ءىس-شاراعا قازاقستان رەسپۋبليكاسىنىڭ مادەنيەت جانە اقپارات ۆيتسە-ءمينيسترى ايبەك سىدىقوۆ, قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسياسىنىڭ مۇشەلەرى, قازاقستان رەسپۋبليكاسى پارلامەنتى ءماجىلىسىنىڭ دەپۋتاتى جۇلدىز سۇلەيمەنوۆا جانە «NazymPR» جشس ديرەكتورى نازىم جانعازينوۆا, «اكەلەر وداعى» رقب توراعاسى ماقسۇتبەك ايتماعانبەت, يۋنفپا-نىڭ قازاقستانداعى وكىلى چينۆە وگبوننا, رەسپۋبليكالىق اكەلەر وداعىنىڭ وڭىرلىك وكىلدەرى, زيالى قاۋىم وكىلدەرى, وتباسىلىق ساياسات سالاسىنىڭ ساراپشىلارى, مەملەكەتتىك ورگانداردىڭ, حالىقارالىق ۇيىمداردىڭ, ۇكىمەتتىك ەمەس ۇيىمداردىڭ وكىلدەرى — جالپى 200-گە جۋىق ادام قاتىستى.
بيىلعى فورۋمدا ءداستۇرلى تۇردە اتا-انا بولۋ, بالا تاربيەسى, ولاردىڭ قاۋىپسىزدىگى مەن دەنساۋلىعى جانە بارلىق وتباسى مۇشەلەرىنىڭ پسيحيكالىق دەنساۋلىعى سەكىلدى ماڭىزدى ماسەلەلەر كوتەرىلدى. كەزدەسۋ تاقىرىپتارى مەملەكەت باسشىسى ۇلتتىق قۇرىلتاي وتىرىسىندا ايقىنداپ بەرگەن باعىتتار نەگىزىندە بەلگىلەندى.
«تاربيەسىز بەرىلگەن ءبىلىم – ادامزاتتىڭ قاس جاۋى». سوندىقتان بىلىممەن قاتار تاربيەگە ايرىقشا نازار اۋدارۋ وتە ماڭىزدى», – دەدى قاسىم-جومارت توقاەۆ بۋرابايدا سويلەگەن سوزىندە.
10 جىل قاتارىنان فورۋم اتا-انالاردى, تاربيەشىلەردى, پسيحولوگتار مەن ساراپشىلاردى بىرىكتىرە وتىرىپ, تاجىريبە, ءبىلىم جانە وزىق تاجىريبەلەرمەن الماسۋ الاڭى رەتىندە قىزمەت ەتىپ كەلەدى. ولاردىڭ ورتاق ماقساتى – قاۋىپسىز, وتباسىلىق ۇيلەسىمدى ورتادا, زورلىق-زومبىلىقسىز جانە ومىرلىك باعىتى ءتۇزۋ جاڭا ۇرپاقتى قالىپتاستىرۋ.
فورۋمدا ء«ححى عاسىر اكەسى: ارەكەتكە شاقىرۋ» دەكلاراتسياسى قابىلداندى.
قۇجاتتا ءححى عاسىردا اكە بولۋ تەك مىندەت ەمەس, سونىمەن قاتار العاشقى كۇندەردەن باستاپ بالانىڭ ومىرىنە بەلسەندى ارالاسىپ, قامقورلىق پەن جاۋاپكەرشىلىكتى بولىسەتىن مۇمكىندىك رەتىندە قاراستىرىلادى.
دەكلاراتسيا سونىمەن قاتار ءححى عاسىرداعى اكەنىڭ قۇندىلىقتارىن انىقتايدى. اتاپ ايتساق سۇيىسپەنشىلىك, قامقورلىق پەن قۇرمەت كورسەتەتىن, بالانى تاربيەلەۋگە, ءبىلىم بەرۋگە جانە دامىتۋعا بەلسەندى ارالاساتىن, زورلىق-زومبىلىقسىز ورتانىڭ قالىپتاسۋىنا ىقپال ەتەتىن, ايەلدەر قۇقىعىن قۇرمەتتەيتىن جانە گەندەرلىك تەڭدىكتى ساقتايتىن, ءوزىنىڭ پسيحيكالىق جانە فيزيكالىق دەنساۋلىعىن كۇتەتىن, ۇيدەگى مىندەتتەر مەن تۇرمىستىق جاۋاپكەرشىلىكتى بولىسەتىن ادام, سونىمەن قاتار وسكەلەڭ ۇرپاققا ۇلگى بولا الاتىن تۇلعا.
سونداي-اق قۇجاتتا 2030 جىلعا دەيىن اتا-انا تاربيەسى, رەپرودۋكتيۆتى جانە پسيحيكالىق دەنساۋلىق باعدارلامالارىنا ەرلەردىڭ قاتىسۋىن ارتتىرۋعا, بۇكىل ەل بويىنشا اكەلەر كلۋبتارى مەن قوعامداستىقتارىن قۇرۋعا جانە قولداۋعا باعىتتالعان مىندەتتەمەلەر كىرەدى.
