ماۋلەن اشىمباەۆ ءوز سوزىندە تۇركپا پارلامەنتارالىق ديالوگ پەن ىنتىماقتاستىقتىڭ ءتيىمدى پلاتفورماسى رەتىندە تولىق قالىپتاسىپ, تانىلعانىنا نازار اۋداردى. پارلامەنتتىك اسسامبلەيا باۋىرلاس ەلدەردىڭ زاڭنامالارىن جاقىنداستىرۋ, زاڭ شىعارۋ قىزمەتىندە تاجىريبە الماسۋ, وڭىرلىك جانە حالىقارالىق كۇن تارتىبىندەگى وزەكتى ماسەلەلەردى شەشۋ ءۇشىن بىرلەسىپ ارەكەت ەتۋ جولىندا ماڭىزدى ءرول اتقارادى. سەنات توراعاسى اتاپ وتكەندەي, جاھاندىق ءتارتىپ پەن قاۋىپسىزدىك نەگىزدەرىنە اسەر ەتەتىن قازىرگى سىن-قاتەرلەردى ەڭسەرۋ جانە مەملەكەتتەردىڭ الەۋەتىن دامىتۋ ءۇشىن تۇركى ەلدەرىنىڭ كۇش-جىگەرىن بىرىكتىرۋ ەرەكشە مانگە يە.
«بيىل مامىر ايىندا بۋداپەشتتە وتكەن تۇركى مەملەكەتتەرى ۇيىمىنىڭ بەيرەسمي سامميتىندە قازاقستان پرەزيدەنتى قاسىم-جومارت توقاەۆ قازىرگى كۇردەلى گەوساياسي جاعدايدا ۇيىم اياسىنداعى ىنتىماقتاستىقتىڭ ءمانى ەرەكشە ارتىپ وتىرعانىن ايتتى. بۇگىندە شيەلەنىسە تۇسكەن گەوساياسي تۇراقسىزدىق, قارۋلى قاقتىعىستار, الەمدىك ەكونوميكادا ءارتۇرلى پروبلەمالاردىڭ ۋشىعۋى جانە پروتەكتسيونيزمنىڭ كۇشەيۋى بەلەڭ الىپ وتىر. سانكتسيالىق تەكەتىرەستەر مەن تەحنولوگيالىق باسەكەنىڭ دە اسەرىن اتاپ وتكەن ءجون. مۇنىڭ ءبارى مەملەكەتتەر اراسىنداعى سەنىم مەن ىنتىماقتاستىقتىڭ ازايۋىنا ىقپال ەتەتىنى انىق. سونداي-اق بۇگىندە قارقىندى تەحنولوگيالىق سەرپىلىس داۋىرىنە قادام باستىق. سوندىقتان سىن-قاتەرلەرمەن بىرگە الدىمىزدا جاڭا مۇمكىندىكتەر دە اشىلىپ جاتقانىن ايتۋعا ءتيىسپىز. وسىعان بايلانىستى تۇركى مەملەكەتتەرىنىڭ زور الەۋەتىن تولىق پايدالانىپ, ءوزارا ءىس-قيمىلدى جانداندىرا ءتۇسۋىمىز كەرەك», دەدى پالاتا سپيكەرى.
وتىرىسقا قاتىسۋشىلار قازاقستاننىڭ ەلورداسىندا ءوتىپ جاتقان كەزدەسۋ ورتاق تاريحي مۇراعا, مازمۇندى ديالوگكە جانە تۇركى الەمىن ودان ءارى دامىتۋعا دەگەن اينىماس ادالدىقتىڭ جارقىن كورىنىسى ەكەنىن ايتتى. سونداي-اق مۇنداي باسقوسۋ كوپجوسپارلى ءوزارا ءىس-قيمىلدى نىعايتا تۇسۋگە وڭ سەپتىگىن تيگىزەتىنى ءسوز بولدى. سەنات توراعاسى تۇركپا-عا مۇشە ەلدەر قازىرگى سىن-قاتەرلەرگە بەيىمدەلۋمەن قاتار وزدەرىنىڭ تەحنولوگيالىق, ەكونوميكالىق جانە ەكولوگيالىق كۇن ءتارتىبىن جۇزەگە اسىرۋعا قاجەتتى الەۋەتكە يە ەكەنىن تىلگە تيەك ەتتى.
