فوتو: اقوردا
پرەزيدەنت ءوز سوزىندە جاھاندىق جەتكىزۋ تىزبەگىنىڭ سەنىمدىلىگى مەن قاۋىپسىزدىگى بارلىق مەملەكەتتەر ءۇشىن ستراتەگيالىق ماڭىزعا يە ەكەنىن اتاپ ءوتتى.
«ەۋروپا مەن ازيانىڭ ءىرى وڭىرلەرىن جالعاۋدا ورتالىق ازيا باستى لوگيستيكالىق حابقا اينالىپ كەلەدى. بىلتىر قىتايدان ورتالىق ازيا ەلدەرى ارقىلى تاسىمالدانعان جۇك كولەمى 12 پايىزعا ارتىپ, 211 مىڭ كونتەينەردەن استى. قىتايدان ەۋروپاعا قۇرلىق جولدارىمەن جونەلتىلەتىن جۇكتىڭ 85 پايىزى قازاقستانعا تيەسىلى. ءبىز قۇرلىقارالىق بايلانىستى كۇشەيتۋگە جانە ورتالىق ازيا ايماعىنىڭ باسەكەلەستىك ارتىقشىلىعىن بارىنشا پايدالانۋعا ەرەكشە ءمان بەرەمىز. قازاقستان ء«بىر بەلدەۋ, ءبىر جول» مەگاجوباسىنىڭ العاشقى بۋىنى رەتىندە بۇل باستامانى «باتىس قىتاي – باتىس ەۋروپا», ترانسكاسپي حالىقارالىق كولىك ءدالىزى جانە «سولتۇستىك – وڭتۇستىك» سەكىلدى ماڭىزدى ترانزيتتىك باعىتتارمەن ۇشتاستىرۋدى كوزدەيدى. ترانسكاسپي باعىتىنىڭ تارتىمدىلىعىن ارتتىرۋ ءۇشىن كاسپي تەڭىزىندەگى ايلاقتاردى جاڭعىرتۋ جانە تسيفرلاندىرۋ, جۇك تەرمينالدارىن سالۋ, سونداي-اق جۇك كەمەلەرى ءوندىرىسىن جولعا قويۋ بويىنشا جۇيەلى شارالار قابىلداپ جاتىرمىز. وسى ورايدا قىتاي تاراپىنا كاسپيدەگى «قۇرىق» پورتىندا جۇك تەرمينالىن بىرىگىپ سالۋدى ۇسىنامىز», دەدى مەملەكەت باسشىسى.
