فوتو: gov.kz
«اباي ەلىنە ساياحات» – جوعارى وقۋ ورىندارىنىڭ ءبىلىم الۋشىلارى ءۇشىن ارنايى ازىرلەنگەن, تاريحي جانە مادەني مۇرالاردى, قازاق حالقىنىڭ ۇلى تۇلعالارىنىڭ ءىزى قالعان عيماراتتار مەن ەلدى مەكەندەردى ارالاۋعا مۇمكىندىك بەرەتىن تانىمدىق-تۋريستىك جوبا.
2 ماۋسىمدا باستالعان جوبا تامىز ايىنىڭ سوڭىنا دەيىن جالعاسادى. وسى ۋاقىت ارالىعىندا ەلىمىزدىڭ ءار وڭىرىندەگى جوعارى وقۋ ورىندارىنىڭ ستۋدەنتتەرى بىرنەشە كۇن بويى, ارنايى ەكسپەديتسيالىق توپ قۇرامىندا سەمەي وڭىرىندەگى تاريحي جەرلەر مەن مۋزەيلەردى, ونىڭ ىشىندەگى جيدەبايداعى اباي مۋزەي-ءۇيى مەن «اباي مەن شاكارىم» مەموريالدىق كەسەنەسىن ارالايدى.
تانىمدىق ەكسكۋرسيالاردان بولەك ءبىلىم الۋشىلار ءۇشىن بىرلەسكەن كينو كورسەتىلىمدەر, پىكىر الماسۋ كەشتەرى, قىزىقتى ويىندار مەن تيمبيلدينگ سەسسيالارى ۇيىمداستىرىلادى.
جوباعا قاتىسۋعا العاشقىلاردىڭ ءبىرى بولىپ الماتى قالاسىنداعى حالىقارالىق اقپاراتتىق تەحنولوگيالار ۋنيۆەرسيتەتىنىڭ ستۋدەنتتەرى بارعان. ءبىلىم الۋشىلار ءاليحان بوكەيحان ۋنيۆەرسيتەتىندەگى جاستارمەن بىرگە سەمەيدىڭ تاريحي ورىندارى مەن كورىكتى جەرلەرىن ارالاپ, جيدەبايداعى اباي مۋزەي-ءۇيى مەن «اباي مەن شاكارىم» مەموريالدى كەشەنىنە ساپار شەككەن.
ۋنيۆەرسيتەتتىڭ ستۋدەنتتەر ۇيىنە ورنالاسقان ءبىلىم الۋشىلار ءۇشىن مادەني-ساۋىقتىق باعدارلاما مەن الەمگە ايگىلى قاراعايلى ورمان اۋماعىندا وتكەن ارنايى تيمبيلدينگ شاراسى ۇيىمداستىرىلعان. ساپار اياسىندا حاتۋ ستۋدەنتتەرى سەمەي جۇرتشىلىعى مەن قالا قوناقتارىنا ارنايى دايىنداپ اكەلگەن «اباي ەلىنە تارتۋ» اتتى كونتسەرتتىك باعدارلاماسىن ۇسىندى.
