وڭىردەگى بارلىق مەكتەپتە كوركەم ادەبيەتتى ناسيحاتتاۋدى باستى ماقسات ەتكەن جوباعا ۇزىن سانى 90 كوماندا قاتىسۋعا نيەت بىلدىرسە, ولاردىڭ ىشىنەن ىرىكتەلىپ الىنعان بىرنەشە مەكتەپتىڭ كومانداسى گراند-فينالعا جولداما الدى. ۇيىمداستىرۋشىلاردىڭ ايتۋىنشا, قورىتىندى ويىندا توپ جارعان ۇجىم 2 ملن تەڭگە قارجىلاي سىيلىققا يە بولماق.
زەردەلى جاستاردىڭ باسىن قوسقان ويىن بىرنەشە اۋداندا ۇيىمداستىرىلدى. باۋىرجان مومىش ۇلى مەن شەرحان مۇرتازا تۋعان جۋالى اۋدانىندا وتكەن زياتكەرلىك ويىندا شەراعانىڭ «بەسەۋدىڭ حاتى», باۋىرجان مومىش ۇلىنىڭ «الىستان سالەم جولدايمىن», ءازىلحان نۇرشايىقوۆتىڭ «اقيقات پەن اڭىز», كۇلاش احمەتوۆانىڭ «باق» ولەڭدەر جيناعىنا قاتىستى سۇراقتار تاڭدالىپتى.
التى كەزەڭنەن تۇراتىن ويىندا جاسوسپىرىمدەر جوعارىدا اتالعان كىتاپتاردى بارىنشا ىنتىزارلىقپەن وقىعانىنا كۋا بولدىق. وننان استام كوماندانىڭ ءبىر دەڭگەيدە جاۋاپ بەرۋى, ۇزدىكتەردىڭ قوسىمشا كەزەڭدە انىقتالۋى سوزىمىزگە دالەل بولسا كەرەك.
زياتكەرلىك ويىن قورىتىندىسىندا ءاليحان بوكەيحان اتىنداعى №15 تىرەك مەكتەپ ليتسەيىنىڭ ۇجىمى جەڭىمپاز اتانىپ, گراند-فينالعا جولداما الدى. سونداي-اق 30 مەكتەپتىڭ ىشىنەن ۇزدىك شىققان كومانداعا 500 مىڭ تەڭگەنىڭ سەرتيفيكاتى تابىستالدى. ەندى بۇل كوماندا كىل ۇزدىكتەر توپقا تۇسەتىن جىلدىڭ باستى ويىنىندا باق سىنايدى.
تارازدا وتكەن قالالىق ويىندى ۇيىمداستىرۋشىلار مۇحتار اۋەزوۆتىڭ, تاحاۋي احتانوۆتىڭ, ءالديحان قالدىباەۆتىڭ شىعارمالارىنا ارنادى. ناتيجەسىندە, №15 مەكتەپ گيمنازياسى مەن №23 ورتا مەكتەپ وقۋشىلارى ۇزدىك شىقتى. ال شالعايداعى مويىنقۇم اۋدانىندا ۇيىمداستىرىلعان ىرىكتەۋ كەزەڭىندە شىعاناق ورتا مەكتەبى جەڭىمپاز اتانسا, شۋ اۋدانىنىڭ ۇزدىگى بولىپ اباي ورتا مەكتەبىنىڭ كومانداسى تانىلدى. اتالعان كوماندالاردىڭ بارلىعى گراند-فينال ويىنىنا قاتىسىپ, 2 ملن تەڭگەگە تالاسادى.
جامبىل وبلىسى
