فوتو: ەرلان ومار
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆتىڭ ايتۋىنشا, جوبا مەملەكەت باسشىسىنىڭ 2024 جىلعى 21 قاراشاداعى جارلىعىنا سايكەس ازىرلەنگەن جانە ونىڭ باستى ماقساتى – قالا مەن اۋىل اراسىنداعى تسيفرلىق تەڭسىزدىكتى قىسقارتۋ.
«جوبانىڭ ماقساتى – اۋىلدىق ەلدى مەكەندەردە تەلەكوممۋنيكاتسيالىق ينفراقۇرىلىمدى دامىتۋ, ۇيلەرگە دەيىن جەرگىلىكتى جەلى تارتۋ, جەكە ينۆەستيتسيالاردى ىنتالاندىرۋ جانە شاعىن وپەراتورلاردى قولداۋ», دەدى مينيستر.
جوبا شامامەن 2,3 ميلليون ازامات تۇراتىن (500 مىڭنان استام ءۇي شارۋاشىلىعى) 1123 اۋىلدى قامتيدى جانە 2025 جىلدان 2027 جىلعا دەيىن 3 جىل ىشىندە جۇزەگە اسىرىلادى.
ينۆەستيتسيالاردىڭ جالپى كولەمى شامامەن 84 ملرد تەڭگەنى قۇرايدى, مۇندا كۇردەلى شىعىنداردىڭ 50%-عا دەيىنگى بولىگى جوبا شەڭبەرىندە سۋبسيديالاناتىن بولادى:
- 42 ملرد تەڭگە (50%) — جەكە بايلانىس وپەراتورلارىن قارجىلاندىرۋ;
- 42 ملرد تەڭگە (50%) — دۇنيەجۇزىلىك بانكتىڭ نەسيەسى.ءبىر جولعى كوميسسيا — 0,25%;
نەسيە شارتتارى:
- بىرجولعى كوميسسيا – 0,25%;
- سىياقى مولشەرلەمەسى — جىلدىق شامامەن 0,9%;
- تولەمدەر — جىلىنا ەكى رەت: 15 ءساۋىر جانە 15 قازان;
- قارىز الۋشىنىڭ وكىلى — قازاقستان رەسپۋبليكاسىنىڭ قارجى مينيسترلىگى.
جاسلان ماديەۆتىڭ مالىمەتىنشە, كونكۋرسقا كەمىندە 350 ابونەنتى بار جانە قارجىلىق تۇراقتىلىعى دالەلدەنگەن ۇلتتىق بايلانىس وپەراتورلارى قاتىسا الادى. ءبىر جوباعا بەرىلەتىن سۋبسيديانىڭ ەڭ جوعارى مولشەرى – 250 ملن تەڭگە.
«بۇل جوبانى جۇزەگە اسىرۋ اۋىلداعى شاعىن جانە ورتا بيزنەستىڭ دامۋىنا, سالىق تۇسىمدەرىنىڭ 2 ملرد تەڭگەگە ارتۋىنا, 800-دەن استام ۋاقىتشا جانە 200-دەن استام تۇراقتى جۇمىس ورنىن اشۋعا ىقپال ەتەدى», دەدى مينيستر.
جوبا قازاقستاننىڭ تەحنولوگيالىق ەگەمەندىگىن نىعايتىپ, اۋىلداعى ازاماتتار ءۇشىن زاماناۋي ينتەرنەت پەن «اقىلدى» قۇرىلعىلاردى قولجەتىمدى ەتەدى.
