سالتاناتتى راسىمگە پارلامەنت ءماجىلىسى مەن استانا قالاسى ءماسليحاتىنىڭ دەپۋتاتتارى, بەلگىلى قالامگەرلەر تولەن ابدىك, سەرىك تۇرعىنبەك ۇلى, ءورىس ياشۇكىرقىزى, كامال الپەيىسوۆا, اقىننىڭ وتباسى مەن شاكىرتتەرى قاتىستى.
القالى جيىندى اشقان جازۋشىلار وداعى استانا فيليالىنىڭ باسشىسى باۋىرجان باباجان ۇلى قونىسباي ءابىل قازاق ادەبيەتىنىڭ قازىناسىن, ونىڭ ىشىندە ايتىس ونەرىن بارىنشا بايىتىپ كەتكەنىن, سونداي-اق استانادا ۇلت مادەنيەتىنىڭ دامۋىنا قوسقان ۇلەسىنىڭ ولشەۋسىز ەكەنىن اتاپ ءوتتى.
«قونىسباي ءابىلدىڭ ۇيىمداستىرۋىمەن استانا قالاسىندا رەسپۋبليكالىق دەڭگەيدە 10 رەت اقىندار ايتىسى وتكىزىلدى. جاس ۇرپاقتى حالىق ەرتەگىلەرى كەيىپكەرلەرى رۋحىندا تاربيەلەۋ ماقساتىندا «تازشا بالا» بايقاۋى قولعا الىنىپ, ەل ىشىندەگى كوپتەگەن تالانتتىڭ تانىلۋىنا جول اشىلدى», دەدى باۋىرجان باباجان ۇلى.
سونداي-اق مەملەكەتتىك سىيلىقتىڭ لاۋرەاتى, جازۋشى تولەن ابدىك بۇگىنگى ءىس-شارا ەلوردانىڭ رۋحاني الەمى مەن قازاق قوعامىنداعى ۇلكەن وقيعا ەكەنىن ايتتى. ۇلت رۋحانياتىن بيىككە كوتەرگەن ءبىرتۋار ازاماتتىڭ كىسىلىك كەلبەتى مەن تۇلعالىق قاسيەتىنە توقتالدى.
پارلامەنت ءماجىلىسىنىڭ دەپۋتاتى, ايتىسكەر اقىن امانجول التاەۆ, استانا قالاسى ءماسليحاتىنىڭ دەپۋتاتى قانات ەستەك ءسوز سويلەپ, ەستەلىك ايتتى. اقىننىڭ تۋىستارى اتىنان ءسوز العان اقتورتا ىسكەندىرقىزى استانا قالاسى اكىمدىگىنە, قالالىق تىلدەردى دامىتۋ جانە ارحيۆ ءىسى باسقارماسىنا العىسىن جەتكىزدى.
ەسكەرتكىش-تاقتانى جازۋشى تولەن ابدىك پەن اقىننىڭ اپاسى اقتورتا ىسكەندىرقىزى اشتى.
ايتا كەتەيىك, قونىسباي ءابىل ەلوردادا تىلدەردى دامىتۋ باسقارماسىن اشىپ, انا ءتىلىمىزدى وركەندەتۋ باعىتىندا بەل شەشە ەڭبەك ەتتى. سول كەزدەگى استانا قالاسى اكىمىنىڭ ورىنباسارى تولەگەن مۇحامەدجانوۆتىڭ باسشىلىعىمەن باسقارما جانىنان «رۋحانيات» مەملەكەتتىك ءتىلدى جەدەلدەتىپ وقىتۋ ورتالىعى اشىلىپ, وندا وزگە ۇلت وكىلدەرى ارنايى دايارلىقتان ءوتتى. سول سەكىلدى ناۋرىز مەيرامىن حالىقتىق مەرەكە رەتىندە تويلاۋ, ءتىل فەستيۆالىن قالىپتاستىرۋ, اباي ەسكەرتكىشى جانىندا «پوەزيا ساعاتىن» ۇيىمداستىرۋ, ەلوردادا تۇراتىن قالامگەرلەرمەن كەزدەسۋلەر وتكىزۋ داستۇرگە اينالدى.
وسى ەسكەرتكىش-تاقتانىڭ ەلوردا تورىندە اشىلۋى حالىق اقىنىنا ارنالعان يگى ىستەردىڭ باستاۋى بولارى انىق.
