فوتو: اشىق دەرەككوز
ونەركاسىپ جانە قۇرىلىس مينيسترلىگىنىڭ مالىمەتىنشە, جاڭا ايماقتار كاسىپكەرلەرگە دايىن وندىرىستىك عيماراتتاردى جەڭىلدەتىلگەن شارتتارمەن ۇسىنۋعا باعىتتالعان. بارلىق نىساندار قاجەتتى ينجەنەرلىك ينفراقۇرىلىممەن قامتاماسىز ەتىلىپ, كولىك قاتىناسى ءۇشىن قولايلى جەردە ورنالاسادى. بۇل كاسىپورىندار ءۇشىن باستاپقى كەزەڭدەگى كەدەرگىلەردى ازايتىپ, ولاردىڭ ءتيىمدى جۇمىس ىستەۋىنە جاعداي جاسايدى.
«QazIndustry» قازاقستاندىق يندۋستريا جانە ەكسپورت ورتالىعى» اق ارنايى ەكونوميكالىق جانە يندۋستريالىق ايماقتاردى دامىتۋ ديرەكتسياسىنىڭ دەرەكتەرى بويىنشا, 2025 جىلدىڭ العاشقى جارتىجىلدىعىنىڭ سوڭىنا دەيىن تۇركىستان وبلىسىندا جالپى كولەمى 19 مىڭ شارشى مەتر بولاتىن 12 شاعىن وندىرىستىك ايماق ىسكە قوسىلادى. جىل سوڭىنا دەيىن تاعى 19 وسىنداي ايماق اشۋ جوسپارلانىپ وتىر. ال 2026 جىلدىڭ ءبىرىنشى توقسانىندا ءۇش ايماق پايدالانۋعا بەرىلەدى», دەلىنگەن حابارلامادا.
ايتا كەتەيىك, جاڭا باعدارلاما ءۇش باعىتتا جۇزەگە اسىرىلادى: جاڭا وندىرىستىك عيماراتتار سالۋ, بوس تۇرعان وندىرىستىك نىسانداردى قايتا جاڭعىرتۋ (Ready built factory ۇلگىسى بويىنشا), جانە جۇمىس ىستەپ تۇرعان كاسىپورىنداردى كەڭەيتۋ.
مينيسترلىكتىڭ حابارلاۋىنشا, باعدارلاما باسەكەگە قابىلەتتى وندىرىستەردى دامىتۋعا, جاڭا جۇمىس ورىندارىن اشۋعا جانە ەل ەكونوميكاسىنداعى شاعىن جانە ورتا بيزنەستىڭ ۇلەسىن ارتتىرۋعا باعىتتالعان. شاعىن ونەركاسىپتىك ايماقتار ارنايى ەكونوميكالىق نەمەسە يندۋستريالىق ايماقتاردىڭ اۋماعىندا دا, ودان تىس جەرلەردە دە قۇرىلۋى مۇمكىن. بۇل كاسىپكەرلەرگە ءوز ءىسىن باستاۋعا نەمەسە كەڭەيتۋگە قوسىمشا مۇمكىندىك بەرەدى.
«QazIndustry» قازاقستاندىق يندۋستريا جانە ەكسپورت ورتالىعىنىڭ مالىمەتىنشە, ينۆەستورلار تاراپىنان بارلىعى ەلىمىزدىڭ سەگىز وڭىرىندە 34 شاعىن ونەركاسىپتىك ايماق قۇرۋ جوباسىن جۇزەگە اسىرۋدا. مۇنداي ايماقتار استانا مەن شىمكەنت قالالارىندا, سونداي-اق سولتۇستىك قازاقستان, قاراعاندى, قوستاناي, جامبىل, قىزىلوردا جانە تۇركىستان وبلىستارىندا قۇرىلماق. بۇل ونەركاسىپتىك ايماقتاردىڭ جالپى اۋماعى شامامەن 265 مىڭ شارشى مەتردى قۇرايدى», دەلىنگەن حابارلامادا.
باعدارلامانى جۇزەگە اسىرۋ بيزنەسكە ارنالعان دايىن عيماراتتاردىڭ تاپشىلىعى ماسەلەسىن شەشۋگە جول اشادى. شاعىن ونەركاسىپتىك ايماقتار يندۋستريالاندىرۋ مەن ەكونوميكانىڭ وسۋىنە سەرپىن بەرىپ, كاسىپكەرلىكتى قولداۋدىڭ ءتيىمدى تەتىگىنە اينالىپ كەلەدى.
