قاتىسۋشىلار Kunjut Studio شىعارماشىلىق كەڭىستىگىندە بالشىقتان بۇيىمدار جاساپ, ۋاقىتتى بىرگە ءارى پايدالى وتكىزۋگە مۇمكىندىك الدى, دەپ حابارلايدى ەلوردا اكىمدىگىنىڭ رەسمي سايتى.
ءىس-شارانى استانا قالاسىنىڭ جاستار ساياساتى ماسەلەلەرى باسقارماسى مەن «دامۋ» قازاقستاندىق قاۋىمداستىعى بىرلەسىپ ۇيىمداستىردى.
شارانىڭ ماقساتى — اكە مەن بالا اراسىنداعى ەموتسيونالدىق بايلانىستى نىعايتۋ, بەلسەندى وتباسىلىق دەمالىستى ناسيحاتتاۋ جانە بىرلەسكەن شىعارماشىلىق ارقىلى شەبەرلىك داعدىلارىن دامىتۋ.
— اكەلەر كۇنىنە وراي وسىنداي ءىس-شارانى اكەلەر مەن بالالاردىڭ بىرگە ۋاقىت وتكىزۋى ءۇشىن ۇيىمداستىردىق. بۇل — «وتباسى — باقىت مەكەنى» جوباسى اياسىندا جۇزەگە اسىرىلىپ وتىرعان شارا. وتكەن جىلى دا وسىنداي شەبەرلىك ساعاتى وتكەن, قاتىسۋشىلارعا ۇناعاندىقتان, بيىل تاعى قايتالادىق. جوبانىڭ ماقساتى — وتباسىلىق قۇندىلىقتاردى دارىپتەۋ, اكەلەر مەن بالالار اراسىنداعى بايلانىستى كۇشەيتۋ, — دەدى جاستار ساياساتى ماسەلەلەرى باسقارماسىنىڭ باس مامانى بالجان قولقانات.
شاراعا 20-دان استام وتباسى قاتىستى.
قاتىسۋشىلاردىڭ ءبىرى نۇرلىبەك مۇراتوۆ قىزى ارۋجانمەن بىرگە گۇلگە ارنالعان ۆازا جاساعاندارىن ايتىپ, مۇنداي باستامالاردىڭ ماڭىزىن اتاپ ءوتتى.
— بالالارمەن بىرگە ۋاقىت وتكىزۋ — ۇلكەن مۇمكىندىك. قازىر اتا-انالار جۇمىستا كوپ ۋاقىت وتكىزەدى, ال وسىنداي ساتتەر — بالاڭمەن بىرگە بولىپ, ءبىر نارسە جاساۋعا, اكە مەن بالا اراسىنداعى بايلانىستى نىعايتۋعا تاپتىرماس جول, — دەدى ول.