«پارلامەنتتىك ديپلوماتيانى ودان ءارى نىعايتۋ ەكونوميكادان مادەنيەتكە دەيىنگى بارلىق دەڭگەيدەگى كووپەراتسياعا تىڭ سەرپىن بەرەدى. وسى رەتتە پارلامەنتتەرىمىز اراسىنداعى ءىس-قيمىلدى ارتتىرۋدىڭ اسا ماڭىزدى ەكەنىن اتاپ وتكىم كەلەدى. بۇل, اسىرەسە, تۇركى مەملەكەتتەرى ۇيىمى اياسىندا بەلگىلەنگەن ەكونوميكالىق, كولىكتىك, ەكولوگيالىق جانە تسيفرلىق باستامالاردى قۇقىقتىق تۇرعىدان قامتاماسىز ەتۋ ىسىندە ايرىقشا مانگە يە. جالپى, تۇركپا-نىڭ بۇگىنگى وتىرىسى پارلامەنتتىك ديپلوماتياداعى جاڭا كوكجيەكتەرگە جول اشادى دەپ سەنەمىز», دەدى م.اشىمباەۆ.
وتىرىس بارىسىندا پارلامەنتتىك دەلەگاتسيالاردىڭ مۇشەلەرى, حالىقارالىق ۇيىمدار مەن باسقا دا مۇددەلى تاراپتاردىڭ وكىلدەرى وڭىردەگى ستراتەگيالىق سەرىكتەستىكتى دامىتۋعا قاتىستى وزەكتى ماسەلەلەردى جان-جاقتى تالقىلادى.
سەنات توراعاسى وتىرىس الاڭىندا پارلامەنتتىك دەلەگاتسيالاردىڭ باسشىلارىمەن بىرقاتار ەكىجاقتى كەزدەسۋلەر وتكىزدى.
ماۋلەن اشىمباەۆ تۇركيا ۇلى ۇلتتىق ءماجىلىسىنىڭ توراعاسى نۋمان كۋرتۋلمۋشپەن كەزدەسۋدە ونى اتالعان قىزمەتكە قايتا سايلانۋىمەن قۇتتىقتاپ, پارلامەنتتىك ديپلوماتيانى ودان ءارى نىعايتۋدىڭ الەۋەتى زور ەكەنىن ايتتى. تاراپتار پارلامەنتارالىق ىنتىماقتاستىقتى, ونىڭ ىشىندە دوستىق توپتارى مەن سالالىق كوميتەتتەر اراسىنداعى بايلانىستاردى كەڭەيتۋ ماسەلەلەرىنە توقتالدى. سۇحبات كەزىندە ساۋدا, لوگيستيكا, ينۆەستيتسيالىق جانە مادەني-گۋمانيتارلىق بايلانىس سالالارىن دامىتۋ تەتىكتەرى دە ءسوز بولدى.
وزبەكستان رەسپۋبليكاسى ولي ءماجىلىسى زاڭ شىعارۋ پالاتاسىنىڭ سپيكەرى نۋريددين يسمويلوۆپەن كەزدەسۋدە قازاقستان مەن وزبەكستان اراسىنداعى ءىس-قيمىلدى ءارى قاراي نىعايتۋ ماسەلەسى تالقىلاندى. سونداي-اق تاراپتار كەيىنگى جىلدارى ساياسي, ساۋدا-ەكونوميكالىق جانە مادەني-گۋمانيتارلىق سالالارداعى ءوزارا ءىس-قيمىل جوعارى دەڭگەيگە كوتەرىلگەنىن اتاپ ءوتتى. كەزدەسۋدە ىنتىماقتاستىقتى كەڭەيتۋ پەرسپەكتيۆالارى, ونىڭ ىشىندە حالىقارالىق پارلامەنتتىك قۇرىلىمدار اياسىندا بىرلەسكەن باستامالاردى ىلگەرىلەتۋگە قاتىستى باسىمدىقتار بەلگىلەندى.
بۇعان قوسا ماۋلەن اشىمباەۆ ازەربايجان رەسپۋبليكاسى ميللي ءماجىلىسىنىڭ توراعاسى ساگيبا گافاروۆامەن كەزدەستى. وندا ەكىجاقتى قاتىناستاردى ودان ءارى دامىتۋ ماسەلەلەرى اڭگىمەگە ارقاۋ بولدى. سۇحباتتاسۋشىلار پارلامەنتارالىق ءوزارا ءىس-قيمىلدى ارتتىرۋ, بىرقاتار اۋقىمدى ەكونوميكالىق جوبالاردى بىرلەسىپ ىسكە اسىرۋ, ترانسكاسپي حالىقارالىق كولىك باعىتىن, اقپاراتتىق-كوممۋنيكاتيۆتىك سالانى جانە باسقا دا سەكتورلاردى دامىتۋ جونىندە پىكىر الماستى.
