جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ ءباسپاسوز قىزمەتىنەن ءمالىم ەتكەندەي, بالىق قورعاۋ اكتسياسى 1 ءساۋىر-31 مامىر ارالىعىندا ءوتتى.
«بۇل اكتسيا اتىراۋ, ماڭعىستاۋ جانە باتىس قازاقستان وبلىستارىنداعى جايىق-كاسپي سۋ باسسەينىنىڭ ايدىندارىندا بەكىرە تۇقىمداس جانە باسقا دا بالىق تۇرلەرىنىڭ ۋىلدىرىق شاشۋىنا قولايلى جاعداي جاساۋ ماقساتىندا وتكىزىلدى. جايىق-كاسپي وبلىسارالىق باسسەيندىك بالىق شارۋاشىلىعى ينسپەكتسياسىنىڭ ينسپەكتورلارى مەن شەكارا قىزمەتىنىڭ, قۇقىق قورعاۋ ورگاندارىنىڭ قىزمەتكەرلەرى تابيعاتتى قورعاۋ زاڭناماسىن بۇزۋعا قاتىستى 1125 فاكتىنى انىقتادى. بالىق قورعاۋ زاڭناماسىنا قايشى ارەكەت جاساعان 867 ادام اكىمشىلىك جاۋاپكەرشىلىككە تارتىلدى. براكونەرلىك جانە سيرەك كەزدەسەتىن, جويىلىپ بارا جاتقان بالىق تۇرلەرىن زاڭسىز اۋلاۋ دەرەگىمەن 33 قىلمىستىق ءىس قوزعالدى. قۇقىق بۇزۋشىلارعا 21,5 ملن تەڭگە ايىپپۇل سالىندى», دەپ حابارلادى ينسپەكتسيانىڭ ءباسپاسوز قىزمەتى.
سونداي-اق, زاڭسىز اينالىمنان 4 توننا 505 كەلى بالىق تاركىلەنگەن. ونىڭ ىشىندە 1 توننا 330 كەلى بەكىرە تۇقىمداس بالىق تۇرلەرى, 2,006 كەلى قارا ۋىلدىرىق بار. براكونەرلەردەن 202 بالىق اۋلاۋ قۇرالى, 44 سۋ كولىگى الىنعان.
«جايىق-كاسپي سۋ باسسەينىنىڭ ارنالارىندا ءسۇزۋ جۇمىسى جۇرگىزىلدى. سونىڭ ناتيجەسىندە سۋ ايدىندارىنان 661 زاڭسىز بالىق اۋلاۋ قۇرالى تابىلدى», دەپ ءمالىم ەتتى ينسپەكتسيانىڭ ءباسپاسوز قىزمەتىنەن.
اتىراۋ وبلىسى
