جوبا بويىنشا ۇلتتىق قوردىڭ ينۆەستيتسيالىق كىرىسىنىڭ 50%-ى جىلىنا ءبىر رەت 2006 جىلى جانە ودان كەيىن تۋعان, قازاقستان رەسپۋبليكاسىنىڭ ازاماتى بولىپ ەسەپتەلەتىن بالالار اراسىندا بولىنەدى. 2024 جىلدان بەرى ەلىمىزدە تۋعان ءاربىر بالاعا ۇلتتىق قوردان ارنايى شوت اشىلىپ, جىل سايىن ونىڭ اتىنا قاراجات اۋدارىلا باستادى. قارجى 18 جاسقا تولعاندا وقۋعا نەمەسە تۇرعىن ۇيگە پايدالانۋعا بەرىلەدى.
2025 جىلعى 1 ماۋسىمداعى جاعداي بويىنشا 2024 جىلدىڭ 1 اقپانىنان باستاپ «بىرىڭعاي جيناقتاۋشى زەينەتاقى قورى» اق 13,34 ملن اقش دوللارىنا 108 694 ءوتىنىش ورىنداپ, ءوتىنىش بەرۋشىلەردىڭ بانكتىك شوتتارىنا اۋدارۋ ءۇشىن ۋاكىلەتتى وپەراتورلارعا جولدادى. ونىڭ ىشىندە تۇرعىن ءۇي جاعدايلارىن جاقسارتۋ ماقساتىندا 7,95 ملن اقش دوللارىنا 64 325 ءوتىنىش, ءبىلىم الۋ اقىسىن تولەۋ ءۇشىن 5,38 ملن اقش دوللارىنا 44 369 ءوتىنىش ورىندالدى. ەستەرىڭىزگە سالا كەتەيىك, نىسانالى جيناقتاردى الۋشى بارلىق سومانى نەمەسە ونىڭ ءبىر بولىگىن پايدالانۋعا قۇقىلى, اقشانىڭ پايدالانىلماعان قالدىعى نىسانالى جيناقتاۋ شوتىندا قالا بەرەدى.
تۇرعىن ءۇي جاعدايلارىن جاقسارتۋ اياسىندا جاستار قارجىلارىن كوبىنە: ودان ءارى جيناقتاۋ ءۇشىن تۇرعىن ءۇي قۇرىلىسى جيناقتارىنداعى سالىمدى تولىقتىرۋ (7,77 ملن اقش دوللارىنا 62 749 ءوتىنىش ورىندالدى), تۇرعىن ءۇي ساتىپ الۋعا يپوتەكالىق تۇرعىن ءۇي قارىزىن الۋ ءۇشىن باستاپقى جارنانى ەنگىزۋ (57,78 مىڭ اقش دوللارىنا 496 ءوتىنىش), ازاماتتىق-قۇقىقتىق مامىلەلەر بويىنشا مەنشىككە تۇرعىن ءۇي ساتىپ الۋ (44,69 مىڭ اقش دوللارىنا 407 ءوتىنىش) ماقساتىندا پايدالاندى.
ءبىلىم الۋ اقىسىن تولەۋ جونىندەگى ەڭ تانىمال ماقساتتار: ەل اۋماعىندا ورنالاسقان ءبىلىم ۇيىمدارىنىڭ ءبىلىم بەرۋ قىزمەتتەرىنە ۇلەستەرمەن ء(اربىر اكادەميالىق كەزەڭ نەمەسە وقۋ جىلى ءۇشىن) نەمەسە ءبىر رەت تولىق كولەمدە (بۇكىل وقۋ مەرزىمى ءۇشىن) اقى تولەۋ (4,79 ملن اقش دوللارىنا 39 065 ءوتىنىش), ءبىلىم الۋ ءۇشىن جيناقتاۋ سالىمى تۋرالى شارت بويىنشا ءبىلىم الۋ جيناقتاۋ سالىمىن تولىقتىرۋ (437,15 مىڭ اقش دوللارىنا 3 935 ءوتىنىش), شەتەلدىك ءبىلىم بەرۋ ۇيىمدارىنىڭ وقىتۋ قىزمەتتەرىنە ۇلەستەرمەن ء(اربىر اكادەميالىق كەزەڭ نەمەسە وقۋ جىلى ءۇشىن) نەمەسە تولىق كولەمدە بىرجولعى (بۇكىل وقۋ مەرزىمى ءۇشىن) اقى تولەۋ (122,91 مىڭ اقش دوللارىنا 1 113 ءوتىنىش ورىندالدى) بولدى.
«بجزق» اق ءمالىم ەتكەندەي, 2023 جىلى بارلىق نىسانالى جيناق سالىمشىلارىنا 100,52 اقش دوللارى, 2024 جىلى 129,38 اقش دوللارى ەسەپتەلگەن. 2006 جىلى تۋعان ازاماتتاردى قوسپاعاندا, 2023 جىلى ۇلتتىق قوردان العاشقى قاراجات ەسەپتەلگەن بالالارعا بيىلعى جىلى 3,04 اقش دوللارى مولشەرىندە ينۆەستيتسيالىق كىرىس جازىلعان. ناتيجەسىندە, 2006 جىلى تۋعان بالانىڭ نىسانالى جيناعى 100,52 اقش دوللارىنا تەڭ بولسا, 2007 جىلى تۋعان بالانىڭ نىسانالى جيناقتاۋ شوتىندا 232,94 اقش دوللارى جيناقتالدى.
كامەلەتكە تولعان ازاماتتار وزدەرىنىڭ نىسانالى جيناق تۋرالى اقپاراتتى بجزق-نىڭ نەمەسە ەلەكتروندىق ۇكىمەتتىڭ ينتەرنەت-رەسۋرستارىنداعى جەكە كابينەتى ارقىلى ءوز بەتىنشە الۋعا ءتيىس, سودان كەيىن ۋاكىلەتتى وپەراتورعا اقش دوللارىندا بانكتىك شوت اشىپ, تۇرعىن ءۇي جاعدايلارىن جاقسارتۋ نەمەسە ءبىلىم الۋ اقىسىن تولەۋگە نىسانالى جيناق تولەمىنە ونلاين-ءوتىنىش بەرۋ ءۇشىن جۇگىنە الادى.
«ۇلتتىق قور – بالالارعا» – بولاشاققا جاسالعان قامقورلىق, ەكونوميكالىق ادىلەتتىلىك پەن ۇرپاق ساباقتاستىعىنىڭ ناقتى كورىنىسى. باعدارلاما ارقىلى ءار بالا ەل بايلىعىنان ۇلەس الىپ, بايىپتى ءبىلىم الۋعا نەمەسە جەكە ومىرگە قادام باسۋعا ماتەريالدىق نەگىز قالىپتاستىرادى, ءوز ءىسىن باستاۋعا نەمەسە جوعارى وقۋ ورنىن تاڭداۋعا مۇمكىندىك الادى. بولاشاق بۋىندى قارجىلىق قولداۋ – ادامي كاپيتالدى دامىتۋ, ساۋاتتى, الەۋەتى جوعارى ۇرپاق تاربيەلەۋدىڭ تەتىگى. جاس قاۋىم ەرتە جاستان جەكە قارجىسىن باسقارۋعا ۇيرەنىپ, جيناق جاساۋ مەن دۇرىس جۇمساۋ داعدىلارىن مەڭگەرەدى.
