىندە تاريحتا قالدى. ارادا بىرەر اي وتكەن سوڭ شۆەدوۆا مەن كينگ جۇبى US Open باسەكەسىنىڭ جەڭىمپازى اتاندى. 2016 جىلى ماجارستاندىق تيمەيا بابوشپەن جۇپ قۇرعان وتانداسىمىز فينالعا جولداما الدى. الايدا شەشۋشى تۇستا ولار اقش-تىڭ اتاقتى اپالى-ءسىڭلىلى ويىنشىلارى سەرەنا مەن ۆينۋس ءۋيليامستىڭ قارقىنىنا شىداس بەرە المادى.
يا.شۆەدوۆا جەكەلەگەن سىندا دا جامان ويناعان جوق. 2016 جىلى «ۋيمبلدوننىڭ» شيرەك فينالىنا شىقتى. بىراق بۇل مەجەدە وتانداسىمىزدىڭ ۆينۋس ۋيليامسكە ءالى جەتپەدى. زارينا دياس (2014, 2015 جىلدارى), ميحايل كۋكۋشكين (2019), الەكساندر بۋبليك (2023) ءتورتىنشى كەزەڭگە دەيىن جەتتى.
2022 جىلى ەلىمىزدىڭ تەننيسىندە تاريحي وقيعا تىركەلدى. 23 جاستاعى ەلەنا رىباكينا ۇلىبريتانيادا ايدى اسپانعا ءبىر-اق شىعاردى. العاشقى اينالىمداردا كوكو ۆاندەۆەگە (اقش), بيانكا اندرەەسكۋ (كانادا), چجەن تسينۆەن (قىتاي), پەترا ءمارتيچتى (حورۆاتيا) جولىنان ىعىستىرعان جەرلەسىمىز شيرەك فينالدا ايلا ءتومليانوۆيچتى (اۋستراليا), جارتىلاي فينالدا سيمونا حالەپتى (رۋمىنيا) قاپى قالدىردى. باس جۇلدە ءۇشىن باسەكەدە رىباكينا ءۇش سەتتىك سايىستا ءتۋنيستىڭ مىقتىسى ونس جابەردى جەڭدى. وسىلايشا, ەلەنا وتاندىق تەننيسشىلەر اراسىنان العاشقى بولىپ وسىنداي وراسان زور تابىسقا قول جەتكىزدى.
جالپى, «ۋيمبلدوننىڭ» 148 جىلدىق تاريحى بار. ەرلەر اراسىندا مولىنان ولجاعا كەنەلگەن جامپوزدار كوشىن اتاعى جەر جارعان رودجەر فەدەرەر (2003–2007, 2009, 2012, 2017) باستاپ تۇر. شۆەيتساريا شەبەرىنە بۇل بەلەس 8 مارتە باعىندى. ۋيليام رەنشوۋ ( ۇلىبريتانيا, 1981–1986, 1989), پيت سامپراس (اقش, 1993–1995, 1997–2000), نوۆاك دجوكوۆيچ (سەربيا, 2011, 2014–2015, 2018-2019, 2021–2022) 7 جارىستا جەڭىمپازى اتاندى.
ايەلدەر باسەكەسىندە مارتينا ناۆراتيلوۆانىڭ (1978, 1979, 1982–1987, 1990) مەرەيى ۇستەم. چەحوسلوۆاكيادا تۋىپ, كەيىننەن اقش-قا قونىس اۋدارعان ويىنشى 9 تۋرنيردە توپ جاردى. حەلەن ۋيللز-مۋدي (اقش, 1927–30, 1932–33, 1935, 1938) – 8, دوروتەيا لامبەرت-چامبەرس ( ۇلىبريتانيا, 1903–1904, 1906, 1910–1911, 1913–1914), شتەففي گراف (گەرمانيا, 1988–1989, 1991–1993, 1995–1996), سەرەنا ۋيليامس (اقش, 2002–2003, 2009–2010, 2012, 2015–2016) – 7, بلانش بينگلي ( ۇلىبريتانيا, 1886, 1889, 1894, 1897, 1899, 1900) مەن بيللي دجين كينگ (اقش, 1961–1962, 1965, 1967–1968, 1971–1973, 1979) – 7 رەتتەن الدىنا جان سالمادى.
