فوتو: قاراعاندى وبلىسىنىڭ اكىمدىگى
«بيىل ءتورتىنشى جانە بەسىنشى كەشەندەردى ىسكە قوسامىز. ءتورتىنشىسى بويىنشا شامامەن ەكى مىڭ, بەسىنشىسى بويىنشا تاعى ەكى مىڭ ابونەنت كۇتەمىز. جوبالىق قۇجاتتاما تۇزەتىلگەننەن كەيىن التىنشى كەشەن التى مىڭعا دەيىن ءۇيدى قامتي الادى. ءبىز كەزەڭ-كەزەڭمەن جۇمىس ىستەپ, ءبىر ۋچاسكەنى اياقتاپ, كەلەسى ۋچاسكەگە كوشەمىز. تۇرعىنداردان سابىرلىق ساقتاۋدى سۇرايمىز», دەيدى قالا قۇرىلىس ءبولىمىنىڭ باسشىسى مۇرات قاماليەۆ.
ايتا كەتەيىك, گازداندىرۋ رەسپۋبليكالىق بيۋدجەت قاراجاتى ەسەبىنەن جۇرگىزىلىپ جاتىر. جوبانىڭ باس مەردىگەرى – «مبك قۇرىلىس» جشس. كومپانيانىڭ قۇرىلىس جونىندەگى ديرەكتورى اباي الكەەۆتىڭ ايتۋىنشا, بارلىق جۇمىستار بەكىتىلگەن كەستە بويىنشا اتقارىلىپ جاتىر.
ء«تورتىنشى كەشەندە (ميحايلوۆكا – فەدوروۆكا) جۇمىستىڭ 60% -دان استامى ورىندالدى. بەسىنشى ورىندا – 95%, قازىر ىسكە قوسۋ-باپتاۋ جانە سىعىمداۋ جۇمىستارى ءجۇرىپ جاتىر. ءبىز وتاندىق وندىرۋشىلەردى قولداۋعا تىرىسامىز. ماتەريالداردىڭ نەگىزگى بولىگى قاراعاندىدان ساتىپ الىنادى - نەگىزىنەن بولات جانە پوليەتيلەن قۇبىرلار. مۇندا شىعارىلمايتىن جابدىقتاردى ورال مەن شىمكەنتتەن ساتىپ الامىز. بولات قۇبىرلار جوعارى قىسىمدى ماگيسترالدىق قۇبىرلاردى توسەۋ كەزىندە پايدالانىلادى», دەيدى اباي الكەەۆ.
قۇبىرلار جەر ۇستىمەن جانە كولدەنەڭ باعىتتالعان بۇرعىلاۋ ادىسىمەن توسەلەدى. بۇل – جول توسەمىن بۇلدىرمەي, ينفراقۇرىلىمعا زيان كەلتىرمەي مونتاج جاساۋعا مۇمكىندىك بەرەدى. مەردىگەر كومپانيادا قاجەتتى تەحنيكا جەتكىلىكتى. ءتورتىنشى ىسكە قوسۋ كەشەنىندەگى (فەدوروۆكا – بولشايا ميحايلوۆكا) جۇمىستار جىل سوڭىنا دەيىن اياقتالادى دەپ جوسپارلانعان. ال بەسىنشى كەشەن – ەسكى اۋەجاي اۋدانى – تامىز ايىنىڭ سوڭىندا تاپسىرىلماق. التىنشى كەشەندە («كۇنگەي» جانە «تاۋگۇل») اۋقىمدى قۇرىلىس كۇزگە قاراي باستالادى. سەبەبى, گازداندىرۋ باستالعالى بەرى بۇل اۋدانداردا 1500-گە جۋىق جاڭا ءۇي بوي كوتەرىپ, جوبالىق قۇجاتتاماعا وزگەرىستەر ەنگىزۋ قاجەت بولعان.
تۇرعىندار ءۇشىن ورتالىق گازعا قوسىلۋدى جەڭىلدەتۋ ماقساتىندا تۇرعىن ءۇي قورىن جاڭعىرتۋ ورتالىعى ارقىلى ارنايى مەملەكەتتىك باعدارلاما جۇمىس ىستەيدى.
«باستاپقى جارناسىز بەس جىلعا ءبولىپ تولەۋ قاراستىرىلعان. قوسىلۋ سوماسى بۇگىنگى تاڭدا ميلليون تەڭگەدەن اسپايدى, ال اي سايىنعى تولەم – ورتا ەسەپپەن 18 500 تەڭگەگە دەيىن. مەردىگەر تولەمدى قابىلداۋ اكتىسىنە ءۇي يەسىنىڭ ءوزى قول قويعاننان كەيىن عانا الادى, بۇل ساپالى ورناتۋعا كەپىلدىك بەرەدى», دەپ اتاپ ءوتتى تۇرعىن ءۇي قورىن جاڭعىرتۋ ورتالىعى ديرەكتورىنىڭ ورىنباسارى الىبەك ادەنوۆ.
الىبەك ادەنوۆتىڭ ايتۋىنشا, باعدارلاما اياسىندا بيىل 300-دەن استام ءۇي گازعا قوسىلعان. جىلىتۋ ماۋسىمى باستالعانشا بۇل كورسەتكىش ارتادى دەپ كۇتىلەدى. كەلەسى جىلى كەمىندە 500 وتباسىنى قامتۋ جوسپارلانعان. باعدارلاما يگىلىگىن كورىپ وتىرعانداردىڭ ءبىرى – گۇلزيا بوشانوۆانىڭ وتباسى.
«وتكەن جىلى قوسىلۋ بىزگە 860 مىڭ تەڭگەگە ءتۇستى. ايىنا 14 500 تولەيمىز. ءبىر جىلدا 76 مىڭ تەڭگەگە گاز جۇمسادىق – بۇل كومىردەن الدەقايدا ءتيىمدى. ال ەڭ باستىسى – ۇيدە تازا جانە قاۋىپسىز: ەگەر بىردەڭە دۇرىس بولماسا, گازدىڭ شىعۋىن سەزگىش قۇرال بىردەن توقتاتادى», دەيدى ءۇي قوجايىنى.
گازداندىرۋدىڭ العاشقى كەزەڭى اياقتالعان سوڭ, جوبا ءتبو, فين جانە پريشاحتينسك اۋىلدارىنا جالعاساتىن بولادى. بۇل اۋماقتاردا 246 كوشە مەن 15 مىڭنان استام ءۇي تابيعي گازعا قوسىلادى دەپ جوسپارلانعان.
