ۋنيۆەرسيتەت وقىتۋشىلارىنىڭ ايتۋىنشا, اتالعان جەر ۋچاسكەسى جوعارى وقۋ ورنىنىڭ مەنشىگىنەن زاڭسىز شىعارىلعان. ستۋدەنتتەر قالاشىعىنىڭ قاق ورتاسىندا تۇرعىن ءۇي كەشەنىن سالۋ جوسپارىنا الاڭداعان ۋنيۆەرسيتەت ۇجىمى «Amanat» پارتياسى جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەسكە شاعىم تۇسىرگەن. وسىعان وراي پارتيا مۇشەلەرى الماتىداعى قازۇازۋ اۋماعىندا كوشپەلى جيىن وتكىزدى. ولاردىڭ ايتۋىنشا, قۇقىق قورعاۋ ورگاندارى ءتيىستى شارا قابىلداۋعا اسىعار ەمەس.
كەڭەس توراعاسى, ءماجىلىس دەپۋتاتى ەرلان سايروۆ بۇل 2000-جىلداردان بەرى سوزىلىپ كەلە جاتقان ماسەلە ەكەنىن اتاپ ءوتتى. سول كەزەڭدە ۋنيۆەرسيتەت مەنشىگىنەن ءۇش جاتاقحانا, بەس ءىرى زەرتحانا جانە جالپى اۋماعى 6 گەكتارعا جۋىق بىرنەشە جەر تەلىمى شىعارىلعان. سولاردىڭ ءبىرى كامپۋستىڭ ءدال ورتاسىندا ورنالاسقان 96 سوتىق جەر تەلىمى بۇگىندە داۋ-دامايعا اينالعان. ۋنيۆەرسيتەتتىڭ مالىمەتىنشە, «RAMS Kazakhstan» قۇرىلىس كومپانياسى بۇل جەرگە بەس كوپقاباتتى تۇرعىن ءۇي سالۋدى جوسپارلاعان.
– ءبىز مۇندا جاي سوزبەن ەمەس, ناقتى ىسپەن ماسەلەنىڭ ءمان-جايىن انىقتاۋ ءۇشىن كەلدىك. بۇل – جەكە تارتىس ەمەس, مەملەكەتتىك ماڭىزى بار ماسەلە. «Amanat» پارتياسى بۇل ماسەلەنى شەشۋدى كوپتەن بەرى تالاپ ەتىپ كەلەدى. الايدا پروكۋراتۋرا, يندۋستريا جانە قۇرىلىس مينيسترلىگى, جەر رەسۋرستارىن باسقارۋ كوميتەتى ناقتى شارا قابىلداماي وتىر. مۇنى مەملەكەت باسشىسى قاسىم-جومارت توقاەۆتىڭ زاڭ ۇستەمدىگى مەن ءتارتىپتى قامتاماسىز ەتۋ ساياساتىنا اشىق تۇردە قارسىلىق دەپ سانايمىن, – دەدى ە.سايروۆ.
ونىڭ ايتۋىنشا, پرەزيدەنت الماتىنىڭ قۇرىلىس ماسەلەسىندە ەڭ الدىمەن قۇرىلىس كومپانيالارىنىڭ ەمەس, حالىقتىڭ مۇددەسى ەسكەرىلۋى قاجەت ەكەنىن بىرنەشە رەت ايتقان. «جاڭا اكىم دارحان ساتىبالدىنىڭ كەلۋىمەن بۇل ماسەلە جاقىن ارادا شەشىلەدى دەپ ۇمىتتەنەمىز», دەدى دەپۋتات.
قازىر بۇل اۋماق اشىق تۇرعان شۇڭقىرعا اينالعان. جاۋىن مەن قار ەرىگەن سايىن ول تەرەڭدەپ, جاقىن ماڭداعى عيماراتتاردىڭ ىرگەتاسىن شايىپ, ولارعا قاۋپىن توندىرەدى. بۇل جاعداي قۇرىلىس جانە سانيتارلىق نورمالارعا قايشى كەلەدى.
كەڭەس توراعاسىنىڭ ايتۋىنشا, قۇرىلىس جوباسى 2023 جىلى بەكىتىلگەن الماتىنىڭ جاڭا باس جوسپارىنا دا سايكەس كەلمەيدى. قازىرگى جوسپارلاۋ بويىنشا, بۇل اۋماق ءبىلىم بەرۋ ايماعىنا تيەسىلى, سوندىقتان مۇندا تۇرعىن ءۇي كەشەنىن سالۋعا بولمايدى. ال الماتى قالاسى اكىمىنىڭ ورىنباسارى بەيبىت شاحانوۆ قۇرىلىس جۇمىسى سوت شەشىمى شىققانعا دەيىن توقتاتىلعانىن ايتتى. ونىڭ ايتۋىنشا, قۇرىلىس سالۋشى كومپانيا شۇڭقىردى كومىپ, قورشاۋدى الىپ تاستاۋعا ءتيىس. دەگەنمەن رۇقسات قۇجاتتارىنىڭ زاڭدىلىعىنا جۇرگىزىلەتىن تەكسەرىستەن كەيىن عانا تۇپكىلىكتى شەشىم قابىلدانادى.
ۋنيۆەرسيتەت وكىلدەرى وقۋ ينفراقۇرىلىمىنا تىعىز قۇرىلىس جۇرگىزۋگە جول بەرمەۋ قاجەت ەكەنىن العا تارتىپ وتىر.
– ستۋدەنتتەردىڭ سانى جىل سايىن ارتىپ كەلەدى, ال اۋديتوريا مەن زەرتحانالاردىڭ سانى ازايىپ بارادى. ءبىز تەك عيماراتتاردان ەمەس, سونداي-اق عىلىمي جانە ءبىلىم بەرۋ الەۋەتىمىزدەن دە ايىرىلىپ جاتىرمىز. بۇل جەردە بۇرىن شەبەرحانا, گاراج, ءىرى زەرتحانالار بولعان, بىراق ءبارىن ءسۇرىپ تاستادى. قازىر بىزدە 7 مىڭعا جۋىق ستۋدەنت وقيدى, بولاشاقتا 10 مىڭعا جەتكىزگىمىز كەلەدى. الايدا جاڭا جاتاقحانا مەن وقۋ كورپۋستارىن سالۋعا بوس جەردىڭ جەتىسپەۋشىلىگى باستى ماسەلە بولىپ وتىر, – دەدى قازۇازۋ باسقارما توراعاسىنىڭ ورىنباسارى قۋات سۇلتانعازيەۆ.
«Amanat» پارتياسى داۋلى جەر تەلىمىن قوسا العاندا, ۋنيۆەرسيتەتتىڭ زاڭدى مەنشىگىن قايتارۋعا بار كۇشىن سالاتىنىن مالىمدەدى. ە.سايروۆ بۇل ماسەلەنى پرەمەر-مينيستر مەن باس پروكۋرورعا جەتكىزگەنىن ايتتى. ول اتالعان ءىستى ولاردىڭ جەكە باقىلاۋىنا الۋ تۋرالى رەسمي ءوتىنىش بىلدىرگەن.
ايتا كەتسەك, 2023 جىلى الماتى قالاسىنىڭ پروكۋراتۋراسى قازۇازۋ-دا بيۋدجەت قاراجاتىن جىمقىرۋ فاكتىلەرىن انىقتادى. قازىر ۋنيۆەرسيتەت مۇلكىن زاڭسىز يەلىكتەن شىعارۋ دەرەگى بويىنشا تەرگەۋ جۇرگىزىلىپ جاتىر.