جەكەلەگەن, جۇپتىق جانە ارالاس جۇپتار اراسىنداعى باسەكەلەردى قوسا الساق, ەڭ كەرەمەت كورسەتكىش بيللي دجين كينگ پەن مارتينا ناۆراتيلوۆاعا تيەسىلى. ولاردىڭ ارقايسىسى 20 رەتتەن تەڭدەسسىز دەپ تانىلدى. ەرلەر سايىسىندا لوۋرەنس دوحەرتي دارا تۇر. اعىلشىن تەننيسشىسىنىڭ 13 مارتە مەرەيى ۇستەم بولدى.
ۋيمبلدوندا تالاي تاڭدايقاعارلىق وقيعالار مەن كەرەمەت كورسەتكىشتەر تىركەلدى. ماسەلەن, 2010 جىلى تۇساۋكەسەر كەزدەسۋدە امەريكالىق دجون يزنەر مەن فرانتسيالىق نيكوليا مايۋ كۇش سىناستى. باسەكە 11 ساعات 05 مينۋتقا سوزىلدى. بۇل – الەمدىك تەننيس تاريحىندا بۇرىن-سوڭدى بولماعان وقيعا. وسىلايشا, بىرەسە ءۇزىلىپ, بىرەسە جالعاسقان ويىن ءۇش تاۋلىككە سوزىلىپ, اقىرىندا يزنەر جەڭىسكە جەتتى.
ءبىر عاجابى, فرانتسيالىق جان روبەر بوروترا 35 تۋرنيردە باق سىناعان ەكەن. العاش رەت ول 1922 جىلعى جارىستا بوي كورسەتسە, سوڭعى رەت 1964 جىلى كورتقا شىقتى. بوروترا ءبىر عانا «ۋيمبلدوندا» 42 جىل بويى ويناعان. اۋليە مارتين مۇيىسىندە دۇنيەگە كەلگەن مارقاسقانىڭ قول جەتكىزگەن تابىسى دا تولاعاي. ول «ۇلكەن دۋلىعا» ساناتىنداعى دودالاردا 14 رەت تەڭدەسسىز دەپ تانىلدى. سول سەكىلدى ۇلىبريتانيالىق ارتۋر گور مەن مارتينا ناۆراتيلوۆا «ۋيمبلدوندا» 30 رەتتەن باق سىنادى.
2018–2022 جىلدار ارالىعىندا نوۆاك دجوكوۆيچكە تەڭ كەلەر ەشكىم تابىلماسا, سوڭعى ەكى جارىستا كارلوس الكاراستىڭ اسىعى الشىسىنان ءتۇستى. يسپانيانىڭ دارىندى جاسى ەكى رەتىندە دە فينالدا ءدال سول دجوكوۆيچتى جولىنان ىعىستىردى. بۇرىمدىلار باسەكەسىندە چەحيانىڭ تەننيسشىلەرى شاشالارىنا شاڭ جۇقتىرمادى. الدىڭعى جىلى ماركەتا ۆوندروۋشوۆا مىسىرلىق ونس جابەردى جەڭسە, بىلتىر باربورا كرەيچيكوۆا يتاليالىق جاسمين ءپاولينيدى قاپى قالدىردى.
بىلتىر ەلىمىزدىڭ سپورتشىلارى اراسىنان ەڭ جاقسى ناتيجەگە ە.رىباكينا قول جەتكىزدى. ەلەنا-گاربريەلە رۋسە (رۋمىنيا), لاۋرا زيگەمۋند (گەرمانيا), كارولينا ۆوزنياتسكي (دانيا), اننا كالينسكايا (رەسەي), ەلينا سۆيتوليناعا (ۋكراينا) سان سوقتىرعان ەلەنا جارتىلاي فينالدا باربورا كرەيچيكوۆادان جەڭىلدى. يۋليا پۋتينتسەۆا ءتورتىنشى كەزەڭدە ەلەنا وستاپەنكوعا (لاتۆيا) ەسە جىبەردى. ا.بۋبليك ءۇشىنشى, ا.شەۆچەنكو ەكىنشى اينالىمنان اسا المادى.
