«اكۆاشارۋاشىلىق تۋرالى» زاڭنىڭ ماقساتى – جاڭا وندىرىستەر قۇرۋ, جۇمىس ىستەپ تۇرعان كاسىپورىنداردى كەڭەيتۋ, باسەكەگە قابىلەتتى اكۆاشارۋاشىلىق نىساندارىن كوبەيتۋ, سونداي-اق قورشاعان ورتاعا جانە ادام ءومىرى مەن دەنساۋلىعىنا قاۋىپسىز ەتۋ ارقىلى اكۆاشارۋاشىلىقتى تۇراقتى دامىتۋ.
قۇجاتقا جاڭا وندىرىستەردى قۇرۋ جانە جۇمىس ىستەپ تۇرعان كاسىپورىنداردى كەڭەيتۋ ماقساتىندا ينۆەستيتسيالىق جوبالاردى عىلىمي سۇيەمەلدەۋ ەنگىزىلدى. سونىڭ ناتيجەسىندە بيۋدجەت قاراجاتى ەسەبىنەن بيزنەسكە اقپاراتتىق-تالدامالىق جانە عىلىمي-ادىستەمەلىك قولداۋ كورسەتىلەدى.
سونداي-اق زاڭدا سۋبسيديالاۋ, جەڭىلدىكپەن نەسيەلەۋ, ساقتاندىرۋ, سالىق پرەفەرەنتسيالارى, ينجەنەرلىك-كوممۋنيكاتسيالىق ينفراقۇرىلىممەن قامتاماسىز ەتۋ جانە باسقا دا مەملەكەتتىك قولداۋ شارالارى كوزدەلگەن.
زاڭدا اكۆاشارۋاشىلىق سۋبەكتىلەرى جۇزەگە اسىراتىن قىزمەت تۇرلەرى, سونداي-اق بالىق شارۋاشىلىعى سۋ ايدىندارى مەن وسىنداي قىزمەتتى جۇزەگە اسىرۋعا ارنالعان ۋچاسكەلەر (حالىقارالىق, رەسپۋبليكالىق جانە جەرگىلىكتى) ناقتى بولىنگەن.
سۋ بيولوگيالىق رەسۋرستارىنا جانە ولاردىڭ تىرشىلىك ەتۋ ورتاسىنا زيان كەلتىرمەۋ ءۇشىن زاڭدا بالىق شارۋاشىلىعى سۋ ايدىندارىن ۇتىمدى پايدالانۋدىڭ نەگىزگى قاعيداتى بەلگىلەنگەن. سونىمەن قاتار اكۆاشارۋاشىلىق سالاسىنا مەملەكەتتىك باقىلاۋ ەنگىزىلدى. بۇل جانۋارلار دۇنيەسىن قورعاۋ, ونىڭ ءوسىمىن مولايتۋ جانە پايدالانۋ باعىتىنداعى باقىلاۋدىڭ ءبىر بولىگى سانالادى.
سونداي-اق جەر, ورمان, ەكولوگيالىق جانە كاسىپكەرلىك كودەكستەرگە, سونداي-اق 14 زاڭعا تۇزەتۋلەر ەنگىزىلدى.
تۇزەتۋلەردىڭ ءبىرىنشى بلوگى زاڭنامالىق اكتىلەردى قابىلدانعان جانە قول قويۋعا ۇسىنىلعان «اكۆاشارۋاشىلىق تۋرالى» زاڭعا سايكەس كەلتىرۋگە باعىتتالعان.
جەر كودەكسىنە ەنگىزىلگەن تۇزەتۋلەرمەن اكۆاشارۋاشىلىقتى جۇرگىزۋ ءۇشىن سۋ قورى جەرلەرىنىڭ قۇرامىنان جەر ۋچاسكەلەرىن بەرۋ مۇمكىندىگى بەلگىلەندى. بۇل رەتتە اكۆاشارۋاشىلىقتى جۇرگىزۋگە ارنالعان جەر ۋچاسكەلەرىن بەرۋ ءۇشىن كونكۋرستىق وتىنىمگە قويىلاتىن تالاپتار رەگلامەنتتەلگەن.
ورمان كودەكسىنە ەنگىزىلگەن تۇزەتۋلەرمەن مەملەكەتتىك ورمان قورى ۋچاسكەلەرىندە بالىق ءوسىرۋ جونىندەگى قىزمەتتى جۇزەگە اسىرۋ مۇمكىندىگى بەلگىلەندى.
جانۋارلار دۇنيەسىن پايدالانۋعا ارنالعان ليميتتەر مەن كۆوتالاردى بەلگىلەۋگە قويىلاتىن تالاپتار قايتا قارالدى.
«اگروونەركاسىپتىك كەشەندى جانە اۋىلدىق اۋماقتاردى دامىتۋدى مەملەكەتتىك رەتتەۋ تۋرالى» زاڭ اگروونەركاسىپتىك كەشەن سۋبەكتىلەرىن مەملەكەتتىك قولداۋ شارالارىنىڭ جاڭا نىساندارىمەن تولىقتىرىلدى.
تۇزەتۋلەردىڭ ەكىنشى بلوگى «قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى» قازاقستان رەسپۋبليكاسى پرەزيدەنتىنىڭ 2024 جىلدىڭ 3 قاڭتارىنداعى № 429 جارلىعىن ىسكە اسىرۋعا باعىتتالعان, سوعان سايكەس ەكولوگيا جانە تابيعي رەسۋرستار مينيسترلىگىنىڭ بالىق شارۋاشىلىعى سالاسىنداعى فۋنكتسيالارى مەن وكىلەتتىكتەرى اۋىل شارۋاشىلىعى مينيسترلىگىنە بەرىلگەن. وسىعان بايلانىستى اتالعان مەملەكەتتىك ورگاندار اراسىندا فۋنكتسيالار زاڭمەن قايتا ءبولىندى.
