كوللاج: kursiv.media, ميلوش مۋراتوۆسكي
بۇل جونىندە اتالعان كومپانيانىڭ نەگىزىن قالاۋشى تاتيانا كيم تاسس اگەنتتىگىنە بەرگەن سۇحباتىندا ءمالىم ەتتى. ونىڭ ايتۋىنشا, قازىرگى تاڭدا Wildberries ەكى بىردەي قۇرىلىس كومپانياسىمەن سەرىكتەستىك ورناتۋ جونىندە كەلىسسوزدەر جۇرگىزىپ جاتىر. بۇل كەلىسىمدەر ناتيجەسىندە پلاتفورمادا تۇرعىن ءۇي ساتىپ الۋ-ساتۋ قىزمەتىن تەستىلىك رەجيمدە ىسكە قوسۋ كوزدەلگەن.
ء«بىز ءاردايىم تاۋار ساناتتارىن كەڭەيتىپ وتىرامىز. قازىردىڭ وزىندە ەكى ءىرى قۇرىلىس جوباسىمەن ارىپتەستىك ماسەلەسىن تالقىلاپ جاتىرمىز. جاقىن بولاشاقتا پاتەر ساۋداسىن ىسكە قوسىپ كورۋدى جوسپارلاپ وتىرمىز», دەيدى تاتيانا كيم.
ايتا كەتۋ كەرەك, بۇعان دەيىن دە Wildberries پلاتفورماسى قىزمەت اياسىن ەداۋىر كەڭەيتكەن بولاتىن. ماسەلەن, سوڭعى جىلدارى مۇندا ساياجاي مەن مونشا ساتۋ قىزمەتى ىسكە قوسىلىپ, 2024 جىلدان باستاپ كولىك بولشەكتەرى دە ساۋدالانىپ كەلەدى. ەندى بۇل قاتارعا جىلجىمايتىن م ۇلىك, ياعني تۇرعىن ءۇي دە قوسىلماق.
جاڭا فۋنكتسيانىڭ ناقتى قاي ەلدەردە قولجەتىمدى بولاتىنى ازىرگە بەلگىسىز. الايدا Wildberries-ءتىڭ گەوگرافيالىق اۋقىمى جىلدان جىلعا كەڭەيىپ كەلە جاتقانى بايقالادى: رەسەي مەن قازاقستاننان بولەك, كومپانيا بەلارۋس, ارمەنيا, قىرعىزستان, وزبەكستان جانە يزرايل ەلدەرىندە دە قىزمەت كورسەتىپ كەلەدى.
بيىل الماتىدا Wildberries-ءتىڭ لوگيستيكالىق حابى اشىلماق. بۇدان بولەك, تاعى ءبىر ءىرى رەسەيلىك ماركەتپلەيس – Ozon ەلىمىزدە كولىك-لوگيستيكالىق ورتالىق قۇرۋدى جوسپارلاپ وتىر. بۇل ۇردىستەر ينتەرنەت-ساۋدا سالاسىنىڭ تەك تۇرمىستىق تۇتىنۋ زاتتارىمەن شەكتەلىپ قالماي, ەندىگى جەردە ەكونوميكانىڭ جاڭا باعىتتارىنا دەن قويىپ وتىرعانىن اڭعارتادى.
ساراپشىلاردىڭ پايىمداۋىنشا, تسيفرلىق ساۋدانىڭ اۋقىمدى ەكوجۇيەگە اينالۋى – نارىق قۇرىلىمىنداعى ەلەۋلى وزگەرىستەردىڭ باستاماسى عانا. بۇل جاڭا بەتبۇرىس تۇرعىن ءۇي نارىعى مەن قۇرىلىس سەكتورىنا دا سەرپىن بەرۋى ىقتيمال.
