جامبىل وبلىسىندا بولات شىعاراتىن جاڭا زاۋىت سالىنادى

قازىرگى ۋاقىتتا ينۆەستيتسيا بويىنشا كەلىسىم جاسالىپ, بولىنگەن جەر ۋچاسكەلەرىن قۇرىلىس-مونتاج جۇمىستارىنا دايىنداۋ بەلسەندى جۇرگىزىلىپ جاتىر. يندۋستريالىق ايماققا تەمىرجول, ەلەكتر جەلىلەرى جانە تابيعي گاز سىندى قاجەتتى ينفراقۇرىلىم تارتىلعان.

ايتا كەتەيىك, قۇرىلىس كەزەڭىندە 1,5 مىڭ ۋاقىتشا جۇمىس ورنى اشىلىپ, زاۋىت ىسكە قوسىلعاننان كەيىن 2,5 مىڭنان استام ادام تۇراقتى جۇمىسپەن قامتىلادى. ينۆەستور كومپانيا جۇمىس كۇشىنىڭ كەمىندە 90%-ىن جەرگىلىكتى تۇرعىنداردان الۋدى كوزدەپ وتىر.

«جوبانى جۇزەگە اسىرۋ ەكى كەزەڭگە:  2025 جىلدان 2029 جىلعا دەيىن جوسپارلانعان. زاۋىتتى پايدالانۋعا بەرۋ 2027 جىلعا بەلگىلەنسە, ودان كەيىنگى ەكى جىل ىشىندە وندىرىستىك قۋاتتىلىقتى كەڭەيتۋ جۇمىستارى جۇرگىزىلەدى. جالپى ينۆەستيتسيا كولەمى – $756 ملن. جاڭا كاسىپورىن تەمىر كەنىن زاماناۋي سۋتەكتى تەحنولوگيامەن وڭدەپ, جىلىنا 3 ملن تونناعا دەيىن ءونىم شىعارۋعا قاۋقارلى بولادى. بۇل ەلىمىزدەگى سۋتەك نەگىزىندەگى شاحتا پەشىن پايدالاناتىن العاشقى مەتاللۋرگيالىق كەشەن بولماق. جوبا سالانىڭ «جاسىل» ترانسفورماتسياسى تالاپتارىنا تولىق ساي كەلەدى», دەلىنگەن ۇكىمەتتىڭ ءباسپاسوز قىزمەتى تاراتقان حابارلامادا.

«Fujian Hengwang Investment Co., Ltd» باسقارما توراعاسىنىڭ ورىنباسارى لي چجۋندۋن زاۋىت تولىق قۋاتىنا شىققان سوڭ, ونىڭ ءونىمى ىشكى نارىقتاعى بولات تاپشىلىعىن وتەپ قانا قويماي, ورتالىق ازيا, ۋكراينا مەن ەۋروپا ەلدەرىنە ەكسپورتقا باعىتتالاتىنىن ايتتى.

«قۇرىلىس اياقتالعاننان كەيىن, ءبىزدىڭ ءونىم قازاقستان نارىعىنداعى بولات تاپشىلىعىن تولىقتاي جابا الادى. ىشكى سۇرانىستى قاناعاتتاندىرا وتىرىپ, ءبىز سونىمەن قاتار كورشىلەس ەلدەرگە دە ءونىم جەتكىزۋ ارقىلى قازاقستان ەكونوميكاسىنىڭ جانە ەكسپورتتىق الەۋەتىنىڭ دامۋىنا ۇلەس قوسا الامىز. جوبا ىسكە قوسىلعان سوڭ, ول تەك ءوندىرىس سالاسىنىڭ ەمەس, سونىمەن قاتار لوگيستيكا, كەن يگەرۋ, ءتىپتى تۋريزم مەن قوعامدىق تاماقتانۋ سەكىلدى ىلەسپە سالالاردىڭ دا دامۋىنا سەرپىن بەرەدى», دەدى ول.

سونىمەن قاتار جوبانى ىسكە اسىرۋ ءوڭىردىڭ الەۋمەتتىك-ەكونوميكالىق دامۋىنا وڭ اسەرىن تيگىزەدى. قابىلدانعان مىندەتتەمەلەر شەڭبەرىندە Fujian Hengwang شۋ قالاسىندا تۇرعىن ءۇي كەشەندەرىن سالادى, سونداي-اق اۋماقتاردى كوگالداندىرۋ, بالاباقشالار مەن قالالىق ساياباقتار سالۋدى قوسا العاندا, الەۋمەتتىك باستامالاردى تۇراقتى نەگىزدە قولدايتىن بولادى.

ايتا كەتەيىك, Fujian Hengwang Investment Co., Ltd. بۇگىندە قحر-داعى ءۇش مەتاللۋرگيالىق كاسىپورىندى باسقاراتىن جانە جىلىنا 23 ملن تونناعا دەيىن بولات ءوندىرىسىنىڭ جالپى كولەمىن باقىلايتىن ونەركاسىپتىك وندىرىستەگى ەڭ ءىرى الەمدىك كوشباسشى بولىپ سانالادى. جوبالارعا ينۆەستيتسيالاردىڭ جالپى كولەمى $6 ملرد-تان اسادى. قازاقستاندا ەنشىلەس قۇرىلىم – اەا قاتىسۋشىسى مارتەبەسىن العان «Yonggang Central Asia Iron and Steel» جشس تىركەلگەن.