حالىق قاھارمانى, ديريجەر, اسا كورنەكتى ونەر يەسىنىڭ عاسىرلىق مەرەيتويى – تەك قازاق حالقى ءۇشىن عانا ەمەس, بارشا وركەنيەتتى الەم ءۇشىن ەلەۋلى وقيعا. بۇل ماڭىزدى داتا يۋنەسكو تاراپىنان حالىقارالىق دەڭگەيدە اتالىپ وتەتىن مەرەيتويلار قاتارىنا ەنگىزىلدى.
اتالعان كورمەدە الماتى قالاسىنداعى مۋزەيلەر بىرلەستىگىنىڭ قورىنان الىنعان 70-كە جۋىق قۇندى جادىگەر قويىلعان. ولاردىڭ قاتارىندا كومپوزيتوردىڭ ءوز قولىمەن جازعان پارتيتۋرالارى, سيرەك فوتوسۋرەتتەرى, جەكە زاتتارى, سونداي-اق احمەت جۇبانوۆ سىيعا تارتقان «داريعا دومبىرا» دا بار. ايتا كەتەيىك, كەزىندە بالا نۇرعيسانىڭ مۋزىكالىق ءبىلىم الۋىنا احمەت جۇبانوۆ سەبەپكەر بولعان ەدى. التى تاقىرىپتىق بولىمنەن تۇراتىن كورمە كومپوزيتور شىعارماشىلىعىنىڭ سان قىرىن اشا ءتۇسىپ, قازاق مۋزىكاسىنىڭ تەرەڭ تامىرى مەن ءورىسى كەڭ بولمىسىن بەينەلەيدى.
كورمەنىڭ اشىلۋ سالتاناتىنا يۋنەسكو-عا مۇشە ەلدەردىڭ ەلشىلەرى, ديپلوماتتار, حالىقارالىق ۇيىم وكىلدەرى, فرانتسيا جۇرتشىلىعى مەن سوندا تۇراتىن قازاق دياسپوراسى قاتىستى. قازاقستاننىڭ يۋنەسكو جانىنداعى تۇراقتى وكىلى اسقار ابدراحمانوۆ بۇل كورمە قازاق مۋزىكاسىنىڭ التىن ارقاۋى بولعان تۇلعانىڭ مۇراسىنا كورسەتىلگەن زور قۇرمەت, تۇركى دۇنيەسىنىڭ ورتاق رۋحاني كەڭىستىگىن جاھاندىق دەڭگەيدە تانىتۋدىڭ جارقىن كورىنىسى ەكەنىن اتاپ ءوتتى.
ايتا كەتەيىك, ءىس-شارانى الماتى قالاسى اكىمدىگىنىڭ قولداۋىمەن مۋزەيلەر بىرلەستىگى ۇيىمداستىردى. جوبانىڭ جۇزەگە اسۋىنا قازاقستان رەسپۋبليكاسىنىڭ يۋنەسكو جانىنداعى تۇراقتى وكىلدىگى, تۇركى مادەنيەتى جانە مۇراسى قورى اتسالىستى. جوبا «وتىرار سازى» وركەسترىنىڭ نەگىزىن قالاعان كورنەكتى تۇلعانىڭ شىعارماشىلىعىن ناسيحاتتاۋعا, قازاقتىڭ باي مۋزىكالىق مۇراسىن شەتەل جۇرتشىلىعىنا كەڭىنەن تانىتۋعا باعىتتالعان.
نۇرعيسا تىلەنديەۆتىڭ ەڭبەكتەرى ءبىرتۇتاس ۇلتتىڭ مادەني مۇراسىنا اينالدى. تاۋ تۇلعا 500-دەن اسا مۋزىكالىق تۋىندىنى دۇنيەگە اكەلگەن, 50-دەن اسا درامالىق قويىلىم مەن 20-عا جۋىق كينوفيلمگە مۋزىكا جازعان. اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ, قۇرمانعازى اتىنداعى حالىق اسپاپتار اكادەميالىق وركەسترىنىڭ باس ديريجەرى قىزمەتىن اتقارعان, كەيىن ءوزى نەگىزىن قالاعان «وتىرار سازى» فولكلورلىق-ەتنوگرافيالىق وركەسترىنىڭ كوركەمدىك جەتەكشىسى بولدى.
كورمە يۋنەسكو-نىڭ شتاب-پاتەرىندە وسى جىلدىڭ 19 ماۋسىمىنا دەيىن جالعاسادى.
