مودۋلدىك قۇراستىرۋ جاھاندىق قۇرىلىس سالاسىندا بەلسەندى ەنگىزىلگەن. قىتايدىڭ شەنچجەن قالاسىنداعى Tencent كەڭسە ورتالىعى, CitizenM Tower of London قوناق ءۇيى, كانادانىڭ مونرەال قالاسىنداعى Habitat 67 تۇرعىن ءۇي كەشەنى - مودۋلدىك عيماراتتاردىڭ جارقىن مىسالى. وسىنداي نەگىزگە قۇرىلعان ۋنيۆەرسيتەتتىڭ ينجەنەرلىك توبى جوبالاعان نىساندار تەمىربەتون مودۋلمەن سالىستىرعاندا 10 ەسە جەڭىل, جۇمىس كۇشىن 5 ەسە از قاجەت ەتەدى. سەيسميكالىق قاۋىپسىز جوبا كانىگى قۇرىلىستان 2 ەسە قالتاعا قونىمدى. جوبا جەتەكشىسى, قازاقستاننىڭ قۇرمەتتى قۇرىلىسشىسى ەرىك تۇراش ۇلىنىڭ ايتۋىنشا, مودۋلدىك ءۇيدى كەز كەلگەن ورىنعا وڭاي ورنالاستىرۋعا بولادى.
«تەحنيكالىق سيپاتتاماسى تالاپقا ساي مودۋلدىك ۇيلەردىڭ پىشىنىنە دە تاڭداۋ كوپ. سۇرانىسقا قاراي قوعامدىق عيماراتتاردى, ساۋدا نىساندارىن, تۋريستەر تۇراقتايتىن ورىنداردى شەڭبەر, دوعا, ءۇشبۇرىش فورمادا دا قۇراستىرۋ ويلاستىرىلعان. جوبالاۋ كەزەڭىنەن شاكىرتتەرمەن بىرگە ىسكە اسىرىلعان مودۋلدىك ءۇيدى ۋنيۆەرسيتەت اۋلاسىندا قۇراستىردىق. قازىر جاڭا جۇيەمەن سالىنعان نىسان ستۋدەنتتەردىڭ سەرگىپ, دەمالاتىن, شىعارماشىلىقپەن اينالىساتىن الاڭىنا اينالعان», دەپ ءسوزىن ساباقتاعان ساتباەۆ ۋنيۆەرسيتەتىنىڭ پروفەسسورى جوبا اسىرەسە, تۋريزم سالاسىن تۇلەتۋگە سەرپىن بەرەتىنىن اتاپ ءوتتى. «قازاقستان تابيعاتى – كوپ قىرلى. تاۋ, شاتقال, جەر بەدەرىنەن بىرنەشە شاقىرىم تومەن ورانالاسقان كورىكتى مەكەندەر كوپ. سونداي ورىندارعا تۋريستەردى تارتۋ ءۇشىن جايلى ورىن بولۋى ماڭىزدى. ءبىزدىڭ جوبا وسى ءتۇيىندى از شىعىنمەن تارقاتا الادى. ارنايى تسەحتا دايىندالعان تەمىر قاڭقالاردى تەحنيكامەن جەتكىزۋ دە جەڭىل ءارى قۇراستىرۋعا اي جەتكىلىكتى. ماۋسىمدىق ساياحات كەزىندە بوس قالسا سۋ تاسقىنى, وزگە دە توتەنشە جاعدايدا قابىلداۋ پۋنكتتەرىنىڭ قىزمەتىن اتقارا الادى. سەبەبى جوبادا ينفراقۇرىلىمدىق, ءومىر سۇرۋگە قاجەتتى بولىكتەر ەسكەرىلگەن», دەدى ەرىك تۇراش ۇلى.
ەكى جەتەكشى, 11 ستۋدەنتتىڭ مودۋلدىك ءۇي جوباسىن قازاق باس ساۋلەت-قۇرىلىس اكادەمياسىنىڭ ماماندارى دا جوعارى باعالاعان. ىزدەنۋشىلەر باستاماسى قىرعىزستان رەسپۋبليكاسىنداعى عىلىمي بايقاۋدا دا جۇلدە ەنشىلەگەن. جوبانىڭ وزگە دە ۇتىمدى تۇسىن بولاشاق ينجەنەر ماديار شرازدين تارقاتتى.
«جوبا يدەياسى 2024 جىلدىڭ قاڭتارىندا ويعا قوندى. ۇستازدارىمىز ەرىك تۇراش ۇلى مەن قازاقستاننىڭ قۇرمەتتى ارحيتەكتورى سەرىك سىزدىق ۇلى ويىمىزدى قۋاتتاپ, ىسكە اسىرۋ بارىسىندا مول تاجىريبەسىمەن ءبولىسىپ, قاتە-كەمشىلىكتەرىمىزدى كۇزەپ-تۇزەدى. وسىنداي وراسان قولداۋ اياسىندا ەكولوگيالىق تازا, ءموبيلدى جوبامىزدى سوزدەن ىسكە دەيىن جەتكىزە الدىق. ءمودۋلدى ءۇيدىڭ ءبىر قاباتپەن شەكتەلمەيتىنىنە دە نازار اۋدارعىم كەلەدى. جوبالاۋ بارىسىندا ماتەريالدى ءوزارا الماستىرۋ, قاجەتتىلىك تۋعاندا دايىن ءۇيدىڭ قاپتالىنان, جوعارىدان بلوك قوسۋ مۇمكىندىكتەرى قاراستىرىلعان», دەدى ق.ي.ساتباەۆ ۋنيۆەرسيتەتىنىڭ 3-كۋرس ستۋدەنتى.
ينجەنەرلىك توپ جوبا يگىلىگىن, ماسشتابىن كەڭەيتىپ شەتەلگە شىعارۋدى كوزدەپ وتىر. عالامدىق سۇرانىس تامىرىن باسىپ وتىرعان ستۋدەنتتەر مودۋلدىك ءۇي جوباسى حالقى تىعىز ورنالاسقان افريكا ەلدەرىندەگى دە باسپاناعا قاجەتتىلىكتى بيۋدجەت تۇرعىسىنان ءتيىمدى شەشۋگە بولاتىنىن تىلگە تيەك ەتتى.
