دەنساۋلىق ساقتاۋ سالاسى سىنالدى

«نۇر وتان» پارتياسى استانا قالالىق فيليالى جانىنداعى سىبايلاس جەمقورلىققا قارسى كۇرەس قوعامدىق كەڭەسىنىڭ وتىرىسى بولىپ ءوتتى. وندا ەلوردالىق دەنساۋلىق ساقتاۋ سالاسىنداعى سىبايلاس جەمقورلىققا قارسى كۇرەس دەڭگەيىن انىقتاۋ مەن جەمقورلىق كورىنىستەرىنە جول بەرەتىن سەبەپتەر مەن جاعدايلاردى ەسكەرتۋ جانە جويۋ ماسەلەلەرى قارالدى. كەڭەس وتىرىسىنا ونىڭ توراعا­سى, پارلامەنت ءماجىلىسىنىڭ دەپۋ­تاتى رامازان سارپەكوۆ, «نۇر وتان» پارتياسى استانا قالالىق بولىمشەسى توراعاسىنىڭ ورىنبا­سارى مەيرامباي ورالوۆ, دەن­ساۋ­لىق ساقتاۋ سالاسىنداعى ۋاكى­لەت­تى مەملەكەتتىك اتقارۋشى ورگان­داردىڭ باسشىلارى, استانا قالاسى ءماسليحاتىنىڭ دەپۋتاتتارى جانە ت.ب. قاتىستى. وتىرىستا ءسوز العان ر.سارپەكوۆ: «مەملەكەت باسشىسىنىڭ تاپسىرمالارىنا بايلانىستى سىبايلاس جەمقورلىققا قارسى جۇيەلى كۇرەستى ودان ءارى كۇشەيتىپ, ازامات­تارىمىزدىڭ قۇقىن نىعايتا ءتۇسۋ­ى­مىز قاجەت» دەپ اتاپ كورسەتتى. ال ءوز كەزەگىندە ءسوز العان اس­تا­نا قالاسى دەنساۋلىق ساقتاۋ باس­قارماسىنىڭ باسشىسى ايگۇل سەگىز­باەۆا باقىلاۋ جانە قاداعالاۋ ورگاندارىنىڭ, ونىڭ ىشىندە ەسەپ كوميتەتى, پروكۋراتۋرا ورگاندارى, قارجى باقىلاۋ ينسپەكتسياسى جانە ت.ب. ءتيىستى مەكەمەلەردىڭ جۇرگىزگەن تەكسەرىستەرىن العا تارتتى. ماسەلەن, وتكەن جىلى باسقارمادا 6 تەكسەرىس ورىن العان, وعان 167 كۇن كەتكەن. ءسويتىپ, ا.سەگىزباەۆانىڭ ايتۋىنا قاراعاندا, جالپى مەديتسينالىق ۇيىمداردا 97 تەكسەرىس ورىن السا, وعان بارلىعى 1080 كۇن جۇمسالعان, دەمەك جىلىنا ءبىر مەديتسينالىق ۇيىمعا 3-4 تەكسەرىستەن كەلەدى ەكەن. دەسەك تە, وسى تەكسەرىستەردىڭ ارقاسىندا ءبىراز سىردىڭ بەتى اشىلعان سەكىلدى. ماسەلەن, اۆتوكولىك قۇرالدارىنا ارنالعان شىعىن ءليميتى اسىرا كور­سەتىلگەن, نەسيە بەرەشەگى بولسا دا سىياقى تاعايىنداۋ مەن نە­گىز­­سىز قوسىمشا اقى تولەۋ, سىي­اقى­لاردى جوسپارلاۋ, جوعارى نور­ماتيۆتى دارەجەلەردى ۇستاۋ, كاس­سالىق ءتارتىپتى بۇزۋمەن قاتار, ءدارى­حانالارداعى ءدارى-دارمەكتەردىڭ جەتكىلىكسىزدىگى جانە نەگىزگى قارا­جات­تاردى ەسەپتەن شىعارۋ مەن قارجىلىق ەسەپتى بۇرمالاۋ كەڭ ءورىس العان ەكەن. وسى اتالعان كەمشىلىكتەرگە باي­لانىستى دەر ۋاقىتىندا ءتيىستى شا­رالار قابىلدانىپ, كىنالى ادامدار, ياعني باسقارمانىڭ قوس ءبولىم جەتەكشىسى جاۋاپقا تارتىلدى. ولارعا قاتاڭ سوگىس جاريالاندى.­ مەديتسينالىق ۇيىمدارداعى 40 ما­ماننىڭ 32-ءسى سوگىس السا, 8-ىنە ەسكەرتۋ بەرىلدى. ءبىرىنشى باسشىلاردىڭ, ولاردىڭ ورىنباسارلارى مەن باس ەسەپشىلەردىڭ جالاقىلارى تولىقتاي قايتا قارالدى. ەڭبەكاقىنى تاعايىنداۋدىڭ وڭتايلاندىرىلعان ءۇردىسى ىسكە قوسىلدى. شۇعىل قابىل­داۋ بولىمدەرىنىڭ شتاتى كوبەيىپ, ون­دا­عى دارىگەرلەردىڭ ايلىعى ۇل­عاي­تىلدى, دەپ تۇسىنىك بەردى سوڭىندا ا. سەگىزباەۆا. سونىمەن قاتار, ول نەلىكتەن ناۋقاس جاندار جەدەل جاردەمدى ەكى ساعات بويى كۇتەدى دەگەن سۇراققا دا جاۋاپ قايتاردى. ونىڭ ايتۋىنشا, بارلىق شاقىرتۋلار 15 ءمينوت ىشىندە قامتاماسىز ەتىلمەيتىن كورىنەدى. ويتكەنى, ءار شاقىرتۋدىڭ ءجونى بولەك, سوندىقتان, ارقايسىسى ءارتۇرلى, ياعني ءوتىنىش پەن ناۋقاستىڭ اۋىرلىعىنا ساي دارەجەلەنەدى. وسى­عان بايلانىستى قازىرگى كۇنى جەدەل جاردەم جۇگىن ازايتۋ ماقساتىندا كەڭەستەر بەرەتىن نۇكتەلەر سانى ارتتىرىلىپتى. ال مۇنىڭ ناۋقاستار ءۇشىن قانداي ءتيىمدى كومەگى بولارى ازىرگە بەلگىسىز. بىراق دارىگەرلەر اۋىرىپ جاتقان ناۋقاستاردىڭ كوڭىلىن قىزىل سوزبەن دە جۇباتا بىلسە, كىم بىلەدى, شيپا بولارىنا سەنىمدى سەكىلدى. الەكساندر تاسبولاتوۆ, «ەگەمەن قازاقستان».