OzgeEpic حابىندا بىرەگەي ەتنو-مۇراجاي مەن قولونەر شەبەرحاناسى بار. مۇندا تەاتر قويىلىمدارى, مۋزىكالىق جانە پوەزيالىق كەشتەر مەن كورمەلەر وتكىزۋگە ارنالعان كەڭىستىك تە قاراستىرىلعان. ۇيىمداستىرۋشىلاردىڭ ايتۋىنشا, نەگىزگى ماقسات – زاماناۋي ونەر ارقىلى قازاق مادەنيەتى مەن كرەاتيۆتى يندۋستريانى دامىتۋ. سونداي-اق اتالعان باستاما دارىندى جاستاردىڭ الەۋەتىن اشۋدى, تاجىريبەلى ونەر قايراتكەرلەرىمەن جانە شىعارماشىل زيالى قاۋىم وكىلدەرىمەن بىرلەسىپ, ولاردىڭ جوبالارىن ىسكە اسىرۋعا قولداۋ كورسەتۋدى كوزدەيدى.
ونەر ارقىلى قازىرگى وزەكتى پروبلەمالارعا جانە قوعامدى تولعاندىرعان تۇيتكىلدەرگە باسا ءمان بەرىپ, ولاردى شەشۋدىڭ ستاندارتتان تىس جولدارىن ۇسىنۋ ايرىقشا ماڭىزعا يە. اۋتيست بالالار تۋرالى قويىلىم ينكليۋزيا تاقىرىبىنداعى وسىنداي تىڭ تاسىلدەردىڭ ءبىرى ەكەنىن اتاپ وتكەن ءجون. بۇل – OzgeEpic حابى مەن سەنات جانىنداعى ساراپشىلار كلۋبى بىرلەسىپ ازىرلەگەن ىرگەلى جوبا.
پالاتا سپيكەرى مۇگەدەكتىگى بار ادامدار ءۇشىن تەڭ مۇمكىندىكتەردى قامتاماسىز ەتۋ, ولاردىڭ ورتاعا بەيىمدەلۋىنە جانە كاسىبي تۇرعىدان وسۋىنە جاعداي جاساۋ, سونداي-اق وسى باعىتتاعى باسقا دا وزەكتى ماسەلەلەردى شەشۋ جولىندا كەشەندى تاسىلدەردىڭ ماڭىزى زور ەكەنىن دە تىلگە تيەك ەتتى.
«پرەزيدەنت قاسىم-جومارت توقاەۆتىڭ ساياسي باعدارىنىڭ باسىم باعىتتارىنىڭ ءبىرى ينكليۋزيۆتى قوعام قۇرۋ ەكەنى انىق. كەيىنگى جىلدارى مۇگەدەكتىگى بار ادامدارعا جانە حالىقتىڭ الەۋمەتتىك وسال توپتارىنا مەملەكەت تاراپىنان قولداۋ كورسەتۋ جۇيەلى سيپاتقا يە بولدى. وسى باعىتتا ءتيىستى زاڭدار دا قابىلدانىپ جاتىر. بۇل ماسەلەدە تەك الەۋمەتتىك-ەكونوميكالىق جانە ينفراقۇرىلىمدىق جوبالارمەن شەكتەلۋگە بولمايدى. ينكليۋزيۆتى قوعام قالىپتاستىرۋ ءۇشىن ادامداردىڭ ينكليۋزياعا دەگەن كوزقاراستارى مەن بۇل سالاداعى تاسىلدەردى وزگەرتۋ جانە مۇگەدەكتىگى بار ادامداردى جۇيەلى قولداۋ اسا ماڭىزدى. وسى تۇرعىدان كەلگەندە بۇگىن تاماشالاعان «قۇشتار» سپەكتاكلىنىڭ ءمانى زور», دەپ م.اشىمباەۆ «Creativity Support» Team كرەاتيۆتى توبىنىڭ جۇمىسىنا جوعارى باعا بەردى.
الەۋمەتتىك باعىتتاعى جوبانى تابىستى ىسكە اسىرۋدا ۇرپاقتار ساباقتاستىعىنا دا باسا ءمان بەرىلدى. قويىلىمدى ساحنالاۋعا ق.قۋانىشباەۆ اتىنداعى قازاق ۇلتتىق مۋزىكالىق دراما تەاترىنىڭ, «جاستار» تەاترىنىڭ, ءا.مامبەتوۆ اتىنداعى مەملەكەتتىك دراما جانە كومەديا تەاترىنىڭ, استانا قالاسى مۋزىكالىق جاس كورەرمەن تەاترىنىڭ كاسىبي اكتەرلەرىمەن قاتار شىعارماشىل زيالى قاۋىم وكىلدەرى دە اتسالىسىپ, ايتارلىقتاي قولداۋ كورسەتتى.
سپەكتاكلدى پارلامەنت دەپۋتاتتارىمەن قاتار ونەر, ءبىلىم بەرۋ سالاسىنىڭ ماماندارى, ساراپشىلار جانە تاعى باسقالار تاماشالادى.
ايتا كەتەيىك, «قۇشتار» قويىلىمىنىڭ باستى ماقساتى – اۋتيزمگە جانە ونىڭ الەۋمەتتىك اسپەكتىلەرىنە تەرەڭ ءۇڭىلۋ, سونداي-اق وسى ماسەلەگە قوعامنىڭ نازارىن اۋدارۋ. وقيعا جەلىسىندە اۋتيزم ۇعىمى بارلىق سالانى حاباردار ەتۋ جانە بايلانىس ورناتۋ, ءوزارا ديالوگ پەن الەۋمەتتىك تەڭدىكتى نىعايتۋ تۇرعىسىنان قاراستىرىلادى. جوبا قازىرگى زامانعى الەۋمەتتىك ماسەلەلەر مەن ۇردىستەردى ەسكەرە وتىرىپ, عىلىمي, الەۋمەتتىك جانە مادەني زەرتتەۋلەرگە نەگىزدەلگەن. سپەكتاكل بارىسىندا ماڭىزدى پروبلەمالار تەرەڭ تالدانىپ, جاڭا كوركەمدىك شەشىمدەر مەن ادىستەر ۇسىنىلادى.
