- اقش-تىڭ شارلوتت قالاسىندا تاەكۆوندودان گران-پري دوداسىنىڭ جالاۋى جەلبىرەدى. بۇل باسەكەدە تەمىرلان تىلەۋلەس (58 كگ), بەكتورە ورالحانوۆ (58 كگ), گازەز نۇربەك (68 كگ), باتىرحان تولەۋعالي (80 كگ), نوديرا احمەدوۆا (49 كگ), ريتا باكىشەۆا (49 كگ), نۇراي قۇسايىنوۆا (67 كگ) سىندى دايان شەبەرلەرى ەل نامىسىن قورعايدى.
- ەكىجاقتى كەلىسىمشارتتىڭ مەرزىمى اياقتالۋىنا بايلانىستى الماتىنىڭ «قايرات» فۋتزال كلۋبىنىڭ باس باپكەرى مارلون ۆەلاسكو ءوز قىزمەتىنەن كەتتى. 38 جاستاعى يسپانيالىق مامان «قايراتتىڭ» تىزگىنىن 2023 جىلى ۇستادى. ونىڭ باسشىلىعىمەن كلۋب ەل سۋپەركۋبوگىن ەكى رەت ولجالادى. پورتۋگاليادا وتكەن «Masters Cup» تۋرنيرىندە توپ جارىپ, ۋەفا چەمپيوندار ليگاسىنىڭ كۇمىس جۇلدەگەرى اتاندى. كوماندانىڭ باسشىلىعى مارلون ۆەلاسكوعا العىس ايتىپ, الداعى كۇندەرى دە ەڭبەگىنىڭ جەمىستى بولۋىنا تىلەكتەستىك ءبىلدىردى.
- كەزىندە وليمپيا ويىندارىندا اتوي سالىپ, ءبىرى – التىن, ەكىنشىسى – ەكى رەت قولا العان قوس بوكسشى – دانيار ەلەۋسىنوۆ (12-0, 7 كو) پەن يۆان دىچكو (14-0, 13 كو) كاسىپقوي رينگتەگى كەزەكتى كەزدەسۋلەرىن 19 شىلدەدە اقش-تىڭ ۆاشينگتون قالاسىندا وتكىزەدى. دانيار سوڭعى رەت بىلتىر قىركۇيەك ايىندا الماتىدا فيليپپيندىك دجو نوينايدى ۇرىپ جىقتى. ال يۆاننىڭ شارشى الاڭعا شىقپاعانىنا ءبىر جىلعا تاياپ قالدى. سوڭعى رەت ول پلانت-سيتيدە رينگ قوجايىنى كرەيگ ءليۋيستى نوكاۋتقا جىبەردى. ولاردىڭ قارسىلاستارى كىمدەر ەكەنى تاياۋ كۇندەرى بەلگىلى بولادى.
- ماۋسىم ايىنىڭ سوڭىندا ۇلىبريتانيادا شىمىلدىعى تۇرىلەتىن «ۋيمبلدون» ءتۋرنيرىنىڭ جۇلدە قورى بيىل 54 ميلليون فۋنت ستەرلينگتى قۇراپ وتىر. بىلتىرعىمەن سالىستىرعاندا بۇل 7%-عا ارتقان. جەكەلەگەن سايىستا جەڭىمپاز اتانعان تەننيسشىلەر 3 ميلليوننان السا, فينالدا ۇتىلعاندار سول سومانىڭ تەڭ جارتىسىن ەنشىلەيدى. تىپتەن, تۇساۋكەسەر كەزدەسۋىندە سۇرىنگەن ويىنشى دا تۇماندى البيون ساپارىنان قۇر قول قايتپايدى. ولاردىڭ ەسەپشوتىنا 66 000 اۋدارىلادى.
- 23 تامىزدا قىتايدىڭ شانحايىندا UFC ءتۋرنيرى ۇيىمداستىرىلادى. سول جارىستا ديار نۇرقوجاي (10–1) كۇش سىناسادى. ونىڭ قارسىلاسى – قىرعىز ۋران ساتىبالديەۆ (9–1, UFس). بۇل ارالاس جەكپە-جەك شەبەرلەرىنىڭ ەكەۋى دە الەمدەگى ەڭ بەلدى پروموۋشەندە بيىلدان باستاپ ونەر كورسەتىپ, تۇساۋكەسەر كەزدەسۋلەرىندە جەڭىلىس تاپتى. ديار برازيليالىق برەندسون ريبەيرودان, ۋران سلوۆاكيالىق مارتين بۋرايدان ۇتىلدى.
