قالامگەردىڭ ماسكەۋدەگى كەشى

مەملەكەتتىك جانە م.شولوحوۆ اتىنداعى حالىقارالىق سىيلىقتاردىڭ لاۋرەاتى, قازاقستاننىڭ ەڭبەك سىڭىرگەن قايراتكەرى, رەسەي ادەبيەتى اكادەمياسىنىڭ اكادەميگى ءسابيت دوسانوۆتىڭ 75 جاسقا تولۋىنا وراي رەسەي جازۋشىلار وداعى جانە «قازاق ءتىلى», «مۇراگەر» قوعامدىق ۇيىمدارى ۇيىمداستىرعان جازۋشىنىڭ شىعارماشىلىق كەشى رەسەي فەدەراتسياسىنىڭ بەيبىتشىلىك جانە كەلىسىم سارايىندا ءوتتى. كەشتە ءسوز سويلەگەن سىنشى, اكادەميك فەليكس كۋزنەتسوۆ, رەسەي جازۋشىلار وداعىنىڭ ءبىرىنشى حاتشىسى, اقىن گەننادي يۆانوۆ, تاريحشى, ادەبيەتشى ۆالەنتين وسيپوۆ, تاجىكستاننىڭ حالىق جازۋشىسى شاۆقات نيازي, جازۋشى, رەسەي ءباسپاسوز كلۋبىنىڭ پرەزيدەنتى ۆالەري پوۆولياەۆ, مەملەكەت جانە قوعام قايراتكەرى, گەنەرال-لەيتەنانت سەرگەي سوكولوۆ, رەسەيدەگى قازاقستان ەلشىسىنىڭ قىزمەتكەرى ۆيكتور تەمىرباەۆ جانە باسقا دا شەشەندەر ەسىمى مەن ەڭبەگى ءسابيت دوسانوۆ شىعارماشىلىعىنىڭ ادەبي كەڭىستىكتى كەڭەيتىپ, حالىقتار دوستىعىنا, بەيبىتشىلىك پەن كەلىسىم يدەيالارىنا قىزمەت ەتىپ وتىرعانىن ەرەكشە اتاپ ءوتتى. كەشتە ءسابيت دوسانوۆقا سەرگەي ەسەنين اتىنداعى «زولوتايا وسەن» سىيلىعىنىڭ ديپلومى مەن وردەنى تابىستالدى, سونىمەن بىرگە ول ۆاسيلي شۋكشين مەدالىمەن ماراپاتتالدى. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ جازۋشىنى ماسكەۋدەگى شىعارماشىلىق كەشىمەن قۇتتىقتاعان جەدەلحاتى وقىلدى. ءسابيت دوسانوۆتىڭ ماسكەۋدە وتكەن شىعارماشىلىق كەشىنە گەنەرال-پولكوۆنيك, رەسەي جازۋشىلار وداعىنىڭ مۇشەسى يۋري ەفيموۆ, كورنەكتى اقىن لەونيد موناستىرسكي, بەلگىلى ارميان ادەبيەتشىسى ستانيسلاۆ وگانيان, حالىقتار دوستىعى ۋنيۆەرسيتەتىنىڭ پرورەكتورى, پروفەسسور نۇر قيراباەۆ, «موسكوۆسكي ليتەراتور» گازەتىنىڭ باس رەداكتورى يۆان گولۋبنيچي, رەسەي مەن قازاقستان جانە قىرعىزستاننىڭ ەلگە تانىمال كورنەكتى تۇلعالارى قاتىناستى. «ەگەمەن-اقپارات».